بيىلعى وقۋ 17 قاڭتار مەن 7 ناۋرىز ارالىعىندا وتەدى. سەگىز اپتا بويى ءار سەنبى سايىن قاتىسۋشىلارعا وتاندىق جانە شەتەلدىك تانىمال لەكتورلار مەن ترەنەرلەر – مەملەكەت قايراتكەرلەرى, ءتۇرلى سالاداعى ساراپشىلار مەن اناليتيكتەر ءدارىس وقيدى.
كەزەكتى وقۋ كۋرسىنىڭ تاقىرىبى – «Smart governance: ءتيىمدى باسقارۋ ءۇشىن دەرەكتەر, اناليتيكا جانە جاساندى ينتەللەكت». وسىعان بايلانىستى ىرىكتەۋ كەزىندە جۇمىس تاجىريبەسى مەن عىلىمي دارەجەسى بار, سونداي-اق اناليتيكالىق قۇرىلىمداردا, مەملەكەتتىك باسقارۋ جۇيەسىندە, ۇلتتىق كومپانيالاردا, بۇقارالىق اقپارات قۇرالدارىندا, ۇكىمەتتىك ەمەس جانە حالىقارالىق ۇيىمداردا قىزمەت ەتەتىن, ءتيىستى سالادا بازالىق ءبىلىمى بار كانديداتتارعا باسىمدىق بەرىلدى.
كۋرس اياسىندا قاتىسۋشىلار دەرەكتەردى جيناۋ مەن تالداۋدىڭ قولدانبالى ادىستەرىن مەڭگەرەدى. ءار باعىت بويىنشا تاجىريبەلى مەنتورلاردىڭ جەتەكشىلىگىمەن قاتىسۋشىلاردان كوماندالار قۇرىلادى. سەگىز اپتالىق وقۋ اياقتالعاننان كەيىن قاتىسۋشىلار مەن مەنتورلاردىڭ بىرلەسكەن ەڭبەگى – اناليتيكالىق ماتەريالدار جيناعى جارىق كورەدى. بۇل ماتەريالدار پارلامەنت دەپۋتاتتارى, ورنىقتى دامۋ سالاسىنداعى ۇلتتىق ماقسات-مىندەتتەردىڭ ىسكە اسىرىلۋىنا مونيتورينگ جۇرگىزۋ جونىندەگى پارلامەنتتىك كوميسسيا, سونداي-اق سالالىق مەملەكەتتىك ورگاندار ءۇشىن ۇسىنىمدار رەتىندە پايدالانىلادى.
تالداۋ مەكتەبىنىڭ نەگىزگى ماقساتى – مەملەكەتتىك باسقارۋدا, الەۋمەتتىك جانە گۋمانيتارلىق زەرتتەۋلەردە, باق-تا اناليتيكالىق تاسىلدەردى كۇشەيتۋ. ايتا كەتەيىك, جوبا 2021 جىلى سەنات جانىنداعى ساراپشىلار كلۋبىنىڭ باستاماسىمەن جانە سەنات توراعاسى ماۋلەن اشىمباەۆتىڭ قولداۋىمەن قولعا الىندى. 2022–2025
جىلدارى مەكتەپتىڭ ءتورت لەگى وتكىزىلىپ, مەملەكەتتىك قىزمەت, اكادەميالىق جانە اناليتيكالىق ۇيىمدار, باق, ۇلتتىق كومپانيالار مەن ازاماتتىق سەكتوردان شامامەن 300 اناليتيك ءبىلىمىن جەتىلدىردى.
