قازاق قىزى تۇسكەن تەلەحيكايادا نيڭشيا اۆتونوميالى ولكەسىنىڭ سيحايگۋ وڭىرىندەگى اۋىل تۇرعىندارىنىڭ كۇرەسى, تىنىس-تىرشىلىگى سۋرەتتەلگەن. ريزا اتالعان شىعارمادا ءوز بولاشاعى ءۇشىن بارىن سالعان, ايانباي كۇرەسكەن باتىل قىز لي شۋيحۋانىڭ بەينەسىن ءساتتى سومداعان. بەيجىڭدەگى «Shougang Arena» كەشەنىندە وتكەن ماراپاتتاۋ راسىمىندە ريزا الىمجانقىزى ءسوز الىپ, بىلاي دەدى: «مەن باقىتتى جانمىن ءارى ءوزىمدى جولىم بولعان اكتريسا دەپ ويلايمىن. ازىن-اۋلاق ەڭبەگىمدى باعالاعان قازىلار القاسىنا, كورەرمەندەرگە العىسىم شەكسىز. العىسىمدى تۋعان تىلىمدە ايتقىم كەلەدى», دەي كەلە الىپ ساحنادا قازاق تىلىندە «سىزدەرگە راحمەت!» دەگەنى جۇرتتى تامساندىردى.
ريزا الىمجانقىزى – «Flying Apsaras Awards» سىيلىعى تاريحىندا «ۇزدىك اكتريسا» اتاعىن العان تۇڭعىش قازاق. تەلەونەر سالاسىندا كەرەمەت جەتىستىكتەرگە جەتكەن ول 2002 جىلى بەيجىڭ كينواكادەمياسىن ءتامامداپ, كاسىبي اكتريسا اتاندى. وسىعان دەيىن «بىزگە عانا ءمالىم مەكەن», «حەن حۋان چۋان عيباداتحاناسى», «ماحابباتقا ءامىر جۇرمەيدى» سياقتى فيلمدەردە ويناعان.
2017 جىلى ريزا الىمجانقىزى XX شانحاي حالىقارالىق كينوفەستيۆالىندە «ۇمتىلىس» فيلمىندەگى ءرولى ءۇشىن «كورەرمەن ۇناتقان اكتريسا» اتالىمىن يەلەنگەن. ال 2019 جىلى «چاڭ ءان كۇنى» تەلەحيكاياسىنداعى ءرولى ءۇشىن «Huading» بايقاۋىندا «ۇزدىك اكتريسا» تانىلعانى بار.
