گەننادي شيپوۆسكيح پرەزيدەنت سۇحباتىندا كولىك جانە لوگيستيكا سالاسى كەڭىنەن قامتىلعانىن اتاپ ءوتتى. ونىڭ ايتۋىنشا, قازاقستان تەڭىزگە تىكەلەي شىعاتىن جولى بولماسا دا, ەۋرازيانىڭ ءدال ورتاسىندا ورنالاسقان.
«بۇل – ءبىز ءۇشىن ۇلكەن مۇمكىندىك. وسى ارتىقشىلىقتى ءتيىمدى پايدالانىپ, ەلىمىزدى ەۋرازيا كەڭىستىگىندەگى ءىرى كولىك حابىنا اينالدىرۋ – ستراتەگيالىق ماقسات. سۇحباتتا سوڭعى جىلدارى اتقارىلىپ جاتقان ناقتى جۇمىستار ايتىلدى. جاقىندا ىسكە قوسىلعان «دوستىق – مويىنتى» تەمىرجول ماگيسترالى قىتاي مەن ەۋروپا اراسىنداعى جۇك تاسىمالىن بىرنەشە ەسە ارتتىرۋعا مۇمكىندىك بەرەدى. ال الداعى ۋاقىتتا جاڭا تەمىرجول جەلىلەرى ىسكە قوسىلىپ, 2030 جىلعا دەيىن مىڭداعان شاقىرىم تەمىرجول سالىنىپ, جوندەلەدى», دەپ جازدى گ.شيپوۆسكيح الەۋمەتتىك جەلىدە.
سونىمەن قاتار, دەپۋتات «ورتالىق – باتىس» كۇرە جولىنىڭ قۇرىلىسى تۋرالى ءسوز ەتكەن. ونىڭ ايتۋىنشا, اتالعان كۇرە جول ەل ىشىندەگى قاتىناستى جەڭىلدەتىپ, وڭىرلەر اراسىنداعى بايلانىستى نىعايتادى. بۇل تەك لوگيستيكاعا عانا ەمەس, جالپى كولىك سالاسىنىڭ دامۋىنا سەرپىن بەرەتىن ماڭىزدى جوبا.
«پرەزيدەنت كولىك پەن لوگيستيكانىڭ بۇگىنگى تاڭدا گەوساياساتتىڭ دا اجىراماس بولىگىنە اينالعانىن اتاپ ءوتتى. قازاقستان حالىقارالىق كولىك دالىزدەرىن دامىتۋعا بەلسەندى قاتىسىپ, ء«بىر بەلدەۋ – ءبىر جول», «سولتۇستىك – وڭتۇستىك» جانە ترانسكاسپي, ياعني ورتا ءدالىز باعىتتارىن ىلگەرىلەتىپ كەلەدى. جالپى, بۇل سالا – تەك جول مەن تەمىرجول عانا ەمەس, بۇكىل ەكونوميكانى بىرىكتىرەتىن ماڭىزدى جۇيە. سوندىقتان پورتتاردى, اۋەجايلاردى, ۆوكزالداردى جاڭعىرتۋ, سەرۆيستى جاقسارتۋ جانە تسيفرلىق شەشىمدەردى ەنگىزۋ – مەملەكەتتىڭ باستى مىندەتتەرىنىڭ ءبىرى», دەلىنگەن جازبادا.
