الەۋمەتتىك جوبالار قوعامنىڭ ەڭ وزەكتى سالالارىن – ينكليۋزيا, مەديتسينا, ءبىلىم, مادەنيەت جانە سپورت باعىتتارىن قامتىپ, 1 ميلليوننان استام ازاماتتىڭ ومىرىنە وڭ وزگەرىس اكەلدى. بۇل دەگەنىمىز كومەككە مۇقتاج ادامداردىڭ ءومىر ساپاسىنىڭ ارتۋى, بالالاردىڭ ساپالى ءبىلىم مەن سپورتقا قول جەتكىزۋى, ەرەكشە جانداردىڭ قوعامعا بەيىمدەلۋى. سونىمەن قاتار قور جوبالارىنىڭ ناتيجەسىندە 600-گە جۋىق ادام تۇراقتى جۇمىسپەن قامتىلدى.
«سامۇرىق-قازىنا» اق باسقارما توراعاسى نۇرلان جاقىپوۆ قور ستراتەگياسىنىڭ ماڭىزدى مىندەتتەرىنىڭ ءبىرى رەتىندە كورپوراتيۆتىك الەۋمەتتىك جاۋاپكەرشىلىك ۇزاق مەرزىمگە جوسپارلانىپ, باستامالار وڭىرلەردە جۇيەلى, تۇراقتى جۇمىس ىستەۋ كەرەكتىگىن اتاپ وتكەن بولاتىن. بۇل باعىتتا وتكەن جىلى 12,5 ملرد تەڭگەگە 39 الەۋمەتتىك جوبا قولداۋ تاپتى.
قور ەلدە 55 وڭالتۋ ورتالىعىن اشىپ, ينكليۋزيۆتى كابينەتتەردىڭ مودەلىن ەنگىزدى
2025 جىلى قور ەلىمىزدەگى وڭالتۋ قىزمەتىن ودان ءارى قولجەتىمدى ەتتى. الماتى مەن قىزىلوردادا ءۇش جاسقا دەيىنگى بالالارعا ارنالعان ەرتە ارالاسۋ ورتالىقتارى, ال تۇركىستان, قاراعاندى, اقتاۋدا ءاۋتيزمى بار بالالارعا ارنالعان ورتالىقتار ىسكە قوسىلدى. جاڭا ۇلگىدەگى «Ainala» اتتى ارالاس ۇلگىدەگى وڭالتۋ ورتالىقتارىن اشۋ جوباسى قولعا الىندى. وسىلايشا, قور كومپانيالار توبى اتىنان بۇگىندە وڭالتۋ ورتالىقتار سانى 55-كە جەتىپ, جىل سايىن 21 مىڭعا تارتا ەرەكشە بالا كەشەندى كومەك الادى.
«Samruk-Kazyna Trust» ەرەكشە وقۋشىلاردىڭ ءوز قاتارلاستارىمەن بىرگە ءبىلىم الۋى مەن دامۋىنا جاعداي جاساۋدى جالعاستىردى. استانا قالاسى, اقمولا جانە اتىراۋ وبلىستارىنداعى مەكتەپتەردە 17 ينكليۋزيانى قولداۋ كابينەتى اشىلدى. سوڭعى ەكى جىلدا ينكليۋزيا سىنىپتارىنىڭ سانى 31-گە جەتىپ, 2000 بالا ينكليۋزيۆتى بىلىممەن قامتىلدى.
«سالاماتتى قازاقستان» مەديتسينالىق-قۇقىقتىق پويىزى 2025 جىلى شالعاي 123 ەلدى مەكەندە بولىپ, ونداعى 100 مىڭنان استام اۋىل تۇرعىنى دارىگەرلەردىڭ قابىلداۋىنان ءوتىپ, زاڭگەرلىك, مەدياتيۆتىك كەڭەس الدى. ولاردىڭ 57 مىڭى – ايەلدەر. جوبا «Samruk-Kazyna Trust» قورى, قازاقستان پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا جانە دەنساۋلىق ساقتاۋ مينيسترلىگىمەن سەرىكتەستىكتە ىسكە اسىرىلىپ جاتىر.
18 سپورت كەشەنى 740 مىڭ اۋىل بالاسىنا سپورت الەمىنە جول اشتى
وڭىرلەردەگى سپورت ينفراقۇرىلىمى ماسەلەسى دە نازاردان تىس قالعان جوق. اقمولا وبلىسىنىڭ قاجىمۇقان اۋىلىندا, ماڭعىستاۋ وبلىسىنىڭ داۋلەت اۋىلىندا, باتىس قازاقستان وبلىسىنىڭ ءجاڭاومىر اۋىلىندا سپورت نىساندارى پايدالانۋعا بەرىلدى. مۇنداي كەشەندەر جەرگىلىكتى بالالار مەن جاسوسپىرىمدەردىڭ بوس ۋاقىتىن ۇيىمداستىرۋعا مۇمكىندىك بەرەدى. قور مالىمەتىنشە, سوڭعى بەس جىلدا ءتۇرلى نىسانداعى 18 سپورت كەشەنى سالىنعان. بۇل سپورتتى 740 مىڭ تۇرعىنعا قولجەتىمدى ەتتى.
قور قامقورلىعىنداعى 200-دەن اسا بالا ءبىلىم
گرانتتارىنا يە بولدى
جۇمىسشى ماماندىقتارىنىڭ جىلى اياسىندا پاۆلودار مەن شىعىس قازاقستان وبلىستارىندا «سامۇرىق ءۇمىتى» جوباسى باستالدى. ماقساتى – بالالار ۇيلەرىنىڭ تاربيەلەنۋشىلەرىنە ماماندىقتى سانالى تاڭداۋىنا كومەك بەرۋ. بۇگىنگى كۇنى 100 بالانىڭ 39-ى جۇمىسشى ماماندىق بويىنشا ورتا تەحنيكالىق وقۋعا ءتۇستى. ولارعا «سامۇرىق-قازىنا» قورىنىڭ قىزمەتكەرلەرى تالىمگەر رەتىندە بەكىتىلىپ, كاسىبي جانە تۇلعالىق دامۋىنا قولداۋ كورسەتىپ كەلەدى. بولاشاقتا «سامۇرىق-قازىنا» كومپانيالار توبىنا جۇمىسقا قابىلدانۋىنا مۇمكىندىكتەرى زور. الەۋمەتتىك وسال توپتارعا ارنالعان «جارقىن بولاشاق» جوباسى اياسىندا ماڭعىستاۋ وبلىسىنان 177 بالا كوللەدجگە وقۋ گرانتىن الىپ, ونىڭ 56-سى بيىل وقۋدى ءتامامدادى. جىل سايىنعى «تۋعان ەلگە ساياحات» جوباسى كاسىپتىك باعدارلاۋ فورماتىنا اۋىسىپ, 400 بالا ەلىمىزدىڭ 5 وڭىرىندە تاريحي جانە وندىرىستىك ورىنداردى ارالادى. ال «Exxon Mobil» كومپانياسىمەن بىرلەسە ىسكە اسقان «Stem Hanym» جوباسى اتىراۋ وبلىسىنداعى 1 مىڭ ايەلگە مۇمكىندىك اشتى. STEM باعىتىندا ءبىلىم العانداردىڭ 300-ءى ارنايى سەرتيفيكاتتالعان ترەنەر اتاندى.
زاعيپ جاندارعا ارنالعان كىتاپحانا مەن مادەني-الەۋمەتتىك وشاقتار
«سامۇرىق-قازىنا» قورى ەلدىڭ مادەني-رۋحاني دامۋىنا تۇراقتى قولداۋ ءبىلدىرىپ, ءتول ونەرىمىز بەن تاريحىمىزدى دارىپتەيتىن جوبالاردى جۇزەگە اسىرىپ كەلەدى. قوردىڭ باستاماسىمەن اشىلعان مادەني-الەۋمەتتىك وشاقتار – جاس ۇرپاقتىڭ رۋحاني ازىعى مەن ۇلتتىق سانانى قالىپتاستىرۋدىڭ التىن دىڭگەگى. بىلتىر ورالدا كرەاتيۆتى حاب, قىزىلوردادا جاڭا تاريحي-ولكەتانۋ مۋزەيى اشىلدى. سەمەيدە كورۋ قابىلەتى تومەن ازاماتتارعا ارنالعان كىتاپحانا, تاراز جانە شىمكەنت قالاسىندا ەگدە جاستاعىلارعا ارنالعان بەلسەندى ۇزاق ءومىر ءسۇرۋ ورتالىعى جۇمىسىن باستادى. بيىل الماتىداعى ءابىلحان قاستەەۆ اتىنداعى ۇلتتىق مۇراجايى اۋقىمدى جوندەۋدەن ءوتىپ, ونەرسۇيەر قاۋىمعا جاڭا بەينەدە ەسىگىن ايقارا اشتى.
ءار تەڭگەنىڭ ەسەبى: قوعام الدىنداعى اشىقتىق پەن جاۋاپكەرشىلىك
قايىرىمدىلىق – تەك ىزگى ءىس قانا ەمەس, حالىق الدىنداعى ابىرويى جوعارى, جاۋاپكەرشىلىگى زور ءىس. سوندىقتان ءار تەڭگەگە ەسەپ – قاجەتتىلىك ەمەس, مىندەت. 2025 جىلى «Samruk-Kazyna Trust» جىل سايىنعى ءداستۇرىن جالعاستىرىپ, قايىرىمدىلىق قىزمەتىنىڭ قورىتىندىلارىن استانادا وتكەن «قايىرىمدىلىق. سەنىم. سەرىكتەستىك» اتتى ەسەپتىك شاراسىندا تانىستىردى. «Samruk-Kazyna Trust» قورىنىڭ باس ديرەكتورى الفيا اديەۆانىڭ ايتۋىنشا, ءاربىر جوبا جۇيەلى, سەرىكتەستىككە نەگىزدەلگەن, ناتيجەگە باعىتتالعان تياناقتى ىستەر جيىنتىعى.
«جىل وتكەن سايىن الەۋمەتتىك, مادەني جانە ينفراقۇرىلىمدىق قاجەتتىلىك پەن سۇرانىس ارتىپ كەلەدى. وسىعان سايكەس ەلدىڭ ناقتى مۇقتاجىنا باعىتتالعان جوبالار سانى دا جىل سايىن كوبەيىپ وتىر. سوڭعى 10 جىل ىشىندە 400-دەن استام الەۋمەتتىك ماڭىزى بار جوبا جۇزەگە اسىرىلىپ, جاڭا نىساندار پايدالانۋعا بەرىلدى. سونىڭ ناتيجەسىندە جۇزدەگەن جاڭا جۇمىس ورىنى اشىلدى. تەك بيىلدىڭ وزىندە 600-گە جۋىق ازامات تۇراقتى جۇمىسپەن قامتىلدى», – دەپ اتاپ ءوتتى الفيا اديەۆا.
2026 جىل – «Samruk-Kazyna Trust» قورىنىڭ قۇرىلعانىنا 10 جىل. سوندىقتان يگى ىستەر ەسەلەنە ءتۇسىپ, ەل يگىلىگىنە باعىتتالعان الەۋمەتتىك جوبالار اۋقىمى كەڭەيىپ, ءاربىر وتانداسىمىزدىڭ ومىرىنە وڭ اسەر ەتەتىن ناتيجەلەرمەن جالعاسىن تابادى.
نازەركە سۇلەيمەنوۆا
