باعدارلاما اياسىندا «The First Steps: وقىتۋشىنىڭ قۇرالدارى, تاجىريبەسى جانە رەسۋرستىق جاي-كۇيى» باعىتى بويىنشا جاس وقىتۋشىلارعا ارنالعان سەسسيالار وتكىزىلدى. وندا تسيفرلىق پەداگوگيكا, باعالاۋ جۇيەلەرى مەن زاماناۋي وقىتۋ ادىستەمەلەرى مەن كاسىبي دامۋ ماسەلەلەرى قامتىلدى. باعدارلاما بارىسىندا عىلىمي جاريالانىمدار, گرانتتىق قارجىلاندىرۋ مەن حالىقارالىق باعدارلامالار, زياتكەرلىك مەنشىك جانە عىلىمي زەرتتەۋلەردى كوممەرتسيالاندىرۋعا ارنالعان مودۋلدەر ءوتتى.
ايتالىق, عىلىمي ناتيجەلەردى كوممەرتسيالاندىرۋعا ارنالعان سەسسيادا «عىلىم قورى» اق ينۆەستيتسيالار جانە جاڭا جوبالار دەپارتامەنتىنىڭ ديرەكتورى ايجان جەكسەمباەۆا كوممەرتسيالاندىرۋعا ارنالعان گرانتتىق باعدارلامانىڭ تالابىن ءتۇسىندىردى. ال PhD, سالالىق ساراپشى ارىن ورساريەۆ ەلىمىزدەگى تەحنولوگيالاردى كوممەرتسيالاندىرۋ تاجىريبەسى مەن ينۆەستيتسيا تارتۋ جانە بيزنەس-مودەلدەردى قالىپتاستىرۋداعى پراكتيكالىق كەيستەر تۋرالى باياندادى.
سونىمەن قاتار حالىقارالىق عىلىمي ىنتىماقتاستىقتى دامىتۋعا ارنالعان سەسسيادا «Horizon Europe», «Erasmus» جانە وزگە دە باعدارلامالار اياسىنداعى مۇمكىندىكتەر تانىستىرىلىپ, س.تورايعىروۆ ۋنيۆەرسيتەتىنىڭ ەۋروپالىق عىلىمي كەڭىستىككە ينتەگراتسيالانۋ باعىتىنداعى جۇمىسى اتاپ ءوتىلدى. سونداي-اق ۇلتتىق زياتكەرلىك مەنشىك ينستيتۋتى ديرەكتورىنىڭ ورىنباسارى ايدىن ارتىقوۆا, «Clarivate» كومپانياسىنىڭ تمد ەلدەرى بويىنشا رەسمي وكىلى ينەش كەنجينا, «Informascope» كومپانياسىنىڭ ورتالىق ازياداعى كونسۋلتانتى رابيعا قوجامقۇل ءوز باعىتتارى بويىنشا تىڭ اقپاراتپەن ءبولىستى.
مازمۇندى ءىس-شارا سوڭىندا قاتىسۋشىلار عىلىمي جوبالاردى ازىرلەۋ, گرانتتىق وتىنىمدەر دايىنداۋ, زياتكەرلىك مەنشىكتى قورعاۋ جانە عىلىمي ناتيجەلەردى كوممەرتسيالاندىرۋ بويىنشا پراكتيكالىق داعدىلارعا يە بولدى. بۇل باستاما جاس عالىمداردى قولداۋ مەن ۋنيۆەرسيتەت عىلىمىنىڭ باسەكەگە قابىلەتتىلىگىن ارتتىرۋعا باعىتتالعان.
ازامات قۇسايىن
