فوتو: اشىق دەرەككوز
ناۋرىز بەن ميرامگۇلدى ىزدەۋ بەس كۇننەن استام ۋاقىتتان بەرى جالعاسىپ جاتىر.
قازىر اۋماقتا پوليتسيا مەن ۇلتتىق ۇلاننىڭ از عانا كۇشى جۇمىلدىرىلعان. جىلجىمالى شتاب قۇرىلعان. قۇقىق قورعاۋشىلاردىڭ ايتۋىنشا, ىزدەۋ مەن تەرگەۋ جۇمىستارى توقتاعان جوق, بۇرىن مۇندا اۋقىمدى شارالار وتكىزىلگەنىنە قاراماستان جالعاسىپ جاتىر.
پوليتسيا قىزمەتكەرلەرىنىڭ ءبىرى اتى-ءجونىن اتاماۋدى سۇراپ, تەرگەۋ بارلىق نۇسقالاردى قاراستىرىپ جاتقانىن ايتتى. ونىڭ ىشىندە كۇدىكتىنىڭ تۇرعان جەرىنە بايلانىستى نۇسقا دا بار.
اتىراۋداعى جوعالعان وتباسىنىڭ قىزى مەن بالاسىن سۇڭگۋىرلەر ىزدەپ, تابا المادى
بۇل اۋماققا نازار اۋدارىلۋى بەكەر ەمەس. بەلگىلى بولعانداي, كۇدىكتى سۇلتان سارسەماليەۆ پەن جۇبايى اقبايان وسى ماڭدا 50 مىڭ تەڭگەگە ۋاقىتشا ءۇي جالداپ تۇرعان. ولار ءبىراز ۋاقىت سوندا ءومىر سۇرگەن. كورشىلەس ۇيلەردىڭ ءبىر بولىگى بوس, ءبىر بولىگى جالعا بەرىلگەن.
ءۇيدىڭ ىشىندە تەرگەۋشىلەردىڭ مۇقيات جۇمىسىنىڭ ىزدەرى بايقالادى. بولمە تولىق قارالعان, زاتتار شاشىلىپ جاتىر. بولمەنىڭ ورتاسىندا كىلەم ۇقىپتاپ جيناۋلى تۇر. تەرەزەنىڭ ءبىر جاقتاۋىنان پلومبانى العاننان كەيىن تەرگەۋ كەزىندە قولدانىلاتىن قىزىل بوياۋدىڭ ءىزى قالعان.
اۋلا مەن ماڭايدا بۇرىن جۇرگىزىلگەن جۇمىستاردىڭ ىزدەرى ساقتالعان. جەر قازىلعان, كەي جەرلەردە تەحنيكانىڭ ىزدەرى كورىنەدى. ىزدەۋ ءۇشىن بۇعان دەيىن كوپ كۇش پەن ارنايى قۇرالدار تارتىلعان. اسىرەسە, جەر استىنداعى نىسانداردى تابۋعا ارنالعان گەورادار قولدانىلعان. ونى ورالدان جەتكىزگەن. سول قۇرالدىڭ كومەگىمەن اۋلا, ماڭايداعى ۋچاسكەلەر جانە ءۇيدىڭ اينالاسى تۇگەل تەكسەرىلگەن.
بۇل اۋدان بىركەلكى سالىنباعان, ساياجايلارمەن شەكتەسەدى. مۇندا بەينەباقىلاۋ كامەرالارى از. كورشىلەردىڭ كامەرالارى جازبالاردى 15 كۇننەن ارتىق ساقتامايدى, بۇل وقيعانىڭ حرونولوگياسىن قالپىنا كەلتىرۋدى قيىنداتادى.
اتىراۋ وبلىسىندا جوعالىپ كەتكەن وتباسى: تىڭ دەرەكتەر جاريالاندى
كورشىلەس وزبەكستان ازاماتتارى تۇرادى. ولاردىڭ ايتۋىنشا, ەشقانداي كۇماندى جاعدايدى ەستىمەگەن, كورمەگەن. تەرگەۋ بارىسىندا ىقشاماۋداننىڭ باسقا تۇرعىندارى دا سۇرالدى. بارلىعى دا جانجال, شۋ نەمەسە وعاش ارەكەتتەردى بايقاماعانىن ايتتى.
كورشىلەرى وتباسىن تۇيىق ادامدار دەپ سيپاتتايدى. ولار سىرتقا سيرەك شىققان, اينالاداعى ادامدارمەن كوپ ارالاسپاعان.
ىزدەۋ بارىسىندا اۋلا مەن ماڭاي تۇگەل تەكسەرىلگەن: قازۋ جۇمىستارى جۇرگىزىلگەن, ءشوپ پەن قامىس شابىلعان. بىراق ازىرگە ناتيجە جوق. جۇمىستى دالاعا جاقىن ورنالاسۋى, تەمىرجولدىڭ بولۋى, لاي مەن اۋا رايىنىڭ قولايسىزدىعى قيىنداتىپ وتىر.
رەسمي تۇردە تەرگەۋ بارلىق نۇسقانى قاراستىرىپ جاتىر. دەگەنمەن جۇرگىزىلىپ جاتقان جۇمىستار جوعالعانداردىڭ قازا بولۋى مۇمكىن دەگەن بولجامعا كوبىرەك كوڭىل ءبولىنىپ وتىرعانىن كورسەتەدى.
ايتا كەتەيىك, اتىراۋ وبلىسىندا ءتورت ادامنان تۇراتىن وتباسى حابار-وشارسىز كەتكەنى حابارلانعان بولاتىن.
