جوبا باستاماشىسى – ەلوردالىق تەاتردىڭ سوليست-كونتسەرتمەيستەرى, قازاقستاننىڭ ەڭبەك سىڭىرگەن قايراتكەرى ايسۇلۋ بايكەنوۆا. ونىڭ ايتۋىنشا, بۇل مادەني ءىس-شارانىڭ ماقساتى – بەلگىلى ونەرپازدار مەن جاس تالانتتار اراسىندا التىن كوپىر بولىپ, ايتۋلى شەبەرلەردىڭ تاجىريبەسىن جاستارعا ءسىڭىرۋ.
– كاسىبي مۋزىكانتتار مەن جاس ورىنداۋشىلاردىڭ بىرلەسكەن كونتسەرتىن وتكىزۋ كوپتەن ويىمدا ءجۇردى. ويتكەنى بۇل – ونەردىڭ دامۋى ءۇشىن اسا ماڭىزدى. ادەتتە, ونەر مايتالماندارىنىڭ جەكە كونتسەرتى مەن شىعارماشىلىق جولىن ەندى باستاعان جاستاردىڭ كەشتەرى بولەك ءوتىپ جاتادى. ەندى ءبىز ولاردىڭ باسىن ءبىر ساحنادا توعىستىرىپ وتىرمىز. بۇل جاستاردىڭ ونەرىنە تىڭ سەرپىن بەرەدى دەپ ويلايمىز, – دەيدى ا.بايكەنوۆا.
كەش باعدارلاماسىندا مۋزىكانىڭ كوپتەگەن جانرى قامتىلعان. كونتسەرتتە جوبا اۆتورىمەن بىرگە ونىڭ ارىپتەستەرى – وپەرا ءسوليسى, قازاقستاننىڭ ەڭبەك سىڭىرگەن ءارتىسى جاننات باقتاي, سكريپكاشى ەلميرا جارمۇحامەدوۆا, ۆيولونچەلشى كۋرۆانجان احاتوۆ, فاگوتشىلار اسەت نەلدىباەۆ, شەرنياز نازاروۆ, گوبويشى, قازاقستاننىڭ ەڭبەك سىڭىرگەن قايراتكەرى داميليا ماحپيروۆا, ارفاشى ليۋبوۆ تكاچەنكو ونەر كورسەتتى. سونداي-اق قازاق ۇلتتىق ونەر ۋنيۆەرسيتەتىنىڭ ستۋدەنتتەرى مەن ولاردىڭ تالىمگەرلەرى دە ساحناعا شىقتى. ۆوكاليست ايگۇل ازاتوۆا, سكريپكاشىلار دانيا ءابىلحانوۆا, ەلدانا كوپباي, داليدا يبراگيم, ۆيولونچەلشى ديارجان احاتوۆ, گوبويشى جاڭگىر قوسىمباەۆ, فلەيتاشى, قازاقستاننىڭ ەڭبەك سىڭىرگەن قايراتكەرى جىبەك ساپارعاليەۆا, ارفاشىلار ارۋجان سوۆەتوۆا مەن نازيا ماناباەۆانىڭ ونەرى دە جۇرتشىلىقتى جىلى اسەرگە بولەدى.
كونتسەرت بارىسىندا شەتەلدىك جانە وتاندىق كومپوزيتورلاردىڭ بىرەگەي مۋزىكالارى سالتانات قۇردى. دارىندى جاستار ونەرلەرىن مۋزىكانىڭ ءتۇرلى جانرىندا ايشىقتى كورسەتە الدى. ايتالىق, دانيا ءابىلحانوۆا كورنەكتى كومپوزيتور عازيزا جۇبانوۆانىڭ ۆيرتۋوز ءارى تەحنيكالىق جاعىنان كۇردەلى شىعارماسى – وركەستر مەن سكريپكاعا ارنالعان كونتسەرتى-ءنىڭ ءۇشىنشى ءبولىمىن كەرەمەت ورىندادى. سونىمەن قاتار ەلميرا جارمۇحامەدوۆا مەن شەرنياز نازاروۆ نيككولو پاگانينيدىڭ فاگوت پەن سكريپكاعا ارنالعان №2 دۋەتىن ناقىشىنا كەلتىرىپ, شىرقادى. سونداي-اق ي.باح, ا.ۆيۆالدي, پ.چايكوۆسكي سەكىلدى ايگىلى كومپوزيتورلاردىڭ تۋىندىلارى دا وينالدى. اسىرەسە «استانا وپەرا» كامەرالىق وركەسترى كەش بويى بارلىق ونەرپازدى مۋزىكامەن سۇيەمەلدەپ, باعدارلامانىڭ شىرايىن كەلتىردى.
