«ەكو تاكسي» جوباسى 2024 جىلى مەملەكەت باسشىسىنىڭ «تازا قازاقستان» جالپىۇلتتىق ەكولوگيالىق باستاماسى اياسىندا ىسكە قوسىلعان بولاتىن. وتاندىق سەرۆيستىڭ باستى ماقساتى – كولىك جۇرگىزۋشىلەرىنە قولايلى جاعداي جاساۋ. مۇندا ءار جۇرگىزۋشىگە ءبىر رەيس ءۇشىن 60 تەڭگە تولەنەدى, ال تاپسىرىستىڭ قالعان سوماسى ونىڭ ەسەبىنە تىكەلەي تۇسەدى. جۇرگىزۋشىلەرگە ۇيلەستىرۋشى ۇيىمدار ارقىلى جالاقى مەن الەۋمەتتىك اۋدارىمدار تولەنەدى, جۇمىسقا شىققاندار كۇن سايىن مەديتسينالىق تەكسەرۋدەن وتەدى. سەرۆيستىڭ جۇمىسىن مەملەكەتتىك ورگاندار قاتاڭ باقىلاۋدا ۇستايدى.
دەپۋتات: «تاكسي جۇرگىزۋشىسى» ۇعىمىن زاڭنامالىق تۇرعىدا بەكىتكەن ءجون
ءماجىلىس دەپۋتاتى مۇرات ابەنوۆ قازىر پارلامەنتتە شەتەلدىك اگرەگاتورلاردىڭ قىزمەتى قىزۋ تالقىلانىپ جاتقانىن, ولاردا ەڭبەك تالاپتارى ءجيى بۇزىلاتىنىن ايتتى.
«كوميسسيا 25 پايىزعا دەيىن جەتەدى, جۇرگىزۋشىلەر مىندەتتى مەديتسينالىق تەكسەرۋدەن وتپەيدى, الەۋمەتتىك جانە زەينەتاقى جارنالارىن المايدى, ساقتاندىرىلمايدى, باقىلاۋ جوق. ال كىرىس شەتەلگە كەتەدى. بۇل ماڭىزدى ماسەلە», دەپ اتاپ ءوتتى دەپۋتات.
سونداي-اق دەپۋتاتتار قىزىلورداداعى پرەزيدەنتتىك ساياباقتى قايتا قۇرۋ بارىسىمەن تانىستى. جاڭارتۋ جۇمىستارى اياقتالعان سوڭ ساياباق كوپ فۋنكتسيالى دەمالىس ايماعىنا اينالۋعا ءتيىس. ءسويتىپ, 300 ورىندىق بالالار لاگەرى, بوتانيكالىق باق, سۋبۇرقاقتارى بار اللەيالار, امفيتەاتر, سپورت جانە ويىن الاڭدارى, workout ورىندارى, فۋدكورت, ۆەلوجولدار مەن شاعىن سۋ ارنالارى پايدا بولادى.
ماجىلىسمەندەردىڭ ايتۋىنشا, سوڭعى ەكى جىلدا وڭىردە 200-دەن استام الەۋمەتتىك نىسان سالىندى, قازىر جۇزگە جۋىق نىسان قايتا جاڭارتىلىپ جاتىر.
