مينيسترلىك مالىمەتىنشە, اسكەردە تاربيە جۇمىسىنىڭ ۇيىمداستىرىلۋى مەن اسكەري ءتارتىپتى باقىلاۋ كۇشەيتىلگەن. سونداي-اق قارۋ-جاراقتى پايدالانۋ, ساباقتار وتكىزۋ, اتىس جاتتىعۋلارى مەن تاپسىرمالاردى ورىنداۋ كەزىندە جارعىلىق تالاپتار مەن قاۋىپسىزدىك شارالارىن ساقتاۋ تالاپتارى قاتاڭداتىلعان.
قايعىلى وقيعالاردان كەيىن اسكەري بولىمدەرگە قارۋلى كۇشتەردىڭ جەكە قۇرامىن كەشەندى پسيحولوگيالىق تەكسەرۋدەن وتكىزۋ ءۇشىن كوميسسيالار جىبەرىلگەن. اسكەري قىزمەتشىلەردىڭ پسيحيكالىق جاي-كۇيىنە, قىزمەتتىك مىندەتتەردى ورىنداۋعا پسيحولوگيالىق دايىندىق دەڭگەيىنە قايتا باعالاۋ جۇرگىزىلىپ جاتىر.
وسى ماسەلەلەردەن كەيىن كومانديرلەر مەن سەرجانتتىق قۇرامنىڭ جەكە جاۋاپكەرشىلىگى ارتتىرىلىپ, نەگىزگى نازار وقىس وقيعالاردىڭ الدىن الۋعا جانە قاۋىپسىز مىنەز-ق ۇلىق داعدىلارىن قالىپتاستىرۋعا باعىتتالىپ وتىر.
«اسكەري پوليتسيا كۇشتەرىمەن اسكەري بولىمدەردە جان-جاقتى تەكسەرۋلەر ۇيىمداستىرىلدى. جەكە قۇرامعا باقىلاۋ, بەينەباقىلاۋ, ونىڭ ىشىندە قىزمەتتەن تىس ۋاقىتتا دا, كۇشەيتىلدى. تاۋلىك بويى باقىلاۋ ەنگىزىلىپ, قۇقىق بۇزۋشىلىقتار مەن وقيعالاردىڭ الدىن الۋعا باعىتتالعان قوسىمشا پروفيلاكتيكالىق شارالار قابىلداندى. اسكەري قىزمەتشىلەر تۋىستارىمەن تۇراقتى بەينەبايلانىسپەن قامتىلدى. سونىمەن قاتار بولىمشە كومانديرلەرى اتا-انالارمەن رەسمي بايلانىس ارنالارى ارقىلى تۇراقتى تۇردە بايلانىستا», دەلىنگەن مينيسترلىك مالىمدەمەسىندە.
مينيسترلىك ساربازداردىڭ ولىمىنەن كەيىن ناقتى كادرلىق جانە تارتىپتىك شەشىمدەر قابىلداعان.
«شىعىس» وڭىرلىك قولباسشىلىعىنىڭ قولباسشىسى, شتاب باستىعى جانە قولباسشىنىڭ تاربيە جانە يدەولوگيالىق جۇمىس جونىندەگى ورىنباسارى تارتىپتىك جاۋاپكەرشىلىككە تارتىلدى. اسكەري قىزمەتشى قازا تاپقان اسكەري ءبولىمنىڭ كومانديرى, ونىڭ ورىنباسارى, سونداي-اق باتالون كومانديرى اتقارىپ وتىرعان لاۋازىمدارىنان بوساتىلدى», دەلىنگەن مينيسترلىك مالىمدەمەسىندە.
ايتا كەتەيىك, 27 قاڭتار كۇنى جامبىل وبلىسىندا قارۋمەن جۇمىس ىستەۋ بارىسىندا مەرزىمدى اسكەري قىزمەتشى وق جاراقاتىنان كوز جۇمدى.
