جەرلەستەرىمىزدىڭ اراسىنان العاشقى بولىپ جارىس جولىنا يۋليا پۋتينتسەۆا شىقتى. ول WTA تىزىمىندە وزىنەن الدەقايدا جوعارى تۇرعان بەاتريس حادداد-مايامەن كەزدەستى. العاشقى سەت برازيليالىقتىڭ پايداسىنا شەشىلگەنىمەن, ەكىنشىسىندە ءبىزدىڭ سپورتشىنىڭ مەرەيى ۇستەم بولدى. ۇشىنشىسىندە دە حادداد-مايا الدا كەلە جاتتى. دەسەك تە, شەشۋشى تۇستا شيراق قيمىلداعان پۋتينتسەۆا كامبەك جاساپ, جەڭىستى قارسىلاسىنىڭ ۋىسىنان ج ۇلىپ الدى – 3:6, 7:5, 6:3. كوپ كەشىكپەي كەيىنگى كەزدەرى ايى وڭىنان تۋىپ تۇرعان الەكساندر بۋبليك بوي كورسەتتى. ەلىمىزدىڭ ەڭ ۇزدىك تەننيسشىسى امەريكالىق دجەنسون برۋكسبيگە ادىم اشتىرمادى – 6:4, 6:4, 6:4.
كەشە الەكساندر شەۆچەنكو شۆەتسيالىق ەلياس يمەرمەن كۇش سىناستى. بۇل جولى دا جانكۇيەرلەر كەرەمەت كامبەكتىڭ كۋاسى بولدى. وتانداسىمىز ءبىرىنشى سەتتى قارسىلاسىنا بەرىپ قويعانىمەن, ودان كەيىنگى ۇشەۋىن ءوز پايداسىنا شەشتى – 3:6, 7:5, 6:4, 6:1.
ۇيىمداستىرۋشىلار تاراپىنان بەرىلگەن جەڭىلدىكتىڭ ارقاسىندا «ۇلكەن دۋلىعا» ساناتىنداعى قاتىسۋ قۇقىعىنا يە بولعان زارينا دياس يسپانيالىق پاۋلا بادوسامەن شەبەرلىك بايقاستى. پيرەنەي تۇبەگى وكىلى جەرلەسىمىزدەن الدەقايدا مىقتى ەكەنىن جۇرت جاقسى بىلەدى. كەزىندە ول الەمدىك رەيتينگتە ەكىنشى ورىنعا دەيىن كوتەرىلىپ, بۇگىندە ۇزدىكتەر تىزىمىندە 70-ساتىدا تۇر. ۇزاق ۋاقىت بويى جاراقاتىمەن ارپالىسقان زارينا بۇل كۇندەرى نەبارى 276-ورىندى قاناعات تۇتىپ تۇر. بۇل باسەكەدە بادوسانىڭ باسىمدىعى ايقىن بايقالدى. كەزدەسۋ 2:6, 4:6 ەسەبىمەن اياقتالدى.
بۇگىن ەلەنا رىباكينا سلوۆەنيالىق كايا يۋۆانمەن سايىسقا تۇسەدى. سونداي-اق ءبىز الەكساندر بۋبليك/الەكساندر شەۆچەنكو مەن مارسەلو دەمولينەر (برازيليا)/جان-جيۋلەن روجە (نيدەرلاند), اننا دانيلينا/الەكساندرا كرۋنيچ (سەربيا) كۋينن گليسون (اقش)/ ەلەنا پريدانكينا (رەسەي), اندرەي گولۋبەۆ/الەكساندر نەدوۆەسوۆ پەن توماس مارتين ەتچەۆەرري/كاميلو ۋگو كارابەلي (ارگەنتينا) اراسىنداعى جۇپتىق, ارالاس جۇپتار اراسىنداعى سايىستار وتەدى. جاستاردىڭ باسەكەسىندە زاڭعار نۇرلان ۇلى, دامير جالعاسباي, دانيەل تازابەكوۆ ونەر كورسەتەدى.
