سۋرەت: baq.kz/
مەملەكەت باسشىسى حالىقتىڭ كوكەيىندە جۇرگەن ەڭ وزەكتى ماسەلەلەرگە جاۋاپ بەرىپ قانا قويماي, ەل دامۋىنىڭ باسىم باعىتتارىن – قوعامدىق-ساياسي جاڭعىرۋ, ەكونوميكانى ءارتاراپتاندىرۋ, الەۋمەتتىك ادىلدىك پەن زاڭ ۇستەمدىگىن نىعايتۋ ماسەلەلەرىنە جان-جاقتى توقتالدى. اسىرەسە مەملەكەتتىك باسقارۋ جۇيەسىندە بولاتىن اۋقىمدى ترانسفورماتسيا تۋرالى تەرەڭنەن تولعادى.
قاسىم-جومارت توقاەۆ پرەزيدەنتتىك لاۋازىمعا كىرىسكەن ساتتەن بەرى اۋقىمدى رەفورمالاردى قولعا الدى. ونىڭ جەمىسىن كورىپ تە كەلەمىز. بۇل باستامالاردىڭ وزەگىندە ادىلدىك يدەياسى جاتىر.
ءبىزدىڭ تۇپكى ماقساتىمىز – ادىلەتتى, وركەنيەتتى, مىقتى ءارى قاۋىپسىز مەملەكەت قۇرۋ. قىزىلوردادا كوتەرىلگەن باستامالار – وسى ۇلى مۇرات جولىنداعى ءىرى, بەتبۇرىستى قادامداردىڭ جالعاسى. نەگىزگى ەكپىن بيلىك ينستيتۋتتارى اراسىنداعى تەپە-تەڭدىكتى ساقتاۋعا بەرىلەدى.
مەملەكەت باسشىسىنىڭ «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» فورمۋلاسىن ودان ءارى كۇشەيتۋگە ەرەكشە ءمان بەرىلىپ وتىر. ءبىر پالاتالى پارلامەنت – سونىڭ ايقىن دالەلى. ال ونىڭ بولاشاق اتاۋىن «قۇرىلتاي» دەپ ۇسىنۋى ۇلتتىق بولمىسىمىز بەن ۇلتتىق كودىمىزدى قايتا جاڭعىرتۋمەن تەڭ. عاسىرلار بويى دالا دەموكراتياسىنىڭ وزەگى بولعان قۇرىلتايدىڭ قايتا تۇلەۋى دەپ سانايمىن.
الدا كوپ جۇمىس كۇتىپ تۇر. اتا زاڭىمىزعا ۇلكەن وزگەرىستەر ەنگىزىپ, ىرگەلى رەفورمالاردى ىسكە اسىرامىز. بۇل – تاريحي كەزەڭنىڭ باستاۋى. دەپۋتات رەتىندە ءبىز وسى جۇمىستىڭ الدىڭعى شەبىندە جۇرۋگە مىندەتتىمىز. ەلدىگىمىزدى نىعايتۋعا, ەگەمەندىگىمىزدى تۇعىرلى ەتۋگە باعىتتالعان تاريحي رەفورمالاردىڭ يگىلىگىن بارشا جۇرتىمىز, ۇرپاعىمىز كورە بەرسىن.
داۋلەت تۇرلىحانوۆ,
ءماجىلىس دەپۋتاتى
