— 2026 جىلعى 6 قاڭتاردا بايتەرەك اۋداندىق سوتى اليمەنت تولەۋدەن جالتارعان ادامعا قاتىستى اكىمشىلىك قاماۋعا الۋ تۋرالى قاۋلى شىعاردى. بورىشكەر 2023 جىلعى 9 قاڭتاردان بەرى اليمەنت تولەمەي كەلگەن. وسى ۋاقىت ارالىعىندا ونىڭ اليمەنت بويىنشا قارىزى 3 015 447 تەڭگەنى قۇراعان, — دەلىنگەن سوت مالىمەتىندە.
بايتەرەك اۋدانى بويىنشا بيىلعى جىلى اليمەنت تولەۋدەن جالتارۋ دەرەگىمەن ءبىر بورىشكەردىڭ ءىسى سوتتا قارالىپ جاتىر, سونداي-اق ءبىر قىلمىستىق ءىس تەرگەۋ ساتىسىندا.
قازاقستان زاڭناماسىنا سايكەس, اليمەنت تولەۋدەن جالتارعانى ءۇشىن قىلمىستىق كودەكستىڭ 139-بابىنا ساي 2 جىلعا دەيىن باس بوستاندىعىنان ايىرۋ تۇرىندەگى قىلمىستىق جاۋاپكەرشىلىك كوزدەلگەن. سونىمەن قاتار اكىمشىلىك قۇقىق بۇزۋشىلىق تۋرالى كودەكستىڭ 669-بابىنىڭ 1-بولىگىنە سايكەس, جەكە تۇلعالارعا 5 اەك مولشەرىندە ايىپپۇل سالۋ, 20 ساعاتقا دەيىن قوعامدىق جۇمىستارعا تارتۋ نەمەسە 5 تاۋلىككە دەيىن اكىمشىلىك قاماققا الۋ جازاسى قولدانىلۋى مۇمكىن.
باتىس قازاقستان وبلىسىنىڭ پروكۋراتۋراسى اتا-انالاردى بالانى اسىراپ-باعۋعا ارنالعان اليمەنت تولەمىن ۋاقىتىلى تولەۋگە شاقىرادى. سەبەبى ءاربىر اتا-انا ءوز بالاسى الدىندا جاۋاپتى.
