فوتو: Facebook/ ينديرا رىستينا
ينديرا رىستينانىڭ پىكىرىنشە, «ساپا لوگيكاسى» بارلىق سالاعا ورتاق بولۋى ءتيىس.
«ەكونوميكادا – ءادىل ەرەجەلەر مەن جاۋاپتى سالىق ساياساتى, الەۋمەتتىك سالادا – اتاۋلى ءارى ءتيىمدى قولداۋ, تسيفرلاندىرۋدا – قىزمەت ساپاسى مەن دەرەكتەر قاۋىپسىزدىگى, ءبىلىم مەن عىلىمدا – مازمۇن, ناتيجە جانە ادالدىق. پرەزيدەنت سۇحبات بارىسىندا بىرنەشە رەت اتاپ وتكەن «زاڭ مەن ءتارتىپ» قاعيداتى وسىنىڭ بارلىعىن بىرىكتىرەتىن وزەك رەتىندە قاراستىرعان. ءتارتىپ پەن جاۋاپكەرشىلىك جوق جەردە ساپا دا ورنىقپايتىنى ايتپاسا دا بەلگىلى دۇنيە», دەدى ول.
ساياساتتانۋشىنىڭ سوزىنشە, الداعى رەفەرەندۋم مەن كونستيتۋتسيالىق وزگەرىستەر دە باسقارۋ جۇيەسىنىڭ ساپاسىن ارتتىرۋعا باعىتتالعان.
بۇل قادام وكىلدى بيلىكتىڭ تيىمدىلىگىن كۇشەيتىپ, قابىلداناتىن شەشىمدەردىڭ كاسىبيلىگى مەن سالماعىنا قويىلاتىن تالاپتى ارتتىرۋدى كوزدەيدى. وسى تۇرعىدا پارلامەنتتىڭ ءرولى دە زاڭ شىعارۋ ۇدەرىسىنىڭ مازمۇنى, قوعامدىق ديالوگتىڭ دەڭگەيى جانە جاۋاپكەرشىلىك مادەنيەتى ارقىلى باعالانۋى ءتيىس.
«الداعى رەفەرەندۋم مەن كونستيتۋتسيالىق وزگەرىستەر دە باسقارۋ جۇيەسىنىڭ ساپاسىن ارتتىرۋعا باعىتتالعان. بۇل قادام وكىلدى بيلىكتىڭ تيىمدىلىگىن كۇشەيتىپ, قابىلداناتىن شەشىمدەردىڭ كاسىبيلىگى مەن سالماعىنا دەگەن تالاپتى ارتتىرۋدى كوزدەيدى. پارلامەنتتىڭ ءرولى دە ءدال وسى ساپا ولشەمىمەن باعالانۋى ءتيىس, ياعني, زاڭ شىعارۋ ۇدەرىسىنىڭ مازمۇنى, قوعامدىق ديالوگتىڭ دەڭگەيى جانە جاۋاپكەرشىلىك مادەنيەتى شەشۋشى مانگە يە بولۋى كەرەك», دەدى ينديرا رىستينا.
سوڭعى جىلدارى مەملەكەت ءبىلىم مەن عىلىمدى دامىتۋ ءۇشىن بىرقاتار ناقتى قادام جاسادى.
«سوڭعى جىلدارى مەملەكەت ءبىلىم-عىلىم سالاسىن دامىتۋ ءۇشىن ناقتى قادامدار جاسادى. 2025 – 2026 وقۋ جىلىنا 93 مىڭنان استام ءبىلىم بەرۋ گرانتى ءبولىندى, «كەلەشەك» بىرىڭعاي جيناقتاۋ جۇيەسى ىسكە قوسىلىپ, وندا 130 مىڭنان استام سالىم اشىلدى, ستۋدەنتتەرگە ارنالعان جاتاقحانالار سالۋ قارقىنى ارتتى. بۇل – مەملەكەتتىڭ ءوز مىندەتىن ورىنداپ وتىرعانىنىڭ ايقىن دالەلى. الايدا جاڭا كەزەڭدە باستى ولشەم – ءبىلىمنىڭ ساپاسى. ۋنيۆەرسيتەتتەردە وقىتۋ مازمۇنىنىڭ وزەكتىلىگى, ءادىل باعالاۋ, اكادەميالىق ادالدىق, ستۋدەنتتىڭ ناقتى قۇزىرەتتەرى مەن ەڭبەك نارىعىنا دايىندىعى رەفورمالاردىڭ شىنايى ناتيجەسىن كورسەتەدى», دەدى ينديرا رىستينا.
ونىڭ سوزىنشە, بۇل تالاپ ستراتەگيالىق سالالار ءۇشىن ەرەكشە ماڭىزدى. ماسەلەن, اتوم ەنەرگەتيكاسىن دامىتۋ تۋرالى شەشىم قابىلدانعان جاعدايدا, ماسەلە تەك ينفراقۇرىلىممەن شەكتەلمەيدى. ەڭ باستىسى – جوعارى بىلىكتى, جاۋاپكەرشىلىگى جوعارى ينجەنەرلىك كادرلاردى دايارلاۋ. مۇنداي سالالاردا ساپا – قاۋىپسىزدىك پەن ۇلتتىق مۇددەنىڭ تىكەلەي كەپىلى.
«عىلىم سالاسىندا دا مەملەكەت تاراپىنان جۇيەلى قولداۋ كورسەتىلىپ وتىر. 2025 جىلى عىلىمي جوبالاردى كوممەرتسيالاندىرۋ بويىنشا 62 جاڭا شارت جاسالىپ, جالپى 267 جوبا ىسكە اسىرىلۋ ساتىسىندا, جەكە ينۆەستيتسيالار كولەمى 20,4 ملرد تەڭگەگە جەتتى. سونىمەن قاتار, 2024 – 2025 جىلدارى 576 جاس عالىمعا تۇرعىن ءۇي كىلتى تابىستالدى. ەندىگى مىندەت – وسى قولداۋدى ساپالى عىلىمي ناتيجە مەن ناقتى قولدانبالى اسەرگە اينالدىرۋ.
پرەزيدەنت سۇحباتىندا تاريح عىلىمىنا قاتىستى ايتىلعان ويلار دا ساپا ۇعىمىمەن تىكەلەي بايلانىستى. تاريحتى تانىمالدىق ءۇشىن بۇرمالاۋ – قوعامنىڭ ينتەللەكتۋالدىق دەڭگەيىن السىرەتەدى. سوندىقتان, تاريح دەرەككە, عىلىمي ادىسكە جانە كاسىبي جاۋاپكەرشىلىككە سۇيەنۋگە ءتيىس. بۇل تالاپ ەڭ الدىمەن ۋنيۆەرسيتەت پەن عىلىمي ورتادا بەرىك ورنىعۋى قاجەت», دەدى ول.
ساياساتتانۋشىنىڭ ايتۋىنشا, بۇل ءتاسىل تۋريزم سالاسىنا دا قاتىستى. ءتۋريزمدى دامىتۋ تەك كەلۋشىلەر سانىن ارتتىرۋمەن ولشەنبەۋى كەرەك.
«نەگىزگى مىندەت – ساپالى تۋريستىك مارشرۋتتار, مازمۇندى مادەني جانە تاريحي باعىتتار, سەرۆيستىڭ دەڭگەيى مەن قاۋىپسىزدىگى. تۋريزم كاسىبي, ويلاستىرىلعان, ۇزاقمەرزىمدى ستراتەگيا ارقىلى عانا ەكونوميكانىڭ ناقتى درايۆەرىنە اينالادى», دەپ جازدى ينديرا رىستينا.
تسيفرلاندىرۋ مەن جاساندى ينتەللەكت ماسەلەسى دە ساپا تۇرعىسىنان قاراستىرىلدى.
«مەملەكەت باسشىسىنىڭ 2026 جىلدى تسيفرلاندىرۋ جانە جاساندى ينتەللەكت جىلى دەپ جاريالاۋى – تەحنولوگيانى جاپپاي ەنگىزۋ ءۇشىن عانا ەمەس, وعان سانالى, جاۋاپتى جانە ساپالى تۇردە دايىندالۋ ءۇشىن بەرىلگەن ۋاقىت. جاساندى ينتەللەكتىنى ويلانباي قولدانۋ ۇلكەن تاۋەكەلدەرگە اكەلۋى مۇمكىن. سونىڭ كەسىرىنەن سىني ويلاۋ قابىلەتى السىرەپ, دايىن جاۋاپقا ۇيرەنگەن, ءوز بەتىنشە ويلاي المايتىن ۇرپاق قالىپتاسۋ قاۋپى بار. سوندىقتان باستى مىندەت – بارلىق دەڭگەيدە جي قۇرالدارىن دۇرىس پايدالانۋ مادەنيەتىن قالىپتاستىرۋ, ونى ادامنىڭ ويلاۋىن الماستىراتىن ەمەس, دامىتاتىن قۇرالعا اينالدىرۋ.ءبىز وزىق ويلى ەل بولامىز دەسەك, ءار ىسكە جاۋاپكەرشىلىكپەن قاراپ, ونى ساپالى ورىنداۋدى ۇلتتىق داعدىعا اينالدىرۋىمىز كەرەك!قورىتىندى بىرەۋ: مەملەكەت باعىتتى بەلگىلەدى, رەفورمالاردى باستادى, رەسۋرستاردى ءبولدى. ەندى بارلىق سالادا قويىلعان مىندەتتەردى ساپالى ورىنداۋ قاجەت. ساپالى ءبىلىم, ساپالى عىلىم, ساپالى زاڭ, ساپالى تەحنولوگيا جانە ساپالى كادرلار عانا ەلدىڭ ورنىقتى دامۋىن قامتاماسىز ەتە الادى», دەپ تۇيىندەدى ساياساتتانۋشى ينديرا رىستينا.
