قازاقستاندا كوپشىلىكتىڭ كۇندەلىكتى تىرشىلىگىنە ءسىڭىپ كەتكەن حقكو بولاشاقتا تۇبەگەيلى وزگەرەدى. جاساندى ينتەللەكت جانە تسيفرلىق دامۋ ۆيتسە-ءمينيسترى روستيسلاۆ كونياشكيننىڭ ايتۋىنشا, حالىققا قىزمەت كورسەتۋ ورتالىقتارى كلاسسيكالىق «تەرەزەلەردەن» باس تارتىپ, سەلف-ايماقتار مەن وزىندىك قىزمەت كورسەتۋ كەڭىستىكتەرى فورماتىنا كوشەدى.
جاڭا ۇلگىدە حقكو قىزمەتكەرلەرى قاعاز قابىلداپ, انىقتاما بەرۋشى ەمەس, كەڭەسشى ءارى تسيفرلىق قىزمەتتەرگە باعىتتاۋشى ءرول اتقارادى. ازاماتتارعا مەملەكەتتىك قىزمەتتەردى ونلاين فورماتتا قالاي الۋ كەرەگىن ۇيرەتۋ – نەگىزگى مىندەت بولماق.
«قوعام بىركەلكى ەمەس. ءبىر ازاماتتار قىزمەتتى الدەقاشان قاشىقتان الىپ ءجۇر, ال ەندى بىرەۋلەر ءۇشىن وپەراتوردىڭ كومەگى ءالى دە قاجەت. سوندىقتان ترانسفورماتسيا بىردەن ەمەس, كەزەڭ-كەزەڭىمەن جۇزەگە اسادى», دەدى ۆيتسە-مينيستر.
ونىڭ سوزىنشە, قالالاردا ءداستۇرلى قىزمەت كورسەتۋ ايماقتارىنىڭ بەلگىلى ءبىر بولىگى ساقتالادى. بۇل – تسيفرلىق قىزمەتتەردى يگەرە الماي وتىرعان ازاماتتار ءۇشىن جاسالاتىن وتپەلى شەشىم.
بيىلدان باستاپ ونلاين كورسەتىلەتىن مەملەكەتتىك قىزمەتتەردىڭ اۋقىمى كەڭەيەدى. جەكە كۋالىكتى جوعالتىپ العان جاعدايدا قايتا راسىمدەۋ, پاسپورتتى العاش رەت الۋ سەكىلدى ماڭىزدى قىزمەتتەر تولىقتاي تسيفرلىق فورماتقا كوشەدى. قازىر جۇرگىزۋشى كۋالىگىن قايتا الۋ ونلاينعا اۋىستىرىلعان, ال ونى العاش رەت الۋ ءۇشىن ءوتىنىش تەك ينتەرنەت ارقىلى قابىلدانادى.
