ەنەرگەتيكا مينيسترلىگى جەلتوقسان ايىندا كقك تەڭىز تەرمينالى ارقىلى مۇناي جونەلتۋ كولەمىنىڭ ۋاقىتشا تومەندەگەنىن راستادى.
«بۇل جاعداي ۇشقىشسىز ۇشۋ اپپاراتتارىنىڭ شابۋىلى سالدارىنان قاشىقتاعى ايلاق قۇرىلعىسىنىڭ (ۆپۋ-3) جۇمىسىن ءماجبۇرلى تۇردە توقتاتۋمەن, سونداي-اق قارا تەڭىز اكۆاتورياسىنداعى قولايسىز مەتەورولوگيالىق جاعدايلارىنا (داۋىلدار) بايلانىستى بولدى. اتالعان فاكتورلاردىڭ سالاعا اسەرىن بارىنشا ازايتۋ جانە مۇناي ءوندىرۋدىڭ توقتاپ قالۋىنا جول بەرمەۋ ماقساتىندا ەكسپورتتىق اعىنداردى قايتا ءبولۋ بويىنشا جۇمىس جۇرگىزىلدى. مۇناي كولەمىنىڭ ءبىر بولىگى بالامالى باعىتتارعا قايتا باعدارلاندى. اتاپ ايتقاندا, اتىراۋ-سامارا باعىتى بويىنشا تاسىمال كولەمىنىڭ ارتقانى جانە قىتاي حالىق رەسپۋبليكاسىنا جەتكىزىلىمدەردىڭ ۇلعايعانى تىركەلدى», دەپ حابارلادى مينيسترلىكتىڭ ءباسپاسوز قىزمەتى.
ۆەدومستۆو مالىمەتىنشە, قالعان ەكسپورتتىق باعىتتار بويىنشا تاسىمالداۋ ورتاشا جوسپارلى كورسەتكىشتەر دەڭگەيىندە ساقتالعان.
ەسكە سالايىق, بۇگىن «قازمۇنايگاز» كومپانياسىنىڭ ءباسپاسوز قىزمەتى كاسپي قۇبىر كونسورتسيۋمىنىڭ تەرمينالىنا مۇناي تيەۋ ءۇشىن باعىت العان MATILDA كەمەسىنىڭ ۇشقىشسىز اپپاراتتاردىڭ شابۋىلىنا ۇشىراعانىن حابارلادى.
مينيسترلىك دەرەكتەرىنە سايكەس, كقك-عا جاسالعان شابۋىلدار سالدارىنان مۇناي ءوندىرۋ كولەمى 480 مىڭ تونناعا ازايعان.
ايتا كەتەيىك, 29 قاراشادا استانا ۋاقىتىمەن 06:06-دا نوۆوروسسيسك پورتى اۋدانىندا كقك-نىڭ تەڭىز ينفراقۇرىلىم نىساندارىنا ەكيپاجسىز ءجۇزۋ قۇرالدارى ارقىلى شابۋىل جاسالعان ەدى. ناتيجەسىندە تەڭىزدەگى قاشىقتاعى ايلاق قوندىرعىسى ۆپۋ-2 (قالقىمالى تيەۋ قۇرىلعىسى) ايتارلىقتاي زاقىمدالدى. ەرمەك كوشەرباەۆ كتك-عا جاسالعان شابۋىلدى ۋكراينا تاراپىمەن تالقىلادى. ەنەرگەتيكا ءمينيسترى ەرلان اقكەنجەنوۆ كتك-عا تولىققاندى بالاما جوق ەكەنىن, ال وزگە باعىتتار تەك جۇكتىڭ بەلگىلى ءبىر بولىگىن عانا تاسىمالداي الاتىنىن ايتقان ەدى. سونىمەن قاتار ماجىلىس دەپۋتاتى ايدوس سارىم الەۋمەتتىك جەلىلەردە كاسپي قۇبىر كونسورتسيۋمىنىڭ تەرمينالىنا جاسالعان شابۋىلدى قولداعان ازاماتتاردى جاۋاپقا تارتۋدى تالاپ ەتتى.
