ءىس-شارادا جاس تالانتتىڭ سوزىنە جازىلعان بىرنەشە جاڭا ءاننىڭ تۇساۋى كەسىلدى. ءانشى-كومپوزيتور ايناش بەيسەن سانجاردىڭ «قيىن ەكەن» شىعارماسىنا جازىلعان جاڭا ءاندى شىرقاپ, كەش يەسىنە ىزگى تىلەگىن جەتكىزدى. ءوز كەزەگىندە جانارىنان نۇر تايسا دا, ءومىردى وزىنشە جاقسى كورەتىن جاس اقىن تىرناقالدى تۋىندىسىنىڭ تانىستىرىلىمىنا كەلگەن كوپشىلىككە ريزاشىلىعىن جەتكىزدى.
ءۇش جاسىندا كوزى كورمەي قالسا دا, تاعدىردان باز كەشپەگەن جاستىڭ جەتكەن جەتىستىگى از ەمەس. سۇيەگىنە ءسوز سىڭگەن سانجار كوركەم ادەبيەتتى وقىعاندى, كوڭىلىنە توقىعاندى ايرىقشا جاقسى كورەدى. سونداي-اق ول كاسىپقوي سپورتشى رەتىندە دە ءبىرشاما بيىكتى باعىندىرعان. پاراپاۋەرليفتينگ سپورتىنا اڭسارى اۋعان ساڭلاق اقتاۋ شاھارىندا وتكەن ەل چەمپيوناتىندا توپ جارعان. سونىمەن قاتار مىسىر ەلىندە وتكەن الەم چەمپيوناتىندا قولا جۇلدەگەر اتانعان.
«ول – ناعىز ەڭبەكقور ازامات. ونىڭ ءون بويىنداعى جىگەر مەن قايسارلىق كىمدى دە بولسىن ءتانتى ەتپەي قويمايدى. سول ەڭبەكقورلىعىنىڭ ارقاسىندا تالاي بيىكتى باعىندىردى. ءومىردى وزگەشە سۇيەتىن شاكىرتىمنىڭ الار اسۋى الدا ەكەنىنە بەك سەنىمدىمىن. سپورتپەن شۇعىلدانىپ قانا قويماي, ورنەگى وزگەشە ولەڭدەر جازىپ جۇرگەن شاكىرتىممەن ماقتانامىن. ءاردايىم جولى اشىق بولسىن», دەيدى چەمپيوننىڭ جاتتىقتىرۋشىسى رۋسلان گرەەۆ ءوز ويىمەن ءبولىسىپ.
جۇرەگى جىر دەپ سوققان سانجاردىڭ العاشقى شىعارماشىلىق كەشىندە جينالعاندار تاراپىنان قۇرمەت تە, ىزگى تىلەك تە تولاستاعان جوق. كوركەم ادەبيەتتى جانىنداي سۇيەتىن جاس اقىن جۇرتتىڭ ماقتاۋىنا ماسايراعان جوق. جۇرتتىڭ جاقسى پىكىرىن ءوزىنىڭ دامۋىنا دەگەن العىشارت رەتىندە قابىلدايتىنىن ايتىپ قالدى. سپورت پەن پوەزيانى قاتار الىپ جۇرۋگە بەل بايلاعان سانجارعا تولايىم تابىس تىلەيمىز.
تاراز
