دەنيس 1997 جىلى 7 تامىزدا كوكشەتاۋ قالاسىندا دۇنيەگە كەلدى. مەكتەپتە جۇرگەن كەزىندە ءتۇرلى سپورتتىڭ باسىن شالدى. كاراتەمەن, جۇزۋمەن, شاحماتپەن, تىپتەن توعىزقۇمالاقپەن دە شۇعىلداندى. كەيىننەن تاڭداۋى شورت-ترەككە ءتۇسىپ, وعان مىقتاپ دەن قويدى. سپورتتىڭ بۇل تۇرىندە نيكيشا ەلەۋلى تابىسقا قول جەتكىزدى. اتاپ ايتساق, 500, 1000 مەترلىك سايىستا ول 2014 جىلى سوچي وليمپياداسىندا بەسىنشى ورىن الىپ, ەرزۋرۋمدە وتكەن جاستاردىڭ الەم بىرىنشىلىگىندە قولا مەدالدى ەنشىلەدى. كەلەسى جىلى وساكادا سول كورسەتكىشىن قايتالادى.
ەرەسەكتەر دۋىنا تۇبەگەيلى قوسىلعاننان كەيىن دە جەرلەسىمىز جانكۇيەرلەرىن جەرگە قاراتقان جوق. ول سوڭعى ەكى الەم چەمپيوناتىندا كۇمىس مەدالدى موينىندا جارقىراتتى. 2014 جىلى روتتەردامدا قىتايدىڭ ازاماتتىعىن العان وڭتۇستىك كورەيانىڭ تۋماسى, وليمپيا ويىندارىنىڭ جەڭىمپازى, 9 دۇركىن الەم چەمپيونى لين سياوتسزيۋننەن عانا قالىپ قويدى. 2025 جىلى بەيجىڭدە وليمپيادا مەن الەمنىڭ ءتورت دۇركىن چەمپيونى, كانادالىق ستيۆەن ديۋبۋاعا جول بەردى. ودان بولەك, دەنيس دۇنيەجۇزىلىك ۋنيۆەرسيادا دا ءتورت رەت ۇزدىك ۇشتىكتى تۇيىندەپ, الەم كۋبوگىندە سان مارتە ولجاعا كەنەلدى. 2018 جىلى پحيونچحان, 2022 جىلى بەيجىڭ وليمپيادالارىندا باق سىنادى.
بۇل كۇندەرى دەنيس اق وليمپياداعا قىزۋ دايارلانىپ جاتىر. وقۋ-جاتتىعۋ جيىنى كەزىندە سۇحباتتاسقانىمىزدا: «دايىندىق جوسپار بويىنشا جۇزەگە اسىپ جاتىر. كوماندا مۇشەلەرىنىڭ كوڭىل كۇيلەرى كوتەرىڭكى. بارلىعىمىز دا وليمپيادادا بارىمىزدى سالىپ, جۇلدە الۋدى كوزدەپ وتىرمىز. مەنەن كوپشىلىكتىڭ 500 مەترلىك سايىستا جۇلدە كۇتەتىنى انىق. بۇل – مەنىڭ عانا ەمەس, ابزال اجىعاليەۆتىڭ دە وڭ جامباسىنا كەلەتىن قاشىقتىق. قازىر ەكەۋىمىز بىرگە جاتتىعىپ, ءبىر-بىرىمىزگە باسەكەلەس بولىپ ءجۇرمىز. ودان ول دا ۇتادى, مەن دە ۇتامىن. باسەكەلەستىك بار جەردە ناتيجە دە بولادى. سوندىقتان ەش ايانىپ جاتقان جوقپىز. مەنىڭ دە, ابزالدىڭ دا ماقساتى – ەلىمىزدىڭ تۋىن كوكتە جەلبىرەتۋ, ءساتى كەلسە ءانۇرانىمىزدى شىرقاتۋ», دەپ اعىنان جارىلدى.
قازىر ەلىمىزدىڭ قۇراماسىن بىلىكتى باپكەر پيوتر گاديموۆ جاتتىقتىرادى. وعان 2024 جىلدان بەرى نيدەرلاندتان ارنايى شاقىرىلعان ۆيلما بۋمسترا كومەكتەسىپ ءجۇر. قىزعالداقتار ەلىنىڭ وكىلى كەزىندە اقش-تىڭ ۇلتتىق كومانداسىنىڭ باس باپكەرى بولىپ, ەۋروپانىڭ بىرقاتار مەملەكەتىندە جەمىستى ەڭبەك ەتتى. مايتالمان مامان كەڭەسشى-جاتتىقتىرۋشى قىزمەتىن اتقارادى. شورت-ترەكشىلەرىمىز وليمپياداعا 4 اقپاندا اتتانادى. سپورتتىڭ بۇل تۇرىنەن العاشقى جۇلدەلەر 10 اقپاندا ساراپقا سالىنادى.
