2024 جىلمەن سالىستىرعاندا تۇراقتى پايدالانۋشىلار سانى 4,1 % ارتىپ, 5 ملن-نان استام ادامعا جەتتى. وقىرمان تۇركىستان, جامبىل, پاۆلودار وبلىستارىندا كوپ تىركەلگەن.
كىتاپ وقۋعا دەگەن قىزىعۋشىلىقتىڭ ارتۋى كەلۋشىلەر سانىنىڭ كوپتىگىنەن ايقىن بايقالادى. بىلتىر كىتاپحانالىق قىزمەتكە جۇگىنۋ كورسەتكىشى رەكوردتىق دەڭگەيگە جەتىپ, جالپى سانى 57 ملن رەت كەلۋ كورسەتكىشى تىركەلدى. سونىمەن قاتار مەرزىمدى باسىلىمدارعا دەگەن سۇرانىس كوپ. ءبىر جىل ىشىندە ۇلتتىق كىتاپحاناعا گازەتتەر مەن جۋرنالدار بويىنشا 1 ملن-نان استام سۇرانىس ءتۇستى.
ءيا, كىتاپحانالارعا ەڭ كوپ كەلۋشىلەر – جاستار. الماتى قالاسىنداعى ۇلتتىق كىتاپحانادا وقىرمانداردىڭ ەڭ كوپ بولىگىن 17–25 جاس ارالىعىنداعى جاستار, ودان كەيىن 12–18 جاس ارالىعىنداعى جاسوسپىرىمدەر قۇرايدى. سۇرانىسقا يە ادەبيەتتەردىڭ قاتارىندا كوركەم شىعارمالار, تاريح پەن ەتنوگرافياعا ارنالعان باسىلىمدار, عىلىمي-كوپشىلىك, پسيحولوگيالىق جانە مەديتسينالىق كىتاپتار, سونداي-اق جاڭا تەحنولوگيالار تۋرالى باسىلىمدار بار.
كىتاپحانالار وقىرمانمەن جۇمىس جۇرگىزۋمەن قاتار, مادەني ءومىردىڭ ماڭىزدى ورتالىعى رەتىندە دە ەرەكشە ءرول اتقارادى. ءبىر جىل ىشىندە كىتاپحانالاردا 258 مىڭنان استام مادەني-اعارتۋشىلىق ءىس-شارا ءوتتى. سونىمەن قاتار ينفراقۇرىلىم مەن تسيفرلىق سەرۆيستەردى دامىتۋ جۇمىستارى قاتار جۇرگىزىلىپ وتىر. ۇلتتىق كىتاپحانادا ەلەكتروندى رەسۋرستار قولجەتىمدى بولۋ ءۇشىن ينتەرفەيس جاڭارتىلدى. ۇلتتىق اكادەميالىق كىتاپحانا «Air Astana» اۋە كومپانياسىمەن بىرلەسىپ «اۋە قاناتىندا» جوباسىن جۇزەگە اسىردى. ال شىعىس قازاقستان وبلىسىندا كىتاپحاناشىلاردىڭ جۇمىسىن وڭتايلاندىرۋ ماقساتىندا «DosAI» نەيرواسسيستەنتى العاش رەت ىسكە قوسىلدى.
بۇدان بولەك ءسابيت مۇقانوۆ اتىنداعى سولتۇستىك قازاقستان وبلىستىق كىتاپحاناسىندا وقىرماندارعا قىزمەت كورسەتۋ ساپاسىن ارتتىرۋعا, تسيفرلىق بايلانىستى كۇشەيتۋگە باعىتتالعان «AI Zhan» اسسيستەنتى ەنگىزىلدى.
كىتاپحانالار جەلىسىن دامىتۋ باسقا وڭىرلەردە دە جالعاسىن تاپتى. قىزىلوردا وبلىسىندا «رۋحانيات» ورتالىعى پايدالانۋعا بەرىلسە, باتىس قازاقستان وبلىسىندا 25 اۋىلدىق كىتاپحانانى جاڭعىرتۋعا ارنالعان قاناتقاقتى جوبا جۇزەگە استى. بۇل باستامالاردىڭ بارلىعى كىتاپحانانى وقىرمانعا جاقىنداتىپ, زاماناۋي مادەني-اعارتۋشىلىق ورتالىققا اينالدىرۋدى ماقسات ەتەدى.
