«Xinfa Group» – سينگاپۋرلىق كومپانيا, ەنەرگەتيكا, اليۋميني, حيميا ونەركاسىبى, سونداي-اق ەكولوگيالىق قۇرىلىس پەن اگرارلىق تەحنولوگيالار سالاسىندا ارتاراپتاندىرىلعان پورتفەلى بار الەمدەگى ەڭ ءىرى يندۋستريالىق حولدينگتەردىڭ ءبىرى. كومپانيا 1972 جىلى قۇرىلعان ءارى بىرنەشە نەگىزگى وندىرىستىك باعىتتاردا جاھاندىق كوشباسشىلىق پوزيتسيالارعا يە.
پاۆلودار وبلىسىندا تولىق تسيكلدى اۋقىمدى ونەركاسىپتىك پارك قۇرۋ جونىندەگى ينۆەستيتسيالىق جوبانىڭ تۇجىرىمداماسى كومىردەن, بوكسيتتەردەن, مىستان, فليۋوريت پەن اكتاستان جوعارى قايتا ءبولۋ ونىمدەرىن شىعارۋ ماقساتىندا شيكىزاتتى تەرەڭ وڭدەۋدى كوزدەيدى. اتاپ ايتقاندا, اليۋميني, اليۋميني مەن مىس ءوندىرۋ بويىنشا مەتاللۋرگيا وندىرىستەرىن سالۋ, جاڭارتىلاتىن ەنەرگيا كوزدەرى بازاسىنداعى نىسانداردى قوسا العاندا, ەنەرگەتيكالىق ينفراقۇرىلىمدى قالىپتاستىرۋ, سونداي-اق سودا, كومىرتەكتى ماتەريالدار مەن ەكولوگيالىق قۇرىلىس شەشىمدەرى وندىرەتىن كاسىپورىنداردى ىسكە قوسۋ جوسپارلانىپ جاتىر. ينۆەستيتسيالاردىڭ جيىنتىق كولەمى شامامەن 15 ملرد دوللار دەڭگەيىندە باعالانادى, بولاشاق يندۋستريالىق پاركتىڭ اۋدانى – 3 مىڭ گەكتاردان استام.
«Xinfa Group» باسقارما توراعاسىنىڭ ورىنباسارى چجاو تينيۋن كومپانيا بوكسيت, كومىر مەن مىس كەن ورىندارىن قوسا العاندا, ەلىمىزدىڭ رەسۋرستىق بازاسىنا الدىن الا تالداۋ جۇرگىزگەنىن ءارى تەرەڭ وڭدەۋ تىزبەگىن قالىپتاستىرۋ مەن قوسىلعان قۇنى جوعارى ءونىم شىعارۋ كونتەكستىندە ولاردىڭ ونەركاسىپتىك الەۋەتىن وڭ باعالايتىنىن اتاپ ءوتتى.
رومان سكليار پرەزيدەنت قاسىم-جومارت توقاەۆتىڭ باعىتىنا سۇيەنە وتىرىپ, ونەركاسىپتىك جاڭعىرتۋدى, ستراتەگيالىق ينۆەستيتسيالاردى تارتۋدى ءارى تەحنولوگيالىق يندۋستريانى دامىتۋدى مەملەكەتتىك ەكونوميكالىق ساياساتتىڭ نەگىزگى باسىمدىقتارى رەتىندە قاراستىراتىنىن ايتتى. ۇكىمەت حالىقارالىق يندۋستريالىق توپتارمەن ۇزاقمەرزىمدى ارىپتەستىك تەتىكتەرىن قوسا العاندا, ءىرى ينۆەستيتسيالىق جوبالاردى سۇيەمەلدەۋ ءۇشىن ورنىقتى قۇقىقتىق ءارى ينستيتۋتسيونالدىق بازا قالىپتاستىردى.
كەزدەسۋ قورىتىندىسى بويىنشا جوبانى ودان ءارى ەگجەي-تەگجەيلى پىسىقتاۋعا, يندۋستريالىق ارىپتەستىكتى كەڭەيتۋگە ءارى ۇزاقمەرزىمدى ينۆەستيتسيالىق ىنتىماقتاستىقتى نىعايتۋعا مۇددەلىلىك راستالدى.
