قازاقستاننىڭ ەاەو-داعى باسىم باعىتتارى تۋرالى مەملەكەت باسشىسى قاسىم-جومارت توقاەۆ 2026 جىلدىڭ قارساڭىندا وداققا مۇشە مەملەكەتتەر باسشىلارىنا جولداعان ۇندەۋىندە مالىمدەدى.
نەگىزگى باسىمدىقتاردىڭ الدىڭعى قاتارىندا ەكونوميكانى تسيفرلاندىرۋ تۇر. قازاقستان ءوزىن تسيفرلى مەملەكەت رەتىندە قالىپتاستىرۋدى ماقسات ەتىپ وتىر جانە جاساندى ينتەللەكت ەكوجۇيەلەرىن ەاەو-عا مۇشە وزگە ەلدەردە دە دامىتۋعا اتسالىسپاق. وسىعان بايلانىستى مەملەكەت باسشىسى رەسەي, بەلارۋس, قىرعىزستان جانە ارمەنياعا مامىر ايىندا ەاەو شەڭبەرىندە جاساندى ينتەللەكتىنى جاۋاپتى دامىتۋ تۋرالى بىرلەسكەن مالىمدەمەگە قول قويۋدى ۇسىندى.
تاعى ءبىر ماڭىزدى باعىت – كەدەرگىسىز ساۋدا قاعيداتىن ىسكە اسىرۋ. قازاقستان تاراپى جۇك كولىكتەرىنىڭ شەكارادا ۇزاق تۇرىپ قالۋىن, ارتىق بيۋروكراتيالىق راسىمدەردى جويۋدى كوزدەيدى. ماقسات – كەدەندىك جانە باقىلاۋ شارالارىنىڭ مەملەكەتتەر اراسىندا قىسىم قۇرالىنا اينالۋىنا جول بەرمەۋ. بۇل ۇدەرىستى باقىلاۋ ءۇشىن دە جاساندى ينتەللەكت مۇمكىندىكتەرىن پايدالانۋ ۇسىنىلىپ وتىر.
ەۋرازيالىق ەكونوميكالىق وداق: جاڭا مىندەتتەر مەن مۇمكىندىكتەر
سونىمەن قاتار قازاقستاننىڭ توراعالىعى كەزىندە ەاەو-نىڭ سىرتقى الەممەن ەكونوميكالىق بايلانىسىن كەڭەيتۋگە ەرەكشە نازار اۋدارىلادى. يندونەزيا, موڭعوليا جانە بىرىككەن اراب امىرلىكتەرىمەن ەركىن ساۋدا جانە ارىپتەستىك تۋرالى جاڭا كەلىسىمدەرگە قول قويىلۋى وسى باعىتتاعى العاشقى ناتيجەلەردىڭ ءبىرى سانالادى. الداعى ۋاقىتتا اراب ەلدەرىمەن, وڭتۇستىك-شىعىس ازيا جانە افريكا مەملەكەتتەرىمەن ىنتىماقتاستىقتى تەرەڭدەتۋ جوسپارلانىپ وتىر.
وسىلايشا, قازاقستاننىڭ ەاەو-داعى توراعالىعى تسيفرلاندىرۋعا, ەركىن ساۋداعا جانە جاھاندىق ەكونوميكالىق بايلانىستاردى كەڭەيتۋگە نەگىزدەلگەن جاڭا دامۋ باعىتىن قالىپتاستىرۋدى كوزدەيدى.
