پالاتا وكىلى جانار التاەۆانىڭ ايتۋىنشا, بۇگىندە ەلىمىزدە ءبىلىم بەرۋ مەكەمەلەرى مەن ءوندىرىس ورىندارى اراسىندا بايلانىس كۇشەيتىلىپ جاتىر. ونداعى ماقسات – ساپالى كادر دايارلاۋ. جانە وسىعان بايلانىستى وڭىرلەردە سالالىق اليانستار قۇرىلىپ جاتقانىن جەتكىزدى.
تاشكەنت تەكستيل جانە جەڭىل ونەركاسىپ ينستيتۋتىنىڭ دوتسەنتى, تەحنيكا عىلىمدارىنىڭ دوكتورى مالاحات يلحاموۆا اتالعان سالانى دامىتۋ بويىنشا وزبەكستان تاجىريبەسىمەن ءبولىستى.
«جەڭىل ونەركاسىپ سالاسىندا مامان تاپشىلىعى وزەكتى ماسەلە. وقۋ بىتىرگەن تۇلەكتىڭ ءبارى فابريكاعا جۇمىسقا بارا بەرمەيدى. ونىڭ ۇستىنە جاس ماماندا تاجىريبە از بولادى. سوندىقتان ماشىق قالىپتىستىرۋ ءۇشىن قالا اكىمىنە وندىرىستىك پاركتەر كەرەك دەگەن ۇسىنىس ايتقانبىز. ول جەردە ستۋدەنتتەر ستانوكتاردا جۇمىس ىستەپ ۇيرەنەر ەدى. شەبەرلىگى دە ارتادى. سول سەبەپتى سالالىق اليانس قۇرۋ ماڭىزدى», دەدى شىمكەنت قالالىق كرەاكتيۆتى يندۋستريا قاۋىمداستىعىنىڭ ءتورايىمى جاننا ەلتانوۆا.
سونىمەن جيىن قورىتىندىسىندا جەڭىل ونەركاسىپ سالالىق اليانسى قۇرىلدى. ول ءۇشىن كاسىپكەرلەر پالاتاسى, وقۋ ورىندارى مەن كاسىپورىندار ءوزارا ۇشجاقتى ىنتىماقتاستىق مەموراندۋمىنا قول قويدى. ول الداعى ەكى جىلدا جول كارتاسى اياسىندا ىسكە اسىرىلادى. مامانداردىڭ ايتۋىنشا, اتالعان باستاما مەگاپوليستىڭ ەكونوميكالىق دامۋىنا, جەڭىل ونەركاسىپ سالاسىنداعى كادرلاردىڭ بىلىكتىلىگىن ارتتىرۋعا ىقپال ەتەدى.
