ءىس ماتەريالدارىنا سايكەس, 2007 جىلى پرەمەر-مينيستر بولعان ۆيكتور يانۋكوۆيچ كيەۆ وبلىسىنداعى دنەپر-تەتەرەۆ ورمان-اڭشىلىق شارۋاشىلىعىنا قاراستى ورمان قورى جەرىن يەمدەنۋ ماقساتىندا جەر ماسەلەسىنە قاتىستى شەشىمدەردىڭ قابىلدانۋىنا باستاماشى بولعان.
«قىلمىستىق سحەمانى جۇزەگە اسىرۋ ءۇشىن بۇرىنعى پرەزيدەنتتىڭ سىبايلاستارى وزدەرىنە جاقىن ادامداردى تارتقان. ولار كيەۆ وبلىستىق مەملەكەتتىك اكىمدىگىنە كولەمى 1 گەكتارعا دەيىنگى جەر تەلىمدەرىن بەرۋ تۋرالى بىرنەشە ءوتىنىش تاپسىرعان, كەيىن ولاردىڭ نىسانالى ماقساتىن وزگەرتۋگە قول جەتكىزگەن. بۇل ءوز كەزەگىندە جەردى بۇرىنعى پرەزيدەنتتىڭ باقىلاۋىنداعى كومپانياعا كەدەرگىسىز بەرۋگە مۇمكىندىك بەردى», دەپ حابارلادى ۆاكس.
2009-2011 جىلدارى اتالعان اۋماقتا قوناقۇي-مەيرامحانا كەشەنى سالىنعان. ۆيكتور يانۋكوۆيچ بۇل نىساندى جەكە قاجەتتىلىكتەرى ءۇشىن پايدالانعان.
سوت ەكس-پرەزيدەنتتى ورمان قورىنىڭ اۋماعىنداعى كولەمى 17,5 گەكتار بولاتىن, شامامەن 22 ملن گريۆەن (260 ميلليون تەڭگەگە جۋىق) تۇراتىن جەر تەلىمىن زاڭسىز يەمدەنگەنى ءۇشىن كىنالى دەپ تانىدى.
2025 جىلعى ءساۋىر ايىندا ۆيكتور يانۋكوۆيچ سونداي-اق اسكەردەن قاشۋعا يتەرمەلەۋ جانە مەملەكەتتىك شەكارا ارقىلى زاڭسىز وتۋگە ۇيىمداستىرۋشىلىق جاساعانى ءۇشىن سىرتتاي 15 جىلعا سوتتالعان بولاتىن.
ال 2019 جىلعى قاڭتاردا وعان ۋكرايناعا قارسى اگرەسسيالىق سوعىس جۇرگىزۋگە كومەكتەستى جانە مەملەكەتكە وپاسىزدىق جاسادى دەگەن ايىپتار بويىنشا 13 جىلعا باس بوستاندىعىنان ايىرۋ جازاسى تاعايىندالعان. بۇل ۇكىم دە سىرتتاي شىعارىلدى, سەبەبى بۇرىنعى پرەزيدەنت 2014 جىلى ەلدەن قاشىپ كەتكەن.
زەلەنسكي ترامپپەن ۋكراينا مەن اقش اراسىنداعى ەركىن ساۋدا تۋرالى كەلىسىمدى تالقىلادى
بۇعان دەيىن ۋكراينا باس پروكۋراتۋراسى ۆيكتور يانۋكوۆيچتىڭ رەسەي فەدەراتسياسىنىڭ ماسكەۋ وبلىسىنداعى بارۆيحا ەلدى مەكەنىندە جۇرگەنىن حابارلاعان. يانۋكوۆيچ ۋكراينانى 2010–2014 جىلدار ارالىعىندا باسقارعان بولاتىن.
