الپىدەگى اپاتتا وپات بولعاندار سانى 154-كە جەتتى

استانا. 24 ناۋرىز. گەرمانيانىڭ Germanwings اۆياكومپانياسىنىڭ فرانتسۋزدىڭ ءالپى تاۋلارىنا سوعىپ, اپاتقا ۇشىراعان ا320 جولاۋشىلار ۇشاعىنىڭ بورتىندا قازا تاپقان ادامدار سانى 154-كە جەتتى. بۇل تۋرالى گەرمانيا ۇشۋ قاۋىپسىزدىگى قىزمەتى وكىلىنىڭ دەرەگىنە سۇيەنگەن «ۆەستي.Ru» حابارلادى. «ءبىز بورتتا 154 ادام وتىرعان, ولاردىڭ 6-ى ەكيپاج مۇشەلەرى بولعان دەپ شامالايمىز», - دەپ انىقتاي ءوتتى ول Deutsche Welle تەلەراديوكومپانياسىنىڭ ەفيرىنەن. بۇعان قوسا, قازا تاپقانداردىڭ 2-ءى ءسابي, 16-سى مەكتەپ وقۋشىلارى ەكەنى دە ايتىلىپ جاتىر. «بۇدان بۇرىن لاينەردىڭ بورتىندا 148 ادام بولعانى, ولاردىڭ 142-ءسى جولاۋشى, ال 6-ى ەكيپاج مۇشەلەرى ەكەنىن حابارلانعان بولاتىن», - دەپ باياندادى تاسس. بارسەلونا – ديۋسسەلدورف باعىتىندا ۇشىپ كەلە جاتقان ۇشاق كاتالونيا ورتالىعىنان شىققان سوڭ ءبىر ساعات وتكەن كەزدە جوعارى پروۆانس الپىسىندەگى بىلايشا جەتۋى قيىن ترۋا-ەۆەۆشە تاۋلى جوتاسىنىڭ دين-لە-بەن دەگەن جەرگە جاقىن ماڭىندا اپاتقا ۇشىرادى. A320 اەروبۋسىنىڭ فرانتسۋز كەڭىستىگىنە كىرگەن بويدا بىردەن العان بيىكتىگىنەن تومەندەي باستاعانى بەرىلگەن اپات دابىلى ارقىلى بەلگىلى بولىپ وتىر. بىراق اپاتقا ناقتىلى نەنىڭ سەبەپ بولعانى ازىرگە بەلگىسىز. «ۇشاق رادارلار ەكرانىنان بارسەلونەت قالاسى اۋدانىنا كىرگەننەن كەيىن جوعالىپ كەتكەن», دەپ حابارلايدى «ينتەرفاكس». بىراق ونىڭ بورتىندا ناقتىلى نەنىڭ ىستەن شىققانى بەلگىسىز. لاينەر بارۋعا قيىن اۋماققا قۇلاعان. جەرگىلىكتى تۇرعىنداردىڭ ايتۋلارىنشا, ەڭ جاقىن جولدان ۇشاقتىڭ قاڭقاسى جاتقان جەرگە دەيىن جەتۋ ءۇشىن كەمىندە ءۇش ساعات ۋاقىت كەرەك بولادى. Germanwings كامپانياسىنا (Lufthansa–نىڭ ەنشىلەس كاسىپورنى) قاراستى اۋە كەمەسى بارسەلونادان ديۋسسەلدورفقا ۇشىپ شىققان. فوانتسيا سىرتقى ىستەر مينيسترلىگىنىڭ مالىمەتى بويىنشا, قۇلاعان ۇشاق 1991 جىلى شىققان, ول Germanwings اۆياپاركىندەگى ەڭ كونە ۇشاقتاردىڭ ءبىرى بولعان. الدىن الا مالىمەتكە سايكەس, ا320 بورتىندا نەگىزىنەن گەرمانيانىڭ ازاماتتارى وتىرعان. وندا سونداي-اق 45 يسپان ازاماتى بولۋى مۇمكىن. بۇل اقپاردى يسپانيانىڭ ۆيتسە-پرەمەرى سورايا ساەنس دە سانتاماريا راستاپ بەردى. مۇرات ايتقوجا.