قوعام • 20 قاڭتار, 2026

ەلىمىزدە ارنايى كونستيتۋتسيالىق كوميسسيا قۇرىلاتىن بولدى

110 رەت

كورسەتىلدى

2 مين

وقۋ ءۇشىن

مەملەكەت باسشىسى قاسىم-جومارت توقاەۆ كونستيتۋتسيالىق كوميسسيا قۇرۋ تۋرالى شەشىم قابىلدادى. ارنايى جارلىققا ەرتەڭ قول قويادى, دەپ حابارلايدى Egemen.kz.

قىرمىزى جۇماعاليقىزى

ەلىمىزدە ارنايى كونستيتۋتسيالىق كوميسسيا قۇرىلاتىن بولدى

فوتو: اشىق دەرەككوز

پرەزيدەنتتىڭ ايتۋىنشا, الداعى وزگەرىستەر 2022 جىلعى رەفورمادان دا اۋقىمدى بولماق. بۇل قادام ءىس جۇزىندە جاڭا كونستيتۋتسيا قابىلداۋمەن پارا-پار.

«جالپى, باستاپقىدا پارلامەنتتىك رەفورما اياسىندا اتا زاڭنىڭ 40-قا جۋىق بابىن وزگەرتۋ جوسپارلانعان ەدى. الايدا جۇمىس بارىسىندا تۇزەتۋلەر سانى الدەقايدا كوپ ەكەنى بەلگىلى بولدى. 2022 جىلعى رەفورمادا اتا زاڭنىڭ 33 بابى جاڭارعانىن بىلەسىزدەر. ال, ەندىگى وزگەرىستەر ودان دا اۋقىمدى. ءبىز, شىن مانىندە, جاڭا كونستيتۋتسيا قابىلداۋمەن پارا-پار قادام جاساعالى تۇرمىز. سوندىقتان مەن كونستيتۋتسيالىق كوميسسيا قۇرۋ تۋرالى شەشىم قابىلدادىم. ارنايى جارلىققا ەرتەڭ قول قويامىن», دەدى مەملەكەت باسشىسى.

كوميسسيا قۇرامىنا 100-دەن استام ازامات كىرەدى. ونىڭ ىشىندە ۇلتتىق قۇرىلتاي مۇشەلەرى, بەلگىلى زاڭگەرلەر, اقپارات قۇرالدارى باسشىلارى, ايماقتىق ءماسليحات توراعالارى مەن قوعامدىق كەڭەس وكىلدەرى جانە باسقا دا بىلىكتى ماماندار بولادى.

«بۇل جۇمىسقا كونستيتۋتسيالىق سوتتىڭ توراعاسى جەتەكشىلىك ەتەدى. كوميسسيا بارلىق ۇسىنىستى ساراپتاپ, قورىتىپ, ناقتى وزگەرىستەردىڭ جوباسىن ازىرلەيدى. سودان سوڭ جالپىحالىقتىق رەفەرەندۋم وتەتىن ۋاقىتتى بەلگىلەيمىز», دەدى قاسىم-جومارت توقاەۆ.

مەملەكەت باسشىسى جاڭا پارلامەنتتىڭ اتاۋىن «قۇرىلتاي» دەپ اتاۋدى ۇسىندى

بۇعان دەيىن مەملەكەت باسشىسى كىسى قولىنان قازا تاپقان نۇرايدىڭ باسىندا بولعان جاعدايعا دا اسا ءمان بەردى. سونىمەن قاتار پرەزيدەنت ارال تەڭىزى ماسەلەسىنە قاتىستى پىكىر ءبىلدىرىپ, ونى ساقتاۋ بۇكىل ادامزات ءۇشىن وزەكتى مىندەت ەكەنىن ايتقان بولاتىن.

مەملەكەت باسشىسى ۇلتتىق قۇرىلتايدىڭ V وتىرىسىندا قازاقستان رەسپۋبليكاسى ۆيتسە-پرەزيدەنتى ينستيتۋتىن قۇرۋ جانە ونى كونستيتۋتسيادا ءتيىستى تۇردە بەكىتۋ تۋرالى ايتتى.