فوتو: Informburo.kz
«كونستيتۋتسيادا ءومىر ءسۇرۋ قۇقىعى بارىنشا ابسوليۋتتىك دارەجەدە بولۋى قاجەت, ودان ەشكىم ءوز ەركىمەن باس تارتپايتىنىن, ءتىپتى ەڭ اۋىر قىلمىس ءۇشىن دە, مەملەكەت تاراپىنان دا الىنبايتىنىن كەپىلدەندىرۋ قاجەت. بۇل – ادام مەن ونىڭ ءومىرى شىن مانىندە ەلدىڭ باستى قۇندىلىعى ەكەنىن, باسقا كەز كەلگەن مۇددەلەردەن ماڭىزدى ەكەنىن بىلدىرەتىن بەرىك قاعيدا», دەدى ومبۋدسمەن.
نەگىزگى ۇسىنىستار قاتارىندا ومبۋدسمەن بارلىق نەگىزگى قۇقىقتار مەن بوستاندىقتاردى كونستيتۋتسيانىڭ ادام قۇقىقتارىن قورعاۋعا ارنالعان ءبىر بولىمىنە جيناقتاۋ قاجەتتىگىن, بۇل بىرقاتار شەتەلدىك تاجىريبەلەرگە ۇقساس ەكەنىن ايتتى.
ومبۋدسمەن كونستيتۋتسيادا ءوزى مەن جاقىندارىنا قارسى كۋالىك بەرمەۋ جانە ءوز كىناسىزدىگىن دالەلدەمەۋ قۇقىعىن بەكىتۋ قاجەتتىگىن ايتتى. وسىعان ۇقساس قورعاۋ قۇقىعى ءدىني قىزمەتكەرلەرگە دە قاتىستى بولۋى كەرەك, اسىرەسە ءدىني راسىمدەر كەزىندە الىنعان اقپارات تۋرلى ءسوز بولىپ وتىر.
سونداي-اق, نەگىزگى قۇقىقتار بولىمىندە باستى نازارعا «كىناسىزدىك پرەزۋمپتسياسىن» قويۋ قاجەتتىگى ايتىلدى.
«كونستيتۋتسيادا وزىنە, جاقىندارىنا قارسى كۋالىك بەرمەۋ جانە ءوز كىناسىزدىگىن دالەلدەۋدەن باس تارتۋ قۇقىعى تايعا تاڭبا باسقانداي جازىلۋى قاجەت. ادام وقيعا ورنىندا ۇستالسا دا, كىناسىن مويىنداپ ارىز جازسا دا, قوعام الدىندا باستاپقىدا «جازىقسىز» دەپ سانالۋى كەرەك. ياعني, سوت ونى ايىپتى دەپ تانىعانشا», دەپ تۇيىندەدى ا.لاستاەۆ.
بۇدان بولەك, ومبۋدسمەن ادىلدىك جانە جازانىڭ سايكەستىگى بويىنشا حالىقارالىق قاعيداتتاردى كونستيتۋتسيادا تىكەلەي بەكىتۋ ۇسىنىسىن ايتتى. ونداعى نەگىزگى ەلەمەنت – ءبىر ءىس بويىنشا قايتا جازالاۋعا جول بەرمەۋ.
ادامنىڭ نەگىزگى قۇقىقتارى مەن بوستاندىقتارىمەن تىكەلەي بايلانىستى تاعى ءبىر ماڭىزدى ماسەلە – ازاماتتاردىڭ ءوز قۇقىقتارىنىڭ تۇراقتىلىعىنا سەنىمدى بولۋى.
ء«بىر كەزدەرى زاڭدى بولعان, كەيىن تىيىم سالىنعان نارسە ءۇشىن ادامدى جازالاۋعا بولمايدى. سەبەبى زاڭدار «وتكەن ۋاقىتپەن» وزگەرەتىن بولسا, ەشكىم ءوز ءومىرى مەن جۇمىسىن سەنىمدى جوسپارلاي المايدى», دەدى ادام قۇقىقتارى جونىندەگى ۋاكىل.
سول سياقتى بۇل قاعيدا ءوز ويلارىن ەركىن ايتۋ جانە اقپارات تاراتۋ قۇقىعى سەكىلدى باسقا دا نەگىزگى كەپىلدىكتەرىنە قاتىستى. ارتۋر لاستاەۆتىڭ ايتۋىنشا, ءسوز بوستاندىعى باسقا ازاماتتاردىڭ ار-نامىسىنا جانە قادىر-قاسيەتىنە نۇقسان كەلتىرمەۋى قاجەت.
