ادامي بولمىسى تازا, پەيىلى كەڭ وسى ازاماتپەن تانىستىعىم بۇدان شيرەك عاسىرداي بۇرىن استانادا, پارلامەنتتە قىزمەتتەس بولعان كەزدەن باستالعان ەدى. اعالى-ىنىلىك, ارىپتەستىك قارىم-قاتىناسىمىز دا وسى جىلدار ۇلەسىندە.
سول شاقتا مەن سەناتتىڭ رەداكتسيالىق-باسپا ءبولىمىن باسقارعانمىن, ال مۇساحان ايتباي ۇلى وسىندا باسپا سەكتورىنىڭ مەڭگەرۋشىسى ەدى. قولدانىسقا ەنگىزىلەتىن زاڭ ماتىندەرىن باسىپ شىعارۋدىڭ قيىن دا كۇردەلى جۇمىسىن مىندەتىنە العان ول مۇلتىكسىز قىزمەت ىستەي ءبىلدى. بۇعان قوسا سول رەسمي ماتىندەردى قازاقشالاۋدىڭ, رەداكتسيالاۋدىڭ تاجىريبەسىن شەبەر مەڭگەردى. پارلامەنت دەپۋتاتتارىنىڭ پلەنارلىق وتىرىستارىندا ىلەسپە اۋدارما جاساۋدىڭ دا تەتىكتەرىن يگەرىپ, ءبىر سوزبەن ايتقاندا, جوعارى زاڭ شىعارۋ مەكتەبىنىڭ بىلىكتى مامانى بولدى. ارىپتەستەرىنىڭ سەنىمى مەن قۇرمەتىنە بولەندى. بۇل ەكىنىڭ ءبىرىنىڭ قولىنان كەلە بەرمەيتىن, مەملەكەتتىك دەڭگەيدە ءساتتى اتقارىلعان قىزمەت-ءتىن. ءبارىمىز مۇساحاننىڭ كاسىبي تۇرعىداعى ىسكەرلىگىنە كۋا بولدىق.
سىر بويىندا قاراپايىم تەمىرجولشى وتباسىندا دۇنيەگە كەلىپ, ءوسىپ-ءونىپ, اۋىل مەكتەبىنەن ءبىلىم العان بويشاڭ قارا دومالاق بالا اتا-اناسىنىڭ تاعىلىمدى تاربيەسىنەن باياندى بولاشاعىنا ءنار الدى. وبلىس ورتالىعىنداعى پەدينستيتۋتتى ءتامامداپ, ۇستازدىق قىزمەتتى تۋعان اۋىلى قارماقشىداعى مەكتەپتەن باستايدى.
تاعدىر دا – قاتال سىنشى. بۇل سىناقتىڭ قيىن ساعاتتارى دا ادام ءومىرىن اينالىپ وتە المايدى. مۇساحان وتباسىنىڭ بەرەكەسى, ۇل-قىزدارىنىڭ اناسى, جۇرەگى جايدارى, جانى جايساڭ جارى قالدىگۇلدەن كەشەگى ەل باسىنا تۇسكەن ىندەت كەسىرىنەن ايىرىلىپ قالدى. وزىنە جۇبانىشتى قوساعى ماپەلەگەن بالالارىنان تاپتى, نەمەرەلەرىنە مەيىرلەندى. ەڭسەسىن تۇسىرمەدى, اراعا ۋاقىت سالىپ التىن ۇيا ءۇيىنىڭ شاڭىراعىنا تىلەۋلەس بولىپ تۋعان ءوڭىرىنىڭ قىزى ماناتتاي جاناشىرى كەلدى. ءبارى دە ۇلت داستۇرىنە ساي سىيلاستىق نەگىزىندە ءوربىدى. ءومىردىڭ تاعى دا ءبىر جارقىن ساتتەرى تۋدى.
مۇساحان ايتباي ۇلىنىڭ ءبىر ەرەكشەلىگى – ول ءبىلىم سالاسىن بۇگە-شىگەسىنە دەيىن بىلەدى. اۋداندا, وبلىستا جاۋاپتى قىزمەتتەر اتقارعان. ەڭبەكپەن جەتىلە ءجۇرىپ, ەكونوميكالىق تا, زاڭگەرلىك تە جوعارى ءبىلىم العان. وسىنىڭ ءبارى پارلامەنتتەگى قىزمەتىنە وڭ اسەر ەتتى. بىرتوعا, تىندىرىمدى, مۇقيات, ەڭ باستىسى – جاۋاپتى ءارى بىلىكتى. سەناتتا قانشاما مىقتى, ءدۇمدى قايراتكەرلەر بولدى. سولارمەن كاسىبي دەڭگەيدە ءتىل تابىستى. بىلىكتى سەناتورلاردىڭ جاقسى ءىنىسى, پىكىرلەسى بولا ءبىلدى. جاستارعا ءوز دەڭگەيىندە تالىمگەر, ۇستاز اتاندى. قىزمەت پەن وتباسىن تەڭ ۇستاپ, سەنىم ۇدەسىنەن شىقتى.
ەكس-سەناتور, عالىم باقبەرگەن دوسمانبەتوۆ مۇساحاننىڭ قىزىلوردا وبلىسى مەن قالاسىنداعى ەسەلى ەڭبەگىن اۋزىنان تاستاماي ايتىپ جۇرەتىن. مىسالى, مارقۇم بەردىبەك ساپارباەۆ اكىم بولىپ تۇرعان كەزدە ءبىلىم جۇيەسىن جەتىلدىرەتىن بىرنەشە جوباسىن قولداعان كورىنەدى. قايراتكەر مارقۇم نۇرلان بالعىنباەۆ پرەمەر-مينيستر قىزمەتىندە ءجۇرىپ قىزىلورداعا ايالداعاندا وسى جوبالارعا وڭ باعا بەرىپتى. ارينە, مۇنداي جۇمىس, باستاما ۇمىتىلمايدى.
ايتقاندايىن, جاۋاپتى دا تىنىمسىز قىزمەتىنىڭ اراسىنان عىلىمعا ۋاقىت تاۋىپ, ءبىلىمدى ۇيىمداستىرۋ ماسەلەسىن تاقىرىپ ەتىپ, ساياسي عىلىمدار كانديداتى دارەجەسىن العانى دا بار. كەزىندە جۇرتقا كەڭىنەن تانىس «قازاقستان مەكتەبى» جۋرنالىنا قاداۋ-قاداۋ ماقالا جاريالاعانىن ارىپتەستەرى ءجيى ايتىپ وتىرادى. مۇندا مەكتەپ ديرەكتورىنىڭ, اۋداندىق وقۋ ءبولىمى مەڭگەرۋشىسىنىڭ, قالالىق ءبىلىم باسقارما باسشىسىنىڭ تاجىريبەسى تۇنىپ تۇر. سەناتتىڭ جۇمىسى اۋىر. مۇندا شىعارماشىلىققا كوپ قول تيە بەرمەسە كەرەك.
مەرەيلى دە مارتەبەلى جاسىنىڭ مەرەكەلى مەزەتتەرىن باستان كەشىرىپ جاتقان مۇساحان ايتباي ۇلىنا اعالىق كوڭىلدەن ءومىردىڭ نۇرلى كۇندەرىن ۇزاعىنان كورۋدى جازسىن دەگەن تىلەك ايتامىن.
ءمادي ايىمبەتوۆ,
قازاقستاننىڭ ەڭبەك سىڭىرگەن قايراتكەرى, جازۋشى
