جيىندا ءوڭىردىڭ 10 اۋدانى مەن 10 اۋىلىنا سالتاناتتى تۇردە JINMA 904A ماركالى 20 جاڭا تراكتوردىڭ كىلتى تابىستالدى. بايقاۋ ۇزدىكتەرى «تازا قازاقستان» باعدارلاماسى اياسىندا ينتەرنەتپەن قامتۋ, اباتتاندىرۋ مەن كوگالداندىرۋدا كرەاتيۆتى ءادىس قولدانۋ, تۇرمىستىق قالدىقتاردى تازالاۋ, حالىقتىڭ الەۋمەتتىك جاعدايىن جاقسارتۋ, ينفراقۇرىلىمدى, ءتۋريزمدى, ساياباقتار مەن جاسىل جەلەكتەردى دامىتۋ, ۇلگىلى اۋىل, ءتارتىپ پەن زاڭدى, مادەني مۇرانى ساقتاۋ, ەلدى مەكەندەر اراسىنداعى جولداردىڭ ساپاسىن جاقسارتۋ, سەنبىلىك وتكىزۋ, حالىقتى ەكولوگيالىق ءىس-شارالارعا بەلسەندى تارتۋ, ماڭىزدى نىساندارمەن قامتاماسىز ەتۋ, ينۆەستيتسيا تارتۋ, ەكونوميكالىق الەۋەتتى نىعايتۋ, قوعامدىق ورىنداردىڭ تازالىعى, مەتسەناتتارمەن بەلسەندى جۇمىس باعىتتارىندا 20-عا جۋىق اتالىم بويىنشا انىقتالدى.
سالتاناتتى جيىنعا قاتىسقان وبلىس اكىمى بەرىك ءۋالي تازالىق مادەنيەتىن قالىپتاستىرۋ ءار تۇرعىننىڭ جەكە جاۋاپكەرشىلىگى ەكەنىن باسا ايتتى.
– ءوڭىر ەكونوميكاسى, ونەرى مەن مادەنيەتى, ەكولوگياسى مەن تازالىعى – بارشامىزعا ورتاق. تازالىق دەگەنىمىز – جىلىنا ءبىر رەت سەنبىلىككە قاتىسۋ ەمەس, وڭىردە قالىپتاسۋعا ءتيىس مادەنيەت. مەملەكەت باسشىسى قاسىم-جومارت توقاەۆ بۇل جونىندە «قالالار مەن اۋىلداردىڭ ساۋلەتتى, ساياباقتار مەن اۋلانىڭ تازا بولۋى ەڭ الدىمەن باسقاعا ەمەس, وزىمىزگە كەرەك», دەپ ايرىقشا اتاپ ءوتتى. تۋعان جەرىمىزدىڭ تۇلەگەنى, تۇرعان ورتامىزدىڭ تازالىعى – اكىمدىك پەن كوممۋنالدىق قىزمەتتىڭ عانا ەمەس, ءاربىر ازاماتتىڭ, ءاربىر وتباسىنىڭ جاۋاپكەرشىلىگى. بۇگىنگى ماراپات – سىزدەردىڭ بىرلىكتەرىڭىز بەن ەڭبەكقورلىقتارىڭىزدىڭ جەمىسى. سىزدەر ءوز اۋىلدارىڭىزدى اباتتاندىرىپ, كوگالداندىرۋ ارقىلى وزگەلەرگە ۇلگى كورسەتتىڭىزدەر. بايقاۋعا قاتىسىپ, بەلسەندىلىك تانىتقان ەلدى مەكەندەرگە 20 جاڭا تراكتوردىڭ كىلتىن تابىستاپ وتىرمىز. تەحنيكالار اۋىلدارىڭىزدىڭ گۇلدەنىپ, تازا ءارى جايلى بولۋىنا قىزمەت ەتەدى دەپ سەنەمىن. بۇل بايقاۋدى داستۇرگە اينالدىرىپ, كەلەر جىلدارى دا جالعاستىرامىز. تازالىق اكتسياسىنا قاتىسقان قاراپايىم ازاماتتاردى نازاردان تىس قالدىرماي, ىنتالاندىرىپ, ماراپاتتاپ وتىرامىز, – دەدى ءوڭىر باسشىسى.
وبلىس اكىمى جىل باسىندا ءوڭىر تۇرعىندارىنا ارنايى بەينەۇندەۋ جاساپ, جالپىوڭىرلىك سەنبىلىككە بەلسەندى قاتىسۋعا شاقىرىپ, جىل سوڭىندا ارنايى بايقاۋ وتكىزىلىپ, جەڭىمپازدار انىقتالاتىنىن ايتقان ەدى. بۇل جيىن سول باستامانىڭ ناتيجەسى. ەندى بۇل 20 ەلدى مەكەننىڭ مۇرتىن بالتا شاپپايدى, قىستا جولدى قار باسادى دەپ قىسىلمايدى, كوكتەمگى قار سۋىنان دا ساسپايدى – تەحنيكانىڭ اتى تەحنيكا. ۇلكەندەردىڭ ايتۋىنشا, بۇرىنعى كەزەڭدە قىستا جولدى قار باسۋ, كوكتەمدە سۋ باسۋ جاعدايلارى سيرەك بولاتىن. ويتكەنى تەحنيكانىڭ كۇشىنە سۇيەنەتىن, سەنەتىن.
وبلىس اكىمدىگى ءباسپاسوز قىزمەتىنىڭ مالىمەتىنشە, وتكەن جىلى وڭىردە «تازا قازاقستان» باعدارلاماسى اياسىندا اۋقىمدى جۇمىس اتقارىلدى. تازالىق ناۋقانىنا 349 مىڭنان استام تۇرعىن اتسالىسىپ, 52 مىڭ توننا قالدىق شىعارىلدى. 70 مىڭنان استام كوشەت ەگىلدى. عارىشتىق مونيتورينگ ارقىلى انىقتالعان 191 رۇقسات ەتىلمەگەن قوقىس ورىندارى جويىلدى.
اباي وبلىسى
