سۋرەت: kaz.zakon.kz
بەسىنشى ۇلتتىق قۇرىلتاي وتىرىسى ەلدىڭ بىرلىگى مەن تۇراقتى دامۋىنا باعىتتالعان ناقتى شەشىمدەر قابىلداناتىن ماڭىزدى الاڭ ەكەنىن تاعى ءبىر مارتە كورسەتتى.
سونىمەن قاتار مەملەكەت باسشىسى ساياسي جاڭعىرتۋدىڭ قيسىندى جالعاسى ۆيتسە-پرەزيدەنت ينستيتۋتى تۋرالى ايتتى. ۆيتسە-پرەزيدەنت ينستيتۋتىن قۇرۋ ەلدە كەيىنگى جىلدارى قالىپتاسقان بۇكىل كەيىنگى جۇيەنىڭ لوگيكالىق اياقتالۋى ەكەنىن مالىمدەدى. ونىڭ ايتۋىنشا, ۆيتسە-پرەزيدەنتتى پرەزيدەنت پارلامەنتتىڭ كەلىسىمىمەن تاعايىندايدى.
سونىمەن قاتار ۆيتسە-پرەزيدەنت مەملەكەت باسشىسى ايقىندايتىن وكىلەتتىكتەر اياسىندا قىزمەت اتقارادى. اتاپ ايتقاندا, حالىقارالىق فورۋمداردا, شەتەلدىك مەملەكەتتەردىڭ دەلەگاتسيالارىمەن كەلىسسوزدەردە ەل اتىنان وكىلدىك ەتۋ, پارلامەنتتە پرەزيدەنتتىڭ مۇددەسىن ءبىلدىرۋ, وتاندىق جانە شەتەلدىك قوعامدىق-ساياسي, عىلىمي, مادەني-اعارتۋشىلىق ۇيىمدارمەن ءوزارا ءىس-قيمىل جاساۋ, سونداي-اق پرەزيدەنتتىڭ وزگە دە تاپسىرمالارىن ورىنداۋ مىندەتتەرى جۇكتەلەدى.
مەملەكەت باسشىسى ۆيتسە-پرەزيدەنتتىڭ نەگىزگى فۋنكتسيالارى كونستيتۋتسيادا بەكىتىلۋگە ءتيىس ەكەنىن اتاپ ءوتتى. جاڭا ينستيتۋتتى ەنگىزۋ مەملەكەتتىك اپپاراتتى وڭتايلاندىرۋمەن قاتار جۇرەدى, ونىڭ ىشىندە مەملەكەتتىك كەڭەسشى لاۋازىمىن جويۋ جانە پرەزيدەنت اكىمشىلىگىن رەفورمالاۋ كوزدەلەدى.
بۇل رەتتە ق.توقاەۆ اتالعان جاڭاشىلدىق پرەزيدەنتتىك بيلىك ينستيتۋتىن السىرەتپەيتىنىن, كەرىسىنشە باسقارۋ جۇيەسىنىڭ ورنىقتىلىعىن ارتتىرىپ, بيلىك يەرارحياسىنا ايقىندىق ەنگىزەتىنىن, سونىمەن قاتار قازاقستاننىڭ پرەزيدەنتتىك رەسپۋبليكا رەتىندەگى مارتەبەسىن ساقتايتىنىن اتاپ ءوتتى.
مەملەكەت باسشىسى ۇسىنىلىپ وتىرعان رەفورمالاردىڭ جيىنتىعى – ءبىرپالاتالى پارلامەنتكە (قۇرىلتاي) كوشۋ, حالىق كەڭەسىن قۇرۋ جانە ۆيتسە-پرەزيدەنت لاۋازىمىن ەنگىزۋ – ەل دامۋىنا قۋاتتى سەرپىن بەرىپ, قازىرگى زامانعى سىن-قاتەرلەر جاعدايىندا مەملەكەتتىلىكتىڭ الەۋەتىن كۇشەيتەدى دەگەن سەنىم ءبىلدىردى.
سەرىك ەرۋباەۆ,
ءماجىلىس دەپۋتاتى
