فوتو: اشىق دەرەككوز
ۆيتسە-ءمينيستردىڭ ايتۋىنشا, 2025 جىلدىڭ قورىتىندىسى بويىنشا تەمىرجول سالاسى رەكوردتىق كورسەتكىشكە قول جەتكىزدى: تاسىمالداۋ كولەمى شامامەن 318 ملن تونناعا جەتتى. ال 2026 جىلى بۇل كورسەتكىش 327 ملن توننانى قۇرايدى دەپ بولجانىپ وتىر. ترانزيتتىك تاسىمال سالاسىندا جىل سايىنعى تۇراقتى ءوسىم 20% دەڭگەيىندە ساقتالىپ كەلەدى.
«بيىل «دوستىق – مويىنتى» جانە «الماتى اينالما جولى» سياقتى ءىرى جوبالار اياقتالدى, ولاردىڭ جالپى ۇزىندىعى – 911 شاقىرىم. بۇل جەلىنىڭ وتكىزۋ قابىلەتىن 5 ەسەگە ارتتىرۋعا جانە ترانزيتتىك تاسىمالداردى جەدەلدەتۋگە مۇمكىندىك بەردى», دەدى جانىبەك تايجانوۆ.
ۆيتسە-مينيستر الداعى جوسپارلارعا دا توقتالىپ ءوتتى:
- «قىزىلجار – مويىنتى» جانە «داربازا – ماقتاارال» ۋچاسكەلەرىندەگى ستراتەگيالىق جوبالار اياقتالادى.
- «التىنكول – جەتىگەن» جانە «بەينەۋ – ماڭعىستاۋ» باعىتتارىن جاڭارتۋ جۇمىستارى جۇرگىزىلەدى.
تەمىرجول قىزمەتتەرىنىڭ ساپاسىن جاقسارتۋ ءۇشىن پاركتى اۋقىمدى تۇردە جاڭارتۋ كوزدەلگەن. 2026 جىلعا قاراي:
- 236 لوكوموتيۆ;
- 1,4 مىڭنان استام جۇك ۆاگونى;
- 191 زاماناۋي جولاۋشىلار ۆاگونى جەتكىزىلەدى.
سونداي-اق جول جوندەۋ جۇمىستارىنىڭ قارقىنى دا جوعارى. 2025 جىلى 1,5 مىڭ شاقىرىم جول جوندەلسە, 2026 جىلى تاعى 1,6 مىڭ شاقىرىم جولدى كۇردەلى جوندەۋدەن وتكىزۋ جوسپارلانعان.
ترانسكاسپي حالىقارالىق كولىك باعىتى (تحكب) مەن «سولتۇستىك – وڭتۇستىك» دالىزدەرى حالىقارالىق ساۋداداعى ماڭىزىن ارتتىرا تۇسپەك. تحكب اياسىندا وتاندىق ساۋدا فلوتى 4 پاروممەن تولىقتىرىلىپ, 2026 جىلى كونتەينەرلەر تاسىمالى 90 مىڭ جپە-گە جەتەدى دەپ جوسپارلانعان.
مەملەكەت باسشىسىنىڭ تاپسىرماسىمەن ۆوكزالداردى جاڭعىرتۋدىڭ كەشەندى باعدارلاماسى ءجۇرىپ جاتىر.
«وسىلايشا, 2026 جىل قازاقستاننىڭ زاماناۋي ءارى ورنىقتى, باسەكەگە قابىلەتتى كولىك جۇيەسىن قالىپتاستىراتىن نەگىزگى ينفراقۇرىلىمدىق جوبالارىنىڭ اياقتالىپ, ءىس جۇزىندە جەمىسىن بەرە باستاعان كەزەڭى بولادى», دەدى ۆيتسە-مينيستر.
