فوتو: اشىق دەرەككوز
CNN مالىمەتىنشە, تەگەران پروۆينتسياسىنىڭ باحارەستان وكرۋگىندە يران بيلىگى شامامەن 100 ادامدى ۇستاعان. بۇل – ەل استاناسى ماڭىنداعى اۋدان. ۇستالعان ازاماتتار قوعامدىق ءتارتىپتى بۇزدى جانە جاپپاي تارتىپسىزدىكتەر ۇيىمداستىردى دەگەن ايىپپەن قاماۋعا الىنعان. بۇل تۋرالى Tasnim اگەنتتىگىنە جەرگىلىكتى شەنەۋنىكتەردىڭ ءبىرى حابارلاعان.
ونىڭ ايتۋىنشا, ۇستالعانداردىڭ ءبىر بولىگى بەيبىت تۇرعىندار مەن قاۋىپسىزدىك كۇشتەرىنە قارسى اتىس جانە سۋىق قارۋ قولدانعان. الايدا ناقتى ەپيزودتار بويىنشا ەگجەي-تەگجەيلى مالىمەت بەرىلمەگەن.
باق: يراننىڭ رۋحاني جەتەكشىسى ماسكەۋگە قاشۋدى جوسپارلاپ وتىر
سونىمەن قاتار قۇقىق قورعاۋ ۇيىمدارى نارازىلىق سالدارى الدەقايدا اۋقىمدى ەكەنىن العا تارتىپ وتىر. اقش-تا ورنالاسقان HRANA اگەنتتىگىنىڭ دەرەگىنە سايكەس, ەكى اپتا ىشىندە ەل بويىنشا كەمىندە 65 ادام قازا تاپقان. ولاردىڭ ىشىندە 14 قاۋىپسىزدىك قىزمەتكەرى جانە 48 نارازىلىققا قاتىسۋشى بار. ۇستالعاندار سانى 2 300 ادامنان اسقان.
ال Time جۋرنالى بۇدان دا قاتاڭ دەرەكتەر كەلتىرەدى. باسىلىم دەنساۋلىق ساقتاۋ سالاسىنداعى دەرەككوزدەرگە سىلتەمە جاساپ, قازا تاپقاندار سانى 217 ادامنان كەم ەمەس ەكەنىن جازادى. قۇربانداردىڭ باسىم بولىگى اتىس جاراقاتىنان كوز جۇمعان. مالىمەت بويىنشا, تەگەرانداعى التى اۋرۋحانانىڭ وزىندە جۇزدەگەن نارازىلىققا قاتىسۋشىنىڭ ءولىمى تىركەلگەن, ولاردىڭ كوپشىلىگى – جاستار. الايدا جۋرنال بۇل اقپاراتتى دەربەس راستاۋ مۇمكىن بولماعانىن اتاپ وتەدى.
وسى جاعداي اياسىندا ساياسي ريتوريكا دا كۇشەيىپ كەلەدى. يراننىڭ سوڭعى شاحىنىڭ ۇلى, تاق مۇراگەرى رەزا پەحلەۆي نارازىلىق بىلدىرۋشىلەردى تەك ميتينگىلەرمەن شەكتەلمەي, قالالارداعى ماڭىزدى نىسانداردى باسىپ الىپ, باقىلاۋدا ۇستاۋعا دايىندالۋعا شاقىردى. ال يران بيلىگى بۇعان دەيىن نارازىلىق اكتسيالارىنا قاتىسۋشىلارعا ءولىم جازاسىن قولدانۋ مۇمكىندىگىن جوققا شىعارماعان.
سونىمەن قاتار بۇقارالىق اقپارات قۇرالدارى مەن الەۋمەتتىك جەلىلەردە تەگەراندا تارتىپسىزدىكتەر كەزىندە ونداعان مەشىتتىڭ ورتەلگەنى تۋرالى مالىمەتتەر تارادى. مونيتورينگتىك توپتار ەل ىشىندە ينتەرنەتتىڭ تولىق وشىرىلگەنىن دە حابارلاپ وتىر.
يراندا ۇلتتىق ۆاليۋتانىڭ قۇلدىراۋى جاپپاي نارازىلىقتى كۇشەيتتى
اقش-تىڭ پرەزيدەنتى دونالد ترامپ اق ۇيدە وتكەن بريفينگتە يرانداعى جاعدايعا قاتىستى پىكىر ءبىلدىرىپ, ەگەر قاۋىپسىزدىك كۇشتەرى دەمونسترانتتارعا وق اتسا, اقش تاراپىنان جاڭا سوققىلار جاسالۋى مۇمكىن ەكەنىن ايتتى.
«ەگەر ولار اتاتىن بولسا, ءبىز دە اتامىز», دەدى دونالد ترامپ.
