اۋىل شارۋاشىلىعى مينيسترلىگىنىڭ مالىمەتىنشە, تۇلكىباس اۋدانى اۋماعىندا الما مەن وزگە دە جەمىستەردى تەرەڭ وڭدەۋگە باعىتتالعان زاۋىت ءوز جۇمىسىن باستادى. كاسىپورىن قوسپاسىز 100 پايىز تابيعي شىرىن, جەمىس پيۋرەسى, الما ۇنتاعى, سونداي-اق بالالار تاعامىنا ارنالعان ونىمدەر وندىرۋگە ماماندانعان.
اۋىل شارۋاشىلىعى وندىرىستىك كووپەراتيۆى زاماناۋي وندىرىستىك ستاندارتتارعا ساي كەلەدى جانە قىتايدان اكەلىنگەن سوڭعى ۇلگىدەگى اۆتوماتتاندىرىلعان جابدىقتارمەن جابدىقتالعان. زاۋىتتىڭ جىلدىق وندىرىستىك قۋاتى 5 مىڭ تونناعا دەيىن جەتەدى.
قازىرگى ۋاقىتتا كاسىپورىندا تاۋلىگىنە 30 تونناعا دەيىن الما وڭدەلىپ جاتىر. دايىن ءونىم Ayim برەندىمەن ساۋدا جەلىلەرىنە شىعارىلعان.
كاسىپورىن تولىقتاي ءوز شيكىزاتىمەن قامتاماسىز ەتىلگەن. اۋماعى 300 گەكتار بولاتىن الما باقتارىنان جينالعان ءونىمنىڭ ءبىر بولىگى وڭدەۋگە جىبەرىلسە, قالعانى سىيىمدىلىعى 2 مىڭ توننا بولاتىن كووپەراتيۆتىڭ جەمىس ساقتاۋ قويماسىندا ساقتالىپ, قىس مەزگىلىندە ساتىلىمعا شىعارىلادى.
الداعى ۋاقىتتا زاۋىت جەرگىلىكتى باعبانداردان ستاندارتقا ساي كەلمەيتىن المالاردى قابىلداپ, وڭدەۋدى جوسپارلاپ وتىر. بۇل باستاما اۋدان فەرمەرلەرىنە قوسىمشا قولداۋ بولماق.
