جاڭا پارلامەنت: ۇسىنىستار جان-جاقتى زەردەلەنەدى

جيىندا پارلامەنتا­ريزم ينستيتۋتىنىڭ ديرەكتورى ناتاليا پان ازاماتتاردان, ساراپشىلاردان جانە قوعام بەلسەندىلەرىنەن كەلىپ تۇسكەن ۇسىنىستار جونىن­دەگى ارالىق اقپاراتپەن ءبو­لىس­تى. بىلتىر قازان ايى­نان بەرى e-Otinish جانە eGov پلاتفورمالارىنداعى «پار­لامەنتتىك رەفورما» ار­­نايى ءبولىمى ارقىلى حالىق ارا­سىنان, ساراپشىلار قاۋىم­داستىعىنان جانە قوعامدىق بىرلەستىكتەردەن 600-گە جۋىق ۇسىنىس جيناقتال­عان. اتاپ ايتقاندا, «بايتاق» پارتياسى, «جاڭارۋ» سىبايلاس جەم­قورلىققا قارسى جالپى­ۇلتتىق قوزعالىسى, رەسپۋب­ليكالىق ادۆوكاتتار القا­سى, «Toqtamys» ادۆو­كاتتىق قاۋىمداستىعى, حالىق­­ارالىق اربيتراج جانە مەدياتسيا پالاتاسى, پار­­لامەنتاريزمدى دامىتۋ قورى, قازاقستاندىق تاتارلار مەن باشقۇرتتار كونگرەسى, ەكو­نو­ميكالىق سايا­سات ينس­تي­تۋتى, «ازاماتتىق باستاما» باستاماشىلىق توبى جانە باسقا دا ۇيىمدار ءوز ۇسى­نىستارىن ءبىلدىردى. بۇعان قوسا قۇقىقتانۋشى عالىمدار ساراپشىلىق ۇسىنىمدارىن جولداپ, بەلسەندىلىك تانىتىپ وتىر.

سونىمەن قاتار پارلامەن­تاريزم ينستيتۋتىنىڭ ديرەكتورى ازاماتتار مەن قوعام­دىق بىرلەستىكتەردەن پار­لامەنتتىك رەفورمادان بولەك, كونستيتۋتسيالىق رەفورماعا قاتىستى دا باستامالار ءتۇسىپ جاتقانىن جەتكىزدى.

جۇمىس توبى جەتەكشىسى­نىڭ ورىنباسارى – پرەزيدەنت­تىڭ قۇقىقتىق ماسەلەلەر جونىندەگى كومەكشىسى ەرجان جيەنباەۆ پارلامەنتتىڭ ۇكىمەتتى, كونستيتۋتسيالىق سوتتى, جوعارى اۋديتورلىق پالاتانى, ورتالىق سايلاۋ كوميسسياسىن جانە باسقا دا مەملەكەتتىك ورگانداردى جاساقتاۋعا قاتىسۋىن رەتتەيتىن كونستيتۋتسيالىق راسىمدەردىڭ جالپى تاسىلدەرى تۋرالى ايتتى. بۇل تاسىل­دەر جۇمىس توبى مۇشەلەرى مەن ساياسي پارتيالار­دىڭ ۇسى­نىستارى نەگىزىندە ازىرلەنگەن.

جۇمىس توبىنىڭ مۇشە­لەرى قاتارىنان مارات شي­بۇتوۆ, ازات پەرۋاشەۆ, ەل­نۇر بەيسەنباەۆ, سەرىك ەگىز­باەۆ, ماگەررام ماگەر­راموۆ, ايداربەك قوجا­نا­زاروۆ, مارات باشيموۆ, نۇر­لان بەكنازاروۆ, ينديرا اۋباكىروۆا, ءۇنزيلا شاپاق, الۋا يبراەۆا, ءبورى­حان نۇر­مۇحامەدوۆ, لەيلا جاقاەۆا, ۆيكتور مالينوۆسكي, ەرلان سارسەمباەۆ, ايدوس سارىم, قارلىعاش جامانقۇلوۆا ءوز يدەيالارى مەن ۇسىنىستارىن ورتاعا سالدى.

جيىن سوڭىندا جۇمىس توبىنىڭ جەتەكشىسى – مەم­لەكەتتىك كەڭەسشى ەرلان قارين كونستيتۋتسيالىق رەفورما بويىنشا تۇپكىلىكتى تاسىل­دەردى ازىرلەۋ ءۇشىن كەلىپ تۇسكەن ۇسىنىستاردىڭ بارلى­عىن جيناقتاپ, جان-جاقتى زەردەلەۋدى تاپسىردى.

انىقتاما: پارلامەنتتىك رەفورما جونىندەگى جۇمىس توبى 2025 جىلعى 8 قازاندا مەملەكەت باسشىسىنىڭ وكىمىمەن قۇرىلدى. 14 قازان­دا جۇمىس توبىنىڭ العاش­قى وتىرىسى ءوتتى. ەكىنشى وتىرىس – 2 جەلتوقساندا, ءۇشىن­شى وتىرىس – 29 جەل­توق­ساندا, ءتورتىنشى وتىرىس 2026 جىلعى 9 قاڭتاردا ۇيىم­داستىرىلدى.