باسىلىمنىڭ حابارلاۋىنشا, سۇلۋلىعى مەن ارحيتەكتۋراسى كەرەمەت ۇيلەسىم تاپقان شاھاردىڭ بەلدى دارەجەگە يە بولۋى – شەتەلدىك تۋريستەر تاراپىنان قىزىعۋشىلىقتىڭ ارتقانىن ايقىندايدى.
حالىقارالىق Vogue جۋرنالى الماتىنى ۇزدىك تۋريستىك باعىتتاردىڭ قاتارىنا ەنگىزۋى بەكەر ەمەس. ويتكەنى, باسىلىم رەداكتسياسى قالاعا وزدەرى كەلىپ, ارالاپ, باعا بەرگەن. ناتيجەسىندە, كوركەم تابيعاتى مەن ەرەكشە ارحيتەكتۋراسىنا ءتانتى بولىپتى. سونداي-اق ولار مەگاپوليستى ەسكى مەن زاماناۋي ءۇردىس توعىسقان شاھار رەتىندە سيپاتتاپ, گاسترونوميالىق مادەنيەتتىڭ دامىعانىن جانە ۇلتتىق قۇندىلىقتارعا دا اسا ءمان بەرىلەتىنىن اتاپ كورسەتكەن. الماتىنى ساياحاتشىلار ەڭ كوپ تاڭدايتىن تۋريستىك ورتالىقتاردىڭ تىزىمىنە كىرگىزگەن. بۇل دەگەنىمىز – شاھارعا الەمدىك دەڭگەيدە قىزىعۋشىلىقتىڭ جىل ساناپ ارتىپ كەلە جاتقانىن دالەلدەيدى.
الماتى قالاسى بىلتىر 9 حالىقارالىق تۋريستىك كورمەگە قاتىسىپ, 270 كەلىسىمگە قول جەتكىزگەن. سونداي-اق دۋباي, شانحاي, گونكونگ, بەيجىڭ, ريميني, سينگاپۋر, لوندون جانە دوحادا «الماتى تۋريزم كۇندەرى» وتكىزىلگەن.
ال «ALA CRAFT 2025» حالىقارالىق قولونەر فەستيۆالى 15 ەلدەن كەلگەن 100-گە جۋىق شەبەردىڭ باسىن بىرىكتىرىپ, ەتنومادەني تۋريزم ورتالىعى رەتىندە ءوزىنىڭ پوزيتسياسىن نىعايتتى. بۇل ءوز كەزەگىندە تەك الماتىنىڭ ەمەس, بۇكىل ەلىمىزدىڭ ابىرويىن الەمدىك ارەنادا ارتتىرا ءتۇستى.
الماتى وبلىسىنىڭ كوللەدجدەرى قىتاي, ەۋروپا جانە ازيا ەلدەرىمەن ىنتىماقتاستىق ورناتتى
الداعى ۋاقىتتا الماتى تەك جەرگىلىكتى تۇرعىنداردىڭ ەمەس, تۋريستەردىڭ دە ءتۇنىن ۇرلاپ, تامسانا, تاڭدانا قارايتىن شاھارعا اينالماق.
بۇل رەتتە ەل پرەزيدەنتى قاسىم-جومارت توقاەۆ مەگاپوليس پاريج, نيۋ-يورك, ماسكەۋ سەكىلدى كۇندىز-ءتۇنى قوناعى ۇزىلمەيتىن, كوز ىلمەيتىن قالا بولۋى ءتيىس دەپ تاپسىرما بەرگەن. ماماندار «باستاما مەگاپوليسكە اعىلاتىن شەتەلدىك ساياحاتشىلار سانىن ارتتىرىپ, تۋريزم سالاسىنا تۇسەتىن تابىستى كوبەيتەدى» دەيدى.
الايدا قازىر دە كورسەتكىش جامان ەمەس. بىلتىر الماتىعا 1 ميلليون 800 مىڭنان اسا تۋريست كەلىپتى. بۇل 2024 جىلمەن سالىستىرعاندا 8,1 پايىزعا كوپ. ولاردىڭ 563 مىڭى – شەتەلدىك ساياحاتشىلار بولسا, 1 ميلليون 300 مىڭنان استامى ەل ءىشىن ارالاعان وتانداستارىمىز. وسىنىڭ ارقاسىندا سوڭعى 11 ايدا سالانىڭ نەگىزگى كاپيتالىنا 171 ميلليارد تەڭگەدەن اسا ينۆەستيتسيا تارتىلعان. ال الداعى ۋاقىتتا الماتىنى حالىقارالىق دەڭگەيدە تانىمال ەتۋ ءۇشىن بىرقاتار سەرىكتەستىك جوبالار قاراستىرىلىپتى.
«حالىقارالىق مىسە-كورمەلەرگە قاتىسۋ, جاھاندىق پلاتفورمالاردا ونلاين-ىلگەرىلەتۋدى دامىتۋ, اۆياكومپانيالارمەن جانە اۋەجاي ينفراقۇرىلىمىمەن بىرلەسكەن ماركەتينگتىك ناۋقاندار جۇرگىزۋ جوسپارلانۋدا. اتاپ ايتقاندا, الەۋمەتتىك جەلىلەردە جاريالانىمدار, بورتتىق جۋرنالداردا ماقالالار, LED-ەكرانداردا كورسەتىلەتىن بەينەماتەريالدار قاراستىرىلعان. بۇل قالانىڭ الەۋەتىن ءىس جۇزىندە تانىتىپ, سەرىكتەستەردىڭ سەنىمىن ارتتىرادى», دەدى الماتى قالاسى تۋريزم باسقارماسى باسشىسىنىڭ ورىنباسارى اقمارال ەششانوۆا.
سونداي-اق الماتى – الەمگە اسپانمەن تىلدەسكەن تاۋلارىمەن بەلگىلى. بۇل رەتتە تاۋ كلاستەرىن دە دامىتۋ قولعا الىنباق. الداعى ۋاقىتتا وسىنداي ايماقتاردىڭ ادام قابىلداۋ مۇمكىندىگىن 5 ەسەگە ارتتىرىپ, تاۋلىگىنە 30 مىڭ كەلۋشىگە دەيىن قابىلداۋ جوسپارلانىپ وتىر.
بۇل قالا بيۋدجەتىن تولىقتىرىپ, ەل ەكونوميكاسىن نىعايتۋعا سەپتەسەدى. ويتكەنى, تاۋ شاڭعىسىمەن اينالىساتىن ءاربىر ساياحاتشىنىڭ ورتاشا تاۋلىكتىك شىعىنى 350 دوللاردى قۇرايدى. ال قالاداعى تاۋ كلاستەرى جىل بويى جۇمىس ىستەيدى. قىستا شاڭعى تەبىلسە, جازدا ۆەلوسيپەد پەن حايكينگ سپورتىمەن اينالىسۋعا بولادى.
ال كۇز بەن كوكتەمدە ەكولوگيالىق سوقپاقتار – سەرۋەندەۋگە ارنالعان تاپتىرماس ورىندار.
ايتا كەتەيىن, 2018 جىلدان بەرى ىلە الاتاۋ ۇلتتىق پاركىنە كەلۋشىلەر قاتارى 4,5 ەسەگە, ال شىمبۇلاق تاۋلى كۋرورتىندا دەمالعاندار سانى 2,5 ەسەگە وسكەن. ەندى الداعى ۋاقىتتا قالانىڭ ساياحاتشىلار ءۇشىن تارتىمدى ايماقتارىن جوبالاۋ جۇمىستارى ەكولوگيالىق تالاپتاردى ساقتاي وتىرىپ, قوعامدىق تالقىلاۋ ارقىلى جۇزەگە اسپاق. وسىلايشا, تۋريزم تۇرلەنىپ, ارۋ قالا الماتى ودان سايىن كوركەيە تۇسپەك.
