سۋرەتتى تۇسىرگەندەر – ا.دۇيسەنباەۆ, ە.ۇكىباەۆ
دونالد ترامپ بەيبىتشىلىك كەڭەسىن گازا سەكتورىن قالپىنا كەلتىرۋدى ۇيلەستىرۋمەن اينالىساتىن ۇيىم رەتىندە قۇردى. بۇعان دەيىن اقش-تىڭ تاياۋ شىعىس جونىندەگى ارنايى وكىلى ستيۆ ۋيتكوفف وڭىردە اتىستى توقتاتۋ رەجىمىنىڭ ەكىنشى كەزەڭى باستالعانىن مالىمدەگەن ەدى. وسىعان وراي اقش پرەزيدەنتى شۆەيتساريانىڭ داۆوس قالاسىنا الپىسقا جۋىق ەلدىڭ باسشىلارىن شاقىرىپ, دۇنيەجۇزىلىك ەكونوميكالىق فورۋم اياسىندا بەيبىتشىلىك كەڭەسىنىڭ العاشقى وتىرىسىن وتكىزدى. وندا بەيبىتشىلىك كەڭەسىنىڭ جارعىسىنا اقش-تى قوسا العاندا, 19 ەلدىڭ كوشباسشىلارى, سونىڭ ىشىندە قازاقستان, ازەربايجان, ارمەنيا, وزبەكستان, پاكىستان, يندونەزيا مەن ماجارستان باسشىلارى بار. Reuters اگەنتتىگىنىڭ حابارلاۋىنشا, 35 ەل ترامپتىڭ باستاماسىنا قوسىلۋعا كەلىسكەن.
«بەيبىتشىلىك كەڭەسى ەندى رەسمي تۇردە قۇرىلعان حالىقارالىق ۇيىم», دەپ مالىمدەدى اق ءۇيدىڭ ءباسپاسوز حاتشىسى كەرولاين لەۆيتت. ال د.ترامپ بەيبىتشىلىك كەڭەسى بۇۇ-مەن ىنتىماقتاساتىنىن ايتتى. الايدا اقش كوشباسشىسى بەيبىتشىلىك كەڭەسى جاھاندىق ماسەلەلەردى شەشۋدە بۇۇ-نى الماستىرۋعا تىرىسپايتىنىن اتاپ
ءوتتى.
ينفوگرافيكانى جاساعان – امانگەلدى قياس, «EQ»
Deutsche Welle اقپارات اگەنتتىگىنىڭ حابارلاۋىنشا, 1 ملرد دوللار جارنا تولەگەن ەلدەر بەيبىتشىلىك كەڭەسىنە تۇراقتى مۇشە بولا الادى. ەلىمىز دە داۆوستاعى دۇنيەجۇزىلىك ەكونوميكالىق فورۋمىندا بەيبىتشىلىك كەڭەسىنىڭ قۇرامىنا ەندى. الايدا جارنا تولەگەن جوق. اقوردانىڭ ءباسپاسوز قىزمەتى حابارلاعانداي 1 ملرد دوللار كولەمىندەگى جارنا مۇشەلىكتىڭ شارتى ەمەس, بۇل ءاربىر قاتىسۋشىنىڭ قۇقىعى.
«بەيبىتشىلىك كەڭەسكە كىرۋ ءۇشىن تەك مەملەكەتتىڭ تاۋەلسىز شەشىمى قاجەت. كىرگەن ساتتەن باستاپ مەملەكەتتىڭ كەڭەستە بولۋ مەرزىمى ءۇش جىلدى قۇرايدى. جارعىدا ايتىلعان 1 ملرد دوللار كولەمىندەگى ەرىكتى جارنا مۇشەلىكتىڭ شارتى ەمەس. بۇل ءاربىر قاتىسۋشىنىڭ قۇقىعى. قازاقستان بەيبىتشىلىك كەڭەسىنە قانداي دا ءبىر قارجىلىق جارنا ەنگىزبەستەن كىردى, بۇل جارعىنىڭ ەرەجەلەرىنە تولىق سايكەس كەلەدى», دەدى اقوردانىڭ ءباسپاسوز قىزمەتى. مالىمەتكە سۇيەنسەك, ەگەر 1 ملرد دوللار جارنا ءبىرىنشى جىل ىشىندە تولەنسە, مەملەكەت ءوزىنىڭ كەڭەستەگى قىزمەتىن بەلگىلەنگەن ءۇش جىلدىق مەرزىمنەن تىس ۇزارتۋعا مۇمكىندىك الادى.
بەيبىتشىلىك جارعىسىنىڭ ەرەجەسىنە سايكەس, اقش پرەزيدەنتى بەيبىتشىلىك كەڭەسىنىڭ العاشقى توراعاسى بولىپ سايلاندى. ول كەڭەسكە قاتىساتىن ەلدەرگە شاقىرتۋ جىبەرۋ تۋرالى شەشىمدى جەكە ءوزى قابىلداۋعا قۇقىلى.
قازىر گازا سەكتورىنا كومەك اۋاداي قاجەت ەكەنى ايتپاسا دا تۇسىنىكتى. ونداعى اسكەري ارەكەتتەردىڭ سالدارىنان ماڭىزدى ينفراقۇرىلىمدار قيراعان. بۇۇ-نىڭ مالىمەتىنە سۇيەنسەك, 60 000-نان استام عيمارات ۇيىندىگە اينالعان. سۋ جۇيەلەرىنىڭ جەتپىس پايىزى جارامسىز بولىپ قالعان. وسى ورايدا بەيبىتشىلىك كەڭەسى تۇرعىندارعا جەدەل گۋمانيتارلىق كومەك كورسەتۋگە باسىمدىق بەرىپ وتىر. بۇۇ ەسەپتەۋىنشە, ايماقتى تولىق قالپىنا كەلتىرۋگە كەم دەگەندە 70 ملرد دوللار قاراجات قاجەت. يزرايل بۇعان دەيىن قيراندىلاردى تازارتۋعا قارجى تولەۋگە دايىن ەكەنىن مالىمدەگەن ەدى. الايدا ازىرگە ەش ارەكەت جاسامادى. اقپارات كوزدەرىنە سۇيەنسەك, كەڭەس جارناسى قالپىنا كەلتىرۋ جۇمىسىنا جۇمسالادى.
