سۋرەت: iuth.edu.kz
وسىدان 5-6 جىل بۇرىن مەملەكەت باسشىسى جولداۋلارىندا «تسيفرلى قازاقستان» يدەولوگياسىن العا تارتقاندا, ول ۇعىم قوعامدا ءجيى ايتىلاتىن ۇران سياقتى كورىنگەنى راس. تەلەديداردان, جارنامادان, جاڭالىقتاردان «تسيفرلانعان قازاقستان» دەگەن تىركەس ۇزدىكسىز قايتالاناتىن. سول كەزدە ستۋدەنت رەتىندە مەن دە بۇل يدەياعا سكەپتيكالىق كوزقاراسپەن قارادىم: «قايداعى تسيفرلى قازاقستان, ءبىز وعان قالاي جەتەمىز؟» دەگەن كۇمان بولعان. الايدا ۋاقىت ءبارىن ءوز ورنىنا قويدى. وسى كۇنگە كەلىپ, سول كەزدە بەلگىلەنگەن يدەولوگيالىق جانە ستراتەگيالىق باعىتتىڭ ناقتى ناتيجەسىن كورىپ وتىرمىز.
قازىرگى بانك قىزمەتىن الىپ قاراساق, ءبىر-بىرىمەن باسەكەگە تۇسكەن سان الۋان تسيفرلىق شەشىمدەر بار. مۇنداي قىزمەتتەردى وزگە مەملەكەتتەرمەن سالىستىرعاندا, قازاقستان تسيفرلاندىرۋ دەڭگەيى بويىنشا كوپتەگەن دامىعان ەلدەردەن دە وزىپ كەتكەن تۇستارىن اشىق ايتۋىمىز كەرەك. ءبىز كۇندەلىكتى ومىردە مۇنى سەزبەي دە قالامىز: ءموبيلدى اۋدارىمدار, كولىكتى 5 مينۋتتا قايتا راسىمدەۋ, انىقتامالاردى ەشقايدا بارماي-اق ونلاين الۋ, نوتاريالدىق سەنىمحاتتاردى كامەرا ارقىلى راسىمدەۋ – بۇنىڭ ءبارى بۇرىن ۇزاق ۋاقىت پەن جۇيكەنى تالاپ ەتەتىن. ال قازىر بۇل قالىپتى جاعدايعا اينالدى. مۇنىڭ بارلىعى كەزىندە دۇرىس قويىلعان ستراتەگيالاردىڭ جەمىسى. سونىمەن قاتار روبوتتەحنيكا سالاسىنداعى جەتىستىكتەر دە ەرەكشە اتاپ وتىلۋگە ءتيىس. قازاقستان قۇراماسىنىڭ روبوتتەحنيكادان ءتورت دۇركىن چەمپيون اتانۋى – سپورتتىق نەمەسە تەحنيكالىق جەتىستىك ەمەس, يدەولوگيالىق سەرپىن. بۇل – ءبىز وسى سالادا كوشباسشى بولا الاتىنىمىزدىڭ ناقتى دالەلى. مۇنداي جەتىستىكتەر جاستارعا ۇلگى بولۋى كەرەك, مەكتەپتەن باستاپ, ستۋدەنتتىك ورتادا تسيفرلاندىرۋ مەن جاساندى ينتەللەكتىنىڭ ماڭىزىن تەرەڭ ءتۇسىندىرۋ قاجەت. ەڭ باستىسى, جاساندى ينتەللەكت پەن تسيفرلاندىرۋ قازاقستاندىقتاردىڭ الەمدىك نارىققا شىعۋىنا كومەكتەسەتىن قۇرال ەكەنى سانامىزعا سىڭۋگە ءتيىس. بۇل يدەيانى تەك وقۋشىلار مەن ستۋدەنتتەرگە عانا ەمەس, مۇعالىمدەرگە دە جەتكىزۋ ماڭىزدى. «جاساندى ينتەللەكت», «تسيفرلاندىرۋ» دەگەن ۇعىمدار ايتىلعاندا, اسسوتسياتسيا رەتىندە قازاقستان اتالۋى كەرەك. ال بولاشاقتا حالىقارالىق كەڭىستىكتە دە وسى سالانىڭ كوشباسشىسى بولۋعا تولىق مۇمكىندىگىمىز بار.
نۇرجان مۇحتار ۇلى,
ساراپشى, PhD
