ساراپتاما قورىتىندىسىنا سۇيەنسەك, قىزمەت كورسەتۋ, شىعارماشىلىق, الەۋمەتتىك باعىتتاعى ماماندىقتار جونىندەگى كورسەتكىش ورتاشا دەڭگەيدە ساقتالعان. ال مەديتسينا, قاۋىپسىزدىك, اكىمشىلىك سالالارىنداعى كەيبىر ماماندىقتارعا ەڭبەك نارىعىندا سۇرانىس باسەڭدەگەن. وسىعان وراي, 2026 جىلعا ارنالعان مەملەكەتتىك ءبىلىم بەرۋ تاپسىرىسىن ءبولۋ كەزىندە سۇرانىسى تومەن ماماندىقتار قىسقارتىلىپ, گرانتتاردى ينۆەستيتسيالىق جوبالار مەن ءوڭىردىڭ ناقتى كادرلىق قاجەتتىلىگىنە تىكەلەي باعىتتاۋ كوزدەلىپ وتىر.
جالپى, وڭىردە بىلتىرعى «جۇمىسشى ماماندىقتار جىلى» اياسىندا تەحنيكالىق, كاسىپتىك ءبىلىم بەرۋ جۇيەسىن جەتىلدىرۋ باعىتىندا جۇيەلى جۇمىستار جالعاسىپ جاتىر. وبلىستىق ءبىلىم باسقارماسى باسشىسىنىڭ مىندەتىن اتقارۋشى عالىمجان ورىنوۆتىڭ مالىمەتىنشە, بۇگىندە ايماقتا 50 كوللەدج (28-ءى – مەملەكەتتىك, 22-ءسى – جەكەمەنشىك) قىزمەت كورسەتەدى. بۇل وقۋ ورىندارىندا 84 ماماندىق بويىنشا ءبىلىم الىپ جاتقان 46 747 ستۋدەنتتىڭ 79%-ى مەملەكەتتىك تاپسىرىس نەگىزىندە وقيدى.
– 2024–2025 وقۋ جىلىندا وبلىس كوللەدجدەرىن تامامداعان 12 619 تۇلەكتىڭ 81%-ى جۇمىسقا ورنالاستى. بۇل – الدىڭعى جىلمەن سالىستىرعاندا 5%-عا جوعارى كورسەتكىش. بيىلعى وقۋ جىلىنا بولىنگەن 15 500 مەملەكەتتىك گرانتتىڭ 57%-ى ناق وسى جۇمىسشى ماماندىقتارىنا باعىتتالىپ وتىر, – دەيدى ع.ورىنوۆ.
سونداي-اق وڭىردە دۋالدى وقىتۋ جۇيەسى قارقىندى دامىپ كەلەدى. وبلىس اۋماعىنداعى 692 كاسىپورىنمەن جاسالعان كەلىسىمدەر شەڭبەرىندە 36 كوللەدجدە 11 223 ستۋدەنت وندىرىسپەن قاتار ءبىلىم الىپ شىعادى. حالىقارالىق ارىپتەستىك تە جولعا قويىلعان: 12 كوللەدج شەتەلدىك وقۋ ورىندارىمەن 20 مەموراندۋمعا وتىرىپ, قوس ديپلوم بەرۋ, اكادەميالىق ۇتقىرلىق جانە پەداگوگتەردىڭ بىلىكتىلىگىن ارتتىرۋ جوبالارىن جۇزەگە اسىرىپ جاتىر. بىلتىر ءۇش كوللەدج حالىقارالىق اككرەديتتەۋدەن وتكەن. بيىلعى جوسپاردا ستۋدەنتتەردىڭ ساباققا قاتىسۋىن تسيفرلىق فورماتتا باقىلاۋ, مەملەكەتتىك تاپسىرىستى ينۆەستيتسيالىق جوبالارمەن ۇشتاستىرۋ, دۋالدى وقىتۋدى ءىرى ينۆەستورلارمەن بىرلەسە كەڭەيتۋ باسىمدىققا يە بولادى.
جۇمىسپەن قامتۋ سالاسىنداعى كورسەتكىشتەرگە توقتالساق, بىلتىر بەكىتىلگەن «وڭىرلىك جۇمىسپەن قامتۋ كارتاسى» اياسىندا اۋقىمدى شارالار اتقارىلدى. وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى مەكەنحان قوزىحان ۇلىنىڭ ايتۋىنشا, جوسپارلانعان 130 769 جۇمىس ورنىنىڭ ورنىنا, جىل قورىتىندىسىندا 147 719 ازامات جۇمىسپەن قامتىلىپ, مەجە ارتىعىمەن ورىندالعان. ونىڭ ىشىندە 100 046-سى – تۇراقتى, 47 673-ءى – ۋاقىتشا جۇمىس ورىندارى. ناتيجەسىندە, جۇمىسسىزدىق دەڭگەيى 4,6%-عا دەيىن تومەندەدى.
ەڭبەكپەن قامتۋ شارالارى بەس نەگىزگى باعىت بويىنشا جۇزەگە اسىرىلدى. ۇلتتىق, جەكە ينۆەستيتسيالىق جوبالار اياسىندا 4 074 جۇمىس ورنى قۇرىلسا, «10 مىڭ تۇرعىنعا 100 جاڭا جۇمىس ورنى» باستاماسىمەن 22 595 ادام جۇمىسقا كىرىسكەن. سۋبسيديالاناتىن جۇمىس ورىندارى, بوس جۇمىس ورىندارىنا ورنالاستىرۋ, گرانت بەرۋ بويىنشا دا ءتيىستى ينديكاتورلار تولىق ورىندالدى.
2026 جىلعا ارنالعان «وڭىرلىك جۇمىسپەن قامتۋ كارتاسى» شەڭبەرىندە 74 516 ادامدى (54 481 – تۇراقتى, 20 035 – ۋاقىتشا) جۇمىسپەن قامتۋ جوسپارلانىپ وتىر. ونىڭ ىشىندە 40 588 ازاماتتى بوس جۇمىس ورىندارىنا جولداۋ, ۇلتتىق جوبالار ەسەبىنەن 2 472 ادامدى جۇمىسقا تارتۋ كوزدەلگەن. سونداي-اق «10 مىڭ تۇرعىنعا 100 جاڭا جۇمىس ورنى» جوباسى شەڭبەرىندە 11 476 تۇرعىندى, سۋبسيديالاناتىن جۇمىس ورىندارى ارقىلى 18 530 ادامدى ەڭبەككە باۋلۋ, 1 450 ادامعا گرانت بەرۋ مەجەلەنگەن.
تۇركىستان وبلىسى
