فوتو: سەناتتىڭ ءباسپاسوز قىزمەتى
ديالوگ بارىسىندا تالقىلانعان تاسىلدەر مەملەكەت باسشىسىنىڭ جۋىرداعى سۇحباتىنداعى ازاماتتاردىڭ ءومىر ءسۇرۋ ساپاسىن ارتتىرۋعا جانە مەملەكەتتىك ساياساتتى ۇزاق مەرزىمدى ناتيجەگە باعىتتاۋعا باسا نازار اۋدارىلعان نەگىزگى ويلارىمەن تولىق سايكەس كەلەتىنى ايتىلدى.
كەزدەسۋدە ەلوردا اۋماعىن كەزەڭ-كەزەڭمەن دامىتۋ ماسەلەلەرى تالقىلاندى. اسىرەسە, قالانىڭ ساۋلەتتىك كەلبەتىن ديزاين-كود تالاپتارىنا ساي قالىپتاستىرۋعا, مادەني-دەمالىس نىساندارى مەن تۇرعىن ءۇي سالۋعا, الەۋمەتتىك ينفراقۇرىلىمدى دامىتۋعا, ەكولوگيالىق تەپە-تەڭدىكتى ساقتاۋعا جانە كولىك جۇيەسىن جاڭعىرتۋعا ايرىقشا نازار اۋدارىلدى.
استانانىڭ 2035 جىلعا دەيىنگى باس جوسپارىنا ەنگىزىلگەن وزگەرىستەر جانە ەلوردالىق اگلومەراتسيانى قالىپتاستىرۋ جوباسى جەكە ءبولىم رەتىندە قارالدى. كەزدەسۋگە قاتىسۋشىلار وسى ستراتەگيالىق قۇجاتتاردى قالا ينفراقۇرىلىمىنا تۇسەتىن ناقتى جۇكتەمەنى جانە حالىقتىڭ سۇرانىسىن ەسكەرە وتىرىپ, قالاي جۇزەگە اسىرۋعا بولاتىنىن تالقىلادى.
ء«بىزدىڭ ماقساتىمىز – پارلامەنتتە قابىلدانىپ جاتقان زاڭداردى حالىققا جەتكىزۋمەن شەكتەلمەي, كاسىبي قوعامداستىقپەن بىرىگىپ, الداعى ۋاقىتتا قانداي زاڭنامالىق باستامالار كەرەكتىگىن تالقىلاۋ. ەلوردا تەز دامىپ جاتىر, سوندىقتان بۇل پروتسەستىڭ باسقارىلۋى جانە ادام مۇددەسىنە باعىتتالۋى وتە ماڭىزدى», دەدى ب.جەكسەنباي.
تالقىلاۋ كەزىندە سەناتور قالالىق كەڭىستىكتى باسقارۋدىڭ زاماناۋي ادىستەرىن ەنگىزۋدىڭ, جاسىل ينفراقۇرىلىمدى دامىتۋدىڭ جانە بارلىق ازاماتتارعا قولجەتىمدى ينكليۋزيۆتى قالالىق ورتانى قۇرۋدىڭ ماڭىزدىلىعىن ەرەكشە اتاپ كورسەتتى.
زاڭنامالىق وزگەرىستەر قابىلدانعان
اتاپ وتىلگەندەي, سوڭعى ەكى جىلدا پارلامەنت قالالاردى كەشەندى دامىتۋعا باعىتتالعان بىرقاتار جۇيەلى زاڭنامالىق وزگەرىستى قابىلدادى. ونىڭ ىشىندە اۋماقتاردى كەشەندى جوسپارلاۋعا, الەۋمەتتىك جانە ينجەنەرلىك ينفراقۇرىلىمدى دامىتۋعا, ەكولوگيالىق تالاپتاردى كۇشەيتۋگە باعىتتالعان قالا قۇرىلىسى قىزمەتى تۋرالى زاڭناماعا ەنگىزىلگەن تۇزەتۋلەر, سونداي-اق جەر كودەكسىنە وزگەرىستەر ەنگىزىلدى.
«قابىلدانعان نورمالار جەر رەسۋرستارىن بارىنشا ءتيىمدى پايدالانۋعا, قوعامدىق جانە الەۋمەتتىك نىسانداردى باسىمدىقپەن دامىتۋعا, جەر ۋچاسكەلەرىن بەرۋ راسىمدەرىنىڭ اشىقتىعىن ارتتىرۋعا مۇمكىندىك بەرەدى. سونىمەن قاتار, جاسىل ايماقتاردى ساقتاۋ جانە ۇلعايتۋ, قوعامدىق كولىكتى دامىتۋ جانە قالاداعى كولىك جۇكتەمەسىن ازايتۋ بويىنشا تالاپتار كۇشەيتىلىپ وتىر», دەدى سەناتور.
تۇرعىنداردىڭ ۇسىنىستارى ەسكەرىلەدى
كەزدەسۋدى قورىتىندىلاي كەلە, بيبىگۇل جەكسەنباي باس جوسپاردى الداعى ۋاقىتتا ناقتىلاۋ كەزىندە, اسىرەسە, اباتتاندىرۋ, قوعامدىق كەڭىستىكتەردى قۇرۋ جانە الەۋمەتتىك نىسانداردى ورنالاستىرۋ ماسەلەلەرى بويىنشا ەلوردا تۇرعىندارىنىڭ ۇسىنىستارى مەن پىكىرلەرىن ەسكەرۋگە ەرەكشە ءمان بەرۋ قاجەتتىگىن اتاپ ءوتتى.
