ۇكىمەت بىلتىردان بەرى ەنەرگەتيكالىق جانە كوممۋنالدىق نىسانداردى جاپپاي جاڭعىرتۋعا كىرىسكەن. بۇل جۇمىس ابدەن توزعان ينفراقۇرىلىمدى رەتكە كەلتىرۋمەن عانا شەكتەلمەيدى.
«ۇزىندىعى جۇزدەگەن شاقىرىم بولاتىن ينجەنەرلىك جەلىلەر مەن ەلەكتر قۋاتىن تاراتاتىن جەلىلەر سالۋىمىز كەرەك. بۇگىنگى تاڭدا وسى اۋقىمدى جوبانىڭ ەسەپ-قيسابى ازىرلەنىپ جاتىر», دەدى پرەزيدەنت.
مەملەكەت باسشىسى قابىلدانعان شارالاردىڭ العاشقى ناتيجەلەرى دە بار ەكەنىن جەتكىزدى. قاۋىپتى جاعدايدا تۇرعان جىلۋ ەلەكتر ستانتسيالارىنىڭ سانى ايتارلىقتاي ازايعان.
سونىمەن بىرگە پرەزيدەنت ينفراقۇرىلىمدى جوندەۋمەن شەكتەلۋ جەتكىلىكسىز ەكەنىن, سالاداعى جۇمىس ءتاسىلىن تۇبەگەيلى وزگەرتۋ قاجەتتىگىن باسا ايتتى. ونىڭ پىكىرىنشە, باستى مىندەت – ينۆەستيتسيا تارتۋعا جول اشىپ, ناقتى نارىقتىق تەتىكتەردى قالىپتاستىرۋ.
«ەنەرگەتيكا جانە تۇرعىن-ءۇي كوممۋنالدىق شارۋاشىلىعى كەز كەلگەن مەملەكەتتىڭ ءومىر سۇرۋىنە اسا قاجەتتى تۇعىر سانالادى. بۇل نەگىز شايقالسا, باسقاسى تۇگەل كۇيرەيدى», دەدى مەملەكەت باسشىسى.
قاسىم-جومارت توقاەۆ سوڭعى ونداعان جىل بويى بۇل سالاداعى جۇيەلى ماسەلەلەرگە ءتيىستى دەڭگەيدە كوڭىل بولىنبەگەنىن دە جاسىرمادى. سونىڭ سالدارىنان كوممۋنالدىق شارۋاشىلىق بيۋدجەتكە ۇزدىكسىز سالماق سالاتىن اۋىر جۇيەگە اينالعان.
پرەزيدەنت سۇحباتتا تاريف ساياساتىنا دا ارنايى توقتالدى. ونىڭ ايتۋىنشا, ەلەكتر ەنەرگياسى مەن جانار-جاعارمايدىڭ جاساندى تۇردە ارزان بولۋى قاراپايىم حالىققا ەمەس, ءىرى كاسىپورىندار مەن دەلدالدارعا ءتيىمدى بولعان.
ء«تاريفتىڭ تومەن بولۋى قاراپايىم تىرلىك كەشىپ جاتقان ادامدارعا پايدالى دەگەن جالعان سەنىمنەن ارىلاتىن ۋاقىت جەتتى. ءىس جۇزىندە بۇل – اۋقاتتى ازاماتتارعا جاسىرىن تۇردە بەرىلەتىن سۋبسيديا», دەدى قاسىم-جومارت توقاەۆ.
مەملەكەت باسشىسى الەۋمەتتىك ادىلدىكتى قامتاماسىز ەتۋ ءۇشىن اتاۋلى قولداۋعا كوشۋ قاجەت ەكەنىن اتاپ ءوتتى. ياعني, مەملەكەت كومەكتى شىنىمەن مۇقتاج ازاماتتارعا عانا كورسەتۋگە ءتيىس.
«كىم قانشا تۇتىنسا, سونشا تولەيدى, قولداۋعا شىنىمەن ءزارۋ ادامدارعا عانا كومەك بەرىلەدى. تاريفتەر ادىلەتتى بولۋى كەرەك, ياعني «نەعۇرلىم كوپ تۇتىنعان, سوعۇرلىم كوپ تولەيدى» دەگەن قاعيدات بەرىك ورنىعۋعا ءتيىس. مەن وسىنداي ناقتى مىندەت قويىپ وتىرمىن», دەدى پرەزيدەنت.
قاسىم-جومارت توقاەۆتىڭ ايتۋىنشا, بۇل باعىتتا العاشقى وڭ وزگەرىستەر بايقالىپ وتىر. سۋ مەن ەلەكتر قۋاتىن ۇنەمدەپ پايدالاناتىن تۇرعىندار ءۇشىن ەڭ تومەن تاريف قولدانىلۋدا. مۇنداي ءتاسىل رەسۋرستاردى ءادىل ءبولىپ, زاماناۋي ينفراقۇرىلىم مەن ءتيىمدى ەنەرگەتيكا جۇيەسىن قالىپتاستىرۋعا مۇمكىندىك بەرەدى.
