جيىندا ۇكىمەت باسشىسى ورنىقتى ەكونوميكالىق ءوسۋدى قامتاماسىز ەتۋ مەن حالىقتىڭ ناقتى ءال-اۋقاتىن ارتتىرۋ باسىم مىندەت بولىپ قالا بەرەتىنىن اتاپ ءوتىپ, ساراپتاما مەن كەڭەستەر الۋعا جۇمىس تاسىلدەرىن جان-جاقتى تالقىلاۋ بويىنشا كەزدەسۋلەردىڭ ماڭىزدىلىعىنا توقتالدى.
كەزدەسۋ بارىسىندا ساراپشىلار قاۋىمداستىعىنىڭ وكىلدەرى ەكونوميكالىق ءوسۋدىڭ نەگىزگى ماسەلەلەرى مەن باعىتتارىنا ءوز باعاسىن بەردى. ساراپشىلار سونداي-اق جاھاندىق ۇدەرىستەر مەن الەمدىك كونيۋنكتۋرانىڭ ىقپالىن ەسكەرە وتىرىپ, ۇلتتىق ەكونوميكانىڭ دامۋ قارقىنىنا قاتىستى بولجامىن ايتتى. سالالىق جاڭعىرتۋدىڭ باسىمدىقتارى, نارىقتىڭ نەعۇرلىم وزەكتى سۇرانىستارى ءارى ولارمەن تەحنولوگيالىق باستامالاردى ءوزارا بايلانىستىرۋ جونىندە ۇسىنىستار ايتىلدى. ينفلياتسياعا قارسى كۇرەس شارالارى, وتاندىق ءوندىرىستى ۇلعايتۋ, سالىقتىق اكىمشىلەندىرۋدى جەتىلدىرۋ, جي-ءدى دامىتۋعا ەلەكتر ەنەرگياسىن ءوندىرۋ, ينۆەستيتسيالار تارتۋ ماسەلەلەرى تالقىلاندى.
سالىق رەفورماسىن تالقىلاۋ كەزىندە وتپەلى كەزەڭنىڭ ماڭىزدىلىعى اتاپ ءوتىلدى. ۇكىمەتتىڭ شەشىمىنە سايكەس ققس بويىنشا ەسەپكە قويۋ شەگىنەن اسقان سالىق تولەۋشىلەر اكىمشىلىك جاۋاپكەرشىلىككە تارتىلمايدى. سالىقتار بويىنشا ءوسىمپۇلدار مەن ايىپپۇلدار قارىزدىڭ نەگىزگى سوماسى 2026 جىلعى 1 ساۋىرگە دەيىن وتەلگەن جاعدايدا ەسەپتەن شىعارىلادى.
كەزدەسۋدى قورىتىندىلاعان پرەمەر-مينيستر ۇكىمەت پەن ساراپشىلار قاۋىمداستىعى اراسىنداعى تۇراقتى ديالوگتىڭ ماڭىزدىلىعىن اتاپ ءوتىپ, جاۋاپتى مەملەكەتتىك ورگاندارعا ايتىلعان ۇسىنىستاردى پىسىقتاۋدى تاپسىردى.
