اتالعان ورتالىقتا 18 جاستان اسقان, پسيحونەۆرولوگيالىق اۋرۋلارى بار, I جانە II توپتاعى مۇگەدەكتىگى بار 400 قىزمەت الۋشىعا ستاتسيونارلىق جاعدايدا ارناۋلى الەۋمەتتىك قىزمەت كورسەتىلەدى. وندا 1964 جانە 1970 جىلدارى سالىنعان ەكى كورپۋس بار. جاڭا قوسىمشا كورپۋستىڭ جالپى اۋماعى 6 281,8 شارشى مەتردى قۇرايدى. نىسان حالىقتى الەۋمەتتىك قورعاۋ سالاسىنداعى ارناۋلى الەۋمەتتىك قىزمەتتەر كورسەتۋ ستاندارتتارىنا تولىق سايكەس كەلەدى. عيماراتتا ەڭبەك شەبەرحاناسى, مەديتسينالىق كابينەتتەر, زاماناۋي اسحانا, شاشتاراز بولمەسى, كىتاپحانا جانە جاتىن بولمەلەرى بار.
جاڭا عيماراتتىڭ اشىلۋ سالتاناتىنا وبلىس اكىمى بەرىك ءۋالي, وبلىس پروكۋرورى ەرلان اباەۆ قاتىستى. ايماق باسشىسى جاڭا نىساننىڭ الەۋمەتتىك ماڭىزىنا توقتالىپ, مەكەمە ەرەكشە كۇتىمدى قاجەت ەتەتىن ازاماتتار ءۇشىن قولايلى ءارى قاۋىپسىز ورتا قالىپتاستىرۋعا باعىتتالعانىن ايتتى.
«مەملەكەت باسشىسى قاسىم-جومارت توقاەۆ «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى تسيفرلىق وزگەرىستەر ارقىلى شەشۋ» اتتى قازاقستان حالقىنا جولداۋىندا «مەملەكەت ءار ازاماتتىڭ لايىقتى تابىس تاۋىپ, ساپالى الەۋمەتتىك قىزمەت الىپ, ەرتەڭگى كۇنىنە سەنىمدى بولۋى ءۇشىن بارىنشا جاعداي جاساي بەرەدى» دەپ الەۋمەتتىك سالانىڭ ماڭىزىن ايرىقشا اتاپ وتكەن بولاتىن. جاڭا عيماراتتى پايدالانۋعا بەرۋ حالىقتى الەۋمەتتىك قورعاۋ سالاسىندا ارناۋلى الەۋمەتتىك قىزمەتتەر كورسەتۋ ستاندارتتارىنا تولىق سايكەس, ءبىر ادامعا 5 شارشى مەترگە دەيىنگى تۇرعىن ءۇي الاڭىمەن قىزمەت الۋشىلاردى قامتاماسىز ەتۋگە مۇمكىندىك بەرەدى. سونىمەن قاتار, قوسىمشا كورپۋس سانيتاريالىق-گيگيەنالىق جانە ەپيدەمياعا قارسى تالاپتاردىڭ ساقتالۋىن قامتاماسىز ەتەدى. سونداي-اق, قىزمەت الۋشىلاردىڭ تۇرۋى ءۇشىن دە, ورتالىق پەرسونالىنىڭ جۇمىسى ءۇشىن دە نەعۇرلىم قولايلى جاعدايلار جاسايدى, مەديتسينالىق جانە الەۋمەتتىك قىزمەت كورسەتۋ ساپاسىن ارتتىرادى. وبلىسىمىزدا قايتارىلعان اكتيۆتەر ەسەبىنەن 25 نىساننىڭ قۇرىلىسى باستالعان بولاتىن. قازىرگى تاڭدا ۇشەۋىنىڭ قۇرىلىسى اياقتالدى. 22 نىساننىڭ قۇرىلىسى جۇرگىزىلىپ جاتىر. جالپى 22 ميلليارد تەڭگە قارجى قاراستىرىلدى. وسى يگى ىسپەن اينالىسقان پروكۋراتۋرا, قۇقىق قورعاۋ ورگاندارى قىزمەتكەرلەرىنە اباي وبلىسى جۇرتشىلىعى اتىنان العىسىمىزدى بىلدىرەمىز», دەدى وبلىس اكىمى.
اكىمدىكتىڭ دەرەگىنشە, نىسان ىسكە قوسىلعاننان كەيىن جاڭا جۇمىس ورىندارى اشىلىپ, وڭىردەگى الەۋمەتتىك قولداۋعا مۇقتاج ازاماتتارعا ساپالى قىزمەت كورسەتىلەدى. قازىرگى تاڭدا وبلىس بويىنشا مۇنداي قىزمەتكە 101 ادام كەزەكتە تۇر. وڭىردە 23 800 مۇگەدەكتىگى بار ادام تۇرادى. 2026 جىلى ايماقتاعى 15 مىڭنان استام مۇگەدەكتىگى بار جانداردى تەحنيكالىق وڭالتۋ قۇرالدارىمەن جانە وڭالتۋ قىزمەتتەرىمەن قامتاماسىز ەتۋ ماقساتىندا 3,3 ملرد تەڭگە ءبولىندى.
سونىمەن قاتار, الەۋمەتتىك جانە كولىك ينفراقۇرىلىمى وبەكتىلەرىنىڭ قولجەتىمدىلىگىن قامتاماسىز ەتۋ ماقساتىندا بيىل 200 نىساندى بەيىمدەۋدەن وتكىزۋ جوسپارلانىپ وتىر. وبلىستا ارناۋلى الەۋمەتتىك قىزمەتتەرمەن 6 مىڭعا جۋىق ادام قامتىلعان.
«مەملەكەت باسشىسىنىڭ تاپسىرماسىن ورىنداۋ ماقساتىندا ءۇرجار بالالارعا ارنالعان ارناۋلى الەۋمەتتىك قىزمەت كورسەتۋ ورتالىعىنىڭ جانىندا سالىنعان قوسىمشا عيماراتتىڭ قۇرىلىسى اياقتالىپ, بيىل پايدالانۋعا بەرىلەدى. سونداي-اق, بورودۋليحا اۋدانىندا جانە سەمەي قالاسىندا ورنالاسقان قارتتار ۇيىنە اعىمداعى جوندەۋ جۇمىستارى جاسالادى. الەۋمەتتىك مەكەمەلەردىڭ قىزمەتىن ارتتىرۋ ماقساتىندا 20 اۆتوكولىكتى (ونىڭ ىشىندە 7 ينۆاتاكسي) ليزينگ ارقىلى ساتىپ الۋ جوسپارلانىپ وتىر», دەيدى وبلىس اكىمىنىڭ ءباسپاسوز قىزمەتى.
