تاراتىلعان اقپارعا سۇيەنسەك, قوسىمشا ءبىلىم بەرۋ ۇيىمدارىنىڭ جەلىسى وتكەن جىلمەن سالىستىرعاندا 25%-عا ارتىپ, ەكى مىڭنان استام بىرلىكتى قۇرايدى. اۋىلدىق جەرلەردەگى بالالاردى قوسىمشا ءبىلىم بەرۋمەن قامتاماسىز ەتۋ ماقساتىندا 1 000 كوميۋنيتي-ورتالىق قۇرۋ بويىنشا جۇمىستار اياقتالدى. 3 جىل ىشىندە 4200-دەن استام بالانى قامتيتىن 1251 ورتالىق اشىلدى.
2025 جىلدىڭ ماۋسىم ايىنان باستاپ سپورت, شىعارماشىلىق جانە قوسىمشا ءبىلىم بەرۋ سالالارىن قامتيتىن بىرىڭعاي ۆاۋچەر جۇيەسى پيلوتتىق رەجيمدە ىسكە قوسىلدى. بۇگىنگى كۇنى 600 مىڭنان استام بالا قوسىمشا بىلىمگە ۆاۋچەر الدى. جوبا قازىرگى ۋاقىتتا 6 وڭىردە تابىستى جۇزەگە اسىرىلۋدا: استانا, شىمكەنت قالالارى جانە قاراعاندى, اقتوبە, اتىراۋ, قىزىلوردا وبلىستارى.
«وقۋعا قۇشتار ۇلت» جوباسى اياسىندا مەكتەپ كىتاپحانالارىنىڭ قىزمەتى جۇيەلى تۇردە دامىپ كەلەدى. edu.bookfund.gov.kz پورتالىنا 8 مىڭنان استام مەكتەپ پەن كوللەدج قوسىلىپ, ناتيجەسىندە وقىرمان بەلسەندىلىگى 26,2%-عا ارتتى. مەكتەپ كىتاپحانالارىنىڭ قورى بيىلعى جىلى 141 ملن داناعا جەتتى. 1 830 كوۆوركينگ-ورتالىقتارىن قۇرۋ ارقىلى ءبىلىم بەرۋ ۇيىمدارى كىتاپحانالارىنىڭ ماتەريالدىق-تەحنيكالىق بازاسى جاقسارتىلدى», دەلىنگەن اقپاراتتا.
سونىمەن قاتار, 2025–2026 وقۋ جىلىندا ءبىلىم بەرۋ ۇيىمدارىندا «ادال ازامات» ءبىرتۇتاس تاربيە باعدارلاماسىن ىسكە اسىرۋ زاڭ جانە ءتارتىپ, ەڭبەك ادامى جانە تازا قازاقستان اتتى ءۇش نەگىزگى يدەياعا باسىمدىق بەرە وتىرىپ جۇزەگە اسىرىلۋدا. ءبىلىم بەرۋ ۇيىمدارىنداعى سىنىپتان تىس جانە مەكتەپتەن تىس ءىس-شارالار فورماتىندا جۇرگىزىلەتىن بۇكىل تاربيە جۇمىسىنىڭ مازمۇنى التى نەگىزگى قۇندىلىققا نەگىزدەلگەن: تاۋەلسىزدىك پەن وتانشىلدىق, بىرلىك پەن ىنتىماق, ادىلدىك پەن جاۋاپكەرشىلىك, زاڭ مەن ءتارتىپ, ەڭبەكقورلىق پەن كاسىبيلىك, جاسامپازدىق پەن جاڭاشىلدىق.
باعدارلاما اياسىندا ەلىمىزدىڭ بارلىق مەكتەپتەرىندە اتا-انالارعا پەداگوگيكالىق قولداۋ كورسەتۋ ورتالىقتارى جۇمىس ىستەۋدە. ولاردىڭ باستى باعىتى بالالاردى وقىتۋ مەن تاربيەلەۋدە وتباسى مەن مەكتەپتىڭ ءوزارا ىنتىماقتاستىعىن ارتتىرۋ, ءپوزيتيۆتى اتا-انا مادەنيەتىن قالىپتاستىرۋ بولىپ تابىلادى. بيىل اتا-انالاردىڭ بالالارىنىڭ مەكتەپتەگى ومىرىنە قاتىسۋ بەلسەندىلىگى ەكى ەسەگە ءوستى.
اتا-انالارعا ارنالعان ساباقتارعا قاتىسقان اتا-انالاردىڭ 62%-ى تاربيە پروتسەسىنە وزگەرتۋلەر ەنگىزۋگە دايىن. مۇعالىمدەر اراسىندا جۇرگىزىلگەن ساۋالناما ناتيجەسى بويىنشا رەسپوندەنتتەردىڭ 82%-ى باعدارلامانىڭ سىنىپ جەتەكشىلەرىنىڭ كاسىبي دامۋىنا وڭ اسەرىن, 84%-ى وقۋشى بەلسەندىلىگىنىڭ وسۋىنە وڭ اسەرىن, ال 71%-ى مەكتەپ پەن وتباسىنىڭ ءوزارا ىنتىماقتاستىعىنىڭ ارتقانىن اتاپ ءوتتى.
