باعدارلاما سپورتشىلار مەن اۋەسقوي پايدالانۋشىلاردىڭ قوزعالىس تەحنيكاسىن اۆتوماتتى تۇردە تالداپ, جەكە فيزيكالىق كورسەتكىشتەرىنە سايكەس جاتتىعۋ تۇرلەرىن قالىپتاستىرۋعا مۇمكىندىك بەرەدى. جاساندى ينتەللەكت الگوريتمدەرى ارقىلى قوزعالىستاعى قاتەلىكتەر انىقتالىپ, جاتتىعۋ بارىسىندا تيىمدىلىگى ارتادى. جوبانىڭ عىلىمي جەتەكشىسى – ينفورماتيكا جانە اقپاراتتىق تەحنولوگيالار كافەدراسىنىڭ دوتسەنتى, PhD ءادىلجان كەرەەۆ. ونىڭ ايتۋىنشا, بۇل جوبا عىلىم مەن پراكتيكانىڭ توعىسقان ناقتى ناتيجەسى.
«جاساندى ينتەللەكت نەگىزىندەگى بۇل باعدارلاما سپورتتاعى جەكە دايىندىقتى جاڭا دەڭگەيگە كوتەرۋگە مۇمكىندىك بەرەدى. ەڭ ماڭىزدىسى – ستۋدەنتتەر ناقتى وندىرىستىك تاپسىرمالاردى شەشۋ ارقىلى زاماناۋي تەحنولوگيالاردى تاجىريبەدە مەڭگەرىپ جاتىر. جوبانى ازىرلەۋ بارىسىندا عىلىمي-ادىستەمەلىك قولداۋ كورسەتىپ وتىرعان مامان – ۋنيۆەرسيتەتتە كوپ جىلدار بويى دەنە شىنىقتىرۋ پانىنەن ساباق بەرگەن, پەداگوگيكا عىلىمدارىنىڭ كانديداتى, دوتسەنت سەيىتكەرەي مۇحتاروۆ. ونىڭ كاسىبي تاجىريبەسى مەن سپورت سالاسىنداعى عىلىمي ءبىلىمى جوبانىڭ فيزيولوگيالىق, ادىستەمەلىك تالاپتارعا ساي ورىندالۋىنا زور ىقپال ەتەدى», دەيدى جوبا جەتەكشىسى.
جوبانى ىسكە اسىرۋعا «ەسەپتەۋ تەحنيكاسى جانە باعدارلامالىق قامتاماسىز ەتۋ» ءبىلىم بەرۋ باعدارلاماسىنىڭ ستۋدەنتتەرى ەرلان ايمۇقانوۆ پەن كيريلل پيليپەنكو دا جوبا اياسىندا جۇمىس ىستەپ جاتقانىن بىلدىك. ورىنداۋشى ەرلان ايمۇقانوۆتىڭ ايتۋىنشا, باعدارلاما كومپيۋتەرلىك كورۋ تەحنولوگياسى ارقىلى ادامنىڭ قوزعالىسىن ءدال سول ساتتە تانۋعا نەگىزدەلگەن. «بۇل جوبا بىزگە ماشينالىق وقىتۋ مەن دەرەكتەردى تالداۋ ادىستەرىن پراكتيكادا قولدانۋعا مۇمكىندىك بەردى. جاساندى ينتەللەكت جاتتىعۋ ساپاسىن ارتتىرۋعا ناقتى ۇلەس قوسا الادى», دەيدى ول.
مەملەكەت باسشىسى قاسىم-جومارت توقاەۆ جاساندى ينتەللەكتىنى عىلىم مەن يننوۆاتسيانى دامىتۋدىڭ نەگىزگى تەتىگى رەتىندە اتاپ وتكەنى ءمالىم. پرەزيدەنتتىڭ ايتۋىنشا, جاساندى ينتەللەكت سالاسىنداعى عىلىمي زەرتتەۋلەر مەن كادر دايارلاۋ – ەل دامۋىنىڭ ستراتەگيالىق باعىتى. وسى تۇرعىدان العاندا, ق.جۇبانوۆ اتىنداعى اقتوبە وڭىرلىك ۋنيۆەرسيتەتىندە جۇزەگە اسىرىلىپ جاتقان بۇل جوبا ەلىمىزدەگى قولدانبالى جاساندى ينتەللەكت زەرتتەۋلەرىن دامىتۋعا جانە جاس عالىمدار مەن ستۋدەنتتەردىڭ عىلىمي الەۋەتىن ارتتىرۋعا باعىتتالعان ماڭىزدى باستامالاردىڭ ءبىرى بولماق.
جوباعا قاتىسۋشىلاردىڭ ايتۋىنشا, ازىرلەنىپ جاتقان جوبانىڭ مۇمكىندىگى كوپ. اتاپ ايتقاندا, جۇيە جاتتىعۋلار سانىن اۆتوماتتى تۇردە ەسەپتەيدى. سونىمەن قاتار قوزعالىس تەحنيكاسىنداعى قاتەلىكتەردى انىقتايدى. ءتىپتى پايدالانۋشىنىڭ دايىندىق دەڭگەيىنە قاراي جەكە ۇسىنىستار بەرە الادى. سونداي-اق جاراقات الۋ قاۋپىن تومەندەتىپ, جاتتىعۋ تيىمدىلىگى مەن قاۋىپسىزدىگىن ارتتىرادى. الداعى ۋاقىتتا بۇل تەحنولوگيانى سپورت زالدارىندا, ءبىلىم بەرۋ مەكەمەلەرىندە جانە ءۇي جاعدايىنداعى جاتتىعۋلارعا بەيىمدەۋ جوسپارلانىپ وتىر. سونىمەن قاتار جوبا وتاندىق سپورتتىق جابدىقتاردى تسيفرلاندىرۋعا جانە ينتەللەكتۋالدى ترەناجەرلەردى دامىتۋعا باعىتتالعان. مۇنداي جوبالار وڭىرلىك عىلىمنىڭ الەۋەتىن ارتتىرىپ, جاستاردى يننوۆاتسيالىق قىزمەتكە تارتۋعا جانە قازاقستاندا جوعارى تەحنولوگيالى وتاندىق ونىمدەر ۇلەسىن كوبەيتۋگە مۇمكىندىك بەرەدى.
