بالمۇزداق اۆتورى – ەڭبەكشىقازاق اۋدانىنداعى سارىبۇلاق اۋىلىندا تۇراتىن 38 جاستاعى كاسىپكەر ازانگۇل ءالبوسىن.
جوبا «قازاقتانۋ» مادەني-اعارتۋشىلىق باعىتى اياسىندا ىسكە اسىپ جاتىر. ونىڭ ماقساتى – كونە داستۇرلەردىڭ قازىرگى ومىرمەن ۇندەسە الاتىنىن كورسەتۋ. بۇل جەردە ۇلتتىق اس جاي عانا تاعام ەمەس, تۇتاس ءبىر وركەنيەتتىڭ, تاريح پەن دۇنيەتانىمنىڭ كورىنىسى.
اكە ارمانى – قىز مۇراتى
ازانگۇل ءالبوسىن ماماندىعى – زاڭگەر. قازاقستانعا كوشپەي تۇرىپ قىتايدا سۋديا قىزمەتىن اتقارعان. تاريحي وتانىنا ورالۋ تۋرالى ارمان بالا كەزىنەن پايدا بولعان. اتا-اناسى ۇنەمى اتا جۇرت تۋرالى ايتىپ, اكەسى تۇيە شارۋاشىلىعىن اشۋدى اڭساعان.
شامامەن ون بەس جىل بۇرىن ازانگۇل ەلگە قونىس اۋدارىپ, تۇرمىس قۇرىپ, جۇبايى جارقىن جۇماعازىمەن بىرگە شارۋا قوجالىعىن دامىتا باستايدى. العاشىندا ەشكى مەن جىلقى ءوسىرىپ, ەشكى ءسۇتى مەن قىمىز ساتادى. كەيىن تۇيە وسىرۋگە بەل بۋادى.
العاشقى تۇيەلەر كولىكتى ساتقاننان تۇسكەن قارجىعا الىنعان. تاجىريبە جۇزىندە ۇيرەنىپ, ءتۇرلى فەرمالاردى ارالاپ, شۇبات دايىنداۋ تەحنولوگياسىن مەڭگەرگەن.
«ول كەزدە تۇيە ءسۇتىن ستاقانمەن ساتىپ جۇردىك. بازارعا, ادام كوپ جۇرەتىن جەرلەرگە اپاراتىنبىز. كولىك تە جوق, كۇيەۋىم ءوزى تاسيتىن. قيىن بولدى, بىراق سۇرانىس ءوستى, كەيىن ادامدار وزدەرى كەلە باستادى», دەيدى ازانگۇل.
سارىبۇلاقتاعى فەرما
وتباسى ون جىل بۇرىن سارىبۇلاق اۋىلىنا كوشىپ كەلدى. قازىر فەرمادا سەكسەنگە جۋىق تۇيە بار. شۇبات, قۇرت, تۇيە مايى تەك اۋدان ىشىندە ەمەس, وزگە وڭىرلەرگە دە جونەلتىلەدى.
ءۇش جىل بۇرىن كاسىپكەرلەر الماتى وبلىسىنىڭ اكىمى مارات سۇلتانعازيەۆكە بيزنەس-جوباسىن ۇسىندى. جوبا قولداۋ تاۋىپ, قاراجوتين اۋىلدىق وكرۋگىنەن بوس جەر تەلىمى بەرىلدى.
«تۇيە شارۋاشىلىعى بيزنەس قانا ەمەس. قازاق ءۇشىن تىرشىلىك كوزى. ءسۇتىن, ءجۇنىن, تەرىسىن تۇرمىستا پايدالانعان. ءبىز وسى ءداستۇردىڭ بولاشاعى بار ەكەنىن كورسەتكىمىز كەلەدى», دەيدى كاسىپكەر.
ازانگۇل تۇيە جۇنىنەن كورپە, جاستىق, بەلگە ارنالعان ەمدىك بەلبەۋ تىگەدى. الداعى جوسپارى - اۋىل ايەلدەرىنە ارنالعان قولونەر مەكتەبىن اشۋ.
شۇباتتان بالمۇزداق قالاي جاسالادى؟
حالىقارالىق وقۋدان ءوتىپ, ارنايى قۇرال-جابدىق ساتىپ العان ازانگۇل بىلتىر «قازاق قىزى» برەندىمەن شۇباتتان بالمۇزداق شىعارا باستادى.
ء«سۇتتى باياۋ قايناتۋ كەرەك. ول 20 ساعاتقا دەيىن سوزىلادى, قويۋلانىپ قويۋلاندىرىلعان سۇتكە ۇقسايدى. سوسىن توساپ قوسامىن. قازىر جيىرماعا جۋىق ءدام بار: شوكولاد, قۇرما, كارامەل, جيدەك, قاۋىن», دەيدى ول.
بالمۇزداق تولىقتاي تابيعي. كونسەرۆانت جوق, قانت مولشەرى از. ءداستۇرلى بالمۇزداقتان كەم ەمەس, بىراق دارۋمەنى مەن قۋاتى مول.
العاشىندا ءونىم شەلەك اۋىلىنداعى شاعىن دۇكەندە ساتىلدى. قازىر الماتىداعى ءدامحانالار مەن مەيرامحانالار تاپسىرىس بەرەدى. قاپتاما ديزاينىن دا كاسىپكەردىڭ ءوزى ازىرلەگەن.
ۇلى ماقسات
وتكەن جىلى ازانگۇل ء«بىر اۋىل – ءبىر ءونىم» جوباسىنا قاتىسىپ, كورمەگە شىقتى. شۇبات بالمۇزداعى كوپشىلىككە ۇناعانىمەن, مەملەكەتتىك قولداۋ سول جولى بۇيىرمادى.
«قازاقستاندى الەمگە تانىتاتىن دۇنيە – ءداستۇر مەن مادەنيەت. ءبىزدىڭ دە ءوز گاسترونوميالىق برەندىمىز بولۋى كەرەك. «قازاقستاندا جاسالعان» دەگەن بەلگىسى بار ءونىم كوبەيسە دەيمىن», دەيدى ول.
الداعى ۋاقىتتا تۇيە سانىن ارتتىرىپ, بوتەلكەگە قۇيىلعان شۇبات تسەحىن اشۋ جانە بالمۇزداق ءوندىرىسىن كەڭەيتۋ جوسپارلانعان.
