اتىراۋداعى جاعالاۋ كۇزەتىنىڭ عيماراتى اپاتتى جاعدايدا تۇر

كەزدەسۋگە ءماجىلىس دەپۋتاتى ابزال قۇسپان, وبلىستىق ارداگەرلەر كەڭەسىنىڭ توراعاسى مۇرات وتەشوۆ, «AMANAT» پارتياسى اتىراۋ وبلىستىق فيليالىنىڭ توراعاسى ابدوللا يدرەسوۆ جانە وبلىستىق ءماسليحات دەپۋتاتى جەڭىس ابىلقارەس قاتىستى.

باسقوسۋ بارىسىندا مەملەكەتتىك شەكارا كۇزەتىندە تۇرعان بولىمشەنىڭ ماتەريالدىق-تەحنيكالىق جاعدايى تالقىلاندى. اتاپ ايتقاندا, جاعالاۋ كۇزەتى پايدالاناتىن اكىمشىلىك-تۇرمىستىق عيمارات 1980 جىلى سالىنعان بۇرىنعى بالاباقشا عيماراتى ەكەنى, تەحنيكالىق قورىتىندى بويىنشا نىسان اپاتتى جاعدايدا تۇرعانى ايتىلدى. عيمارات قولدانىسقا بەرىلگەننەن بەرى جوندەۋ جۇمىسى جۇرگىزىلمەگەن. جاۋىن-شاشىن كۇندەرى عيمارات توبەسىنەن سۋ اعىپ, پايدالانۋعا جارامسىز كۇيگە تۇسكەن.

كەزدەسۋدە ءماجىلىس دەپۋتاتى, «AMANAT» پارتياسى فراكتسياسىنىڭ مۇشەسى باقتىقوجا ىزمۇحامبەتوۆ اسكەري قىزمەتتىڭ ءمانى مەن ماڭىزىنا توقتالدى.

«مەملەكەت باسشىسى جۋىردا «Turkistan» گازەتىنە بەرگەن سۇحباتىندا اسكەري قىزمەتتىڭ ابىروي-بەدەلىن كوتەرۋ جانە ەلىمىزدىڭ قورعانىس قابىلەتىن ارتتىرۋ مەملەكەتتىڭ باستى باسىمدىعىنىڭ ءبىرى ەكەنىن ايتتى. پرەزيدەنت اتاپ وتكەندەي, «سارباز بولۋ – ءوزىڭدى دامىتۋ ءۇشىن تىڭ مۇمكىندىكتەرگە يە بولۋ دەگەن ءسوز. وتان قورعاۋ – ەلىمىزدىڭ ءار ازاماتىنىڭ ەڭ قاستەرلى بورىشى. مەملەكەت قاۋىپسىزدىگىن, ەل مەن جەر تۇتاستىعىن قامتاماسىز ەتۋ – بارشاعا ورتاق مىندەت. سوندىقتان جاستار قاۋىمى ساپالى اسكەري دايارلىقتان وتۋگە ءتيىس. ءبىز بۇعان ەرەكشە كوڭىل ءبولىپ كەلەمىز. اسكەردەگى ءتارتىپ ماسەلەسىن ءجىتى قاداعالايمىز. اسكەري قىزمەتشىلەردىڭ الەۋمەتتىك جاعدايى دا نازاردان تىس قالمايدى», دەدى ول.

ايتا كەتەيىك, 2024 جىلى باقتىقوجا ىزمۇحامبەتوۆ وسى مەكەمە ۇجىمىمەن كەزدەسۋ وتكىزىپ, بىرقاتار كۇرمەۋلى ماسەلەنى كوتەرگەن بولاتىن. سونىڭ ناتيجەسىندە ديۆيزيونداعى كولىك تۇراعى جاڭعىرتىلىپ, قايتا سالىندى. بيىل قۇنى 17 ملن تەڭگەنى قۇرايتىن جوندەۋ جۇمىسىن باستاۋ جوسپارلانىپ وتىر.

«تەڭىزشەۆرويل» اتىراۋ جىلۋ ەلەكتر ورتالىعىنا گاز جەتكىزۋدى توقتاتا ما؟

كەزدەسۋ بارىسىندا ۇقك شەكارا قىزمەتى اتىراۋ وبلىستىق دەپارتامەنتىنىڭ جاعالاۋ كۇزەتى ديۆيزيونىنىڭ كومانديرى فارحاد ميرمانوۆ مەكەمەدە جۇزەگە اسىرىلىپ جاتقان جوبالار تۋرالى بايانداپ, شەشىمىن كۇتكەن تۇيتكىلدى ماسەلەلەرگە توقتالدى.

ءوز كەزەگىندە باقتىقوجا ىزمۇحامبەتوۆ كوتەرىلگەن ماسەلەلەر شەشىمىن تابۋى ءۇشىن ۋاكىلەتتى مەملەكەتتىك ورگاندارمەن بىرلەسىپ, ءتيىستى جۇمىس جۇرگىزىلەتىنىن اتاپ ءوتتى.

ەسكە سالايىق, كەشە ءماجىلىس دەپۋتاتتارى, «AMANAT» پارتياسى فراكتسياسىنىڭ مۇشەلەرى مۇرات ابەنوۆ, مارحابات جايىمبەتوۆ جانە مۇرات ەرگەشباەۆ قىزىلوردا وبلىسىنا جۇمىس ساپارى كەزىندە جەرگىلىكتى «ەكو تاكسي» وتاندىق سەرۆيسىنىڭ جۇمىسىمەن تانىسىپ, پرەزيدەنتتىك ساياباقتى قايتا قۇرۋ بارىسىن تەكسەردى.