فوتو: اشىق دەرەككوز
بيىلدىڭ ايتۋلى وقيعالارىنىڭ ءبىرى – ازاماتتىق سەكتورمەن بىرلەسىپ وتكىزگەن اۋقىمدى ديالوگ الاڭدارى. ەڭ نەگىزگىسى – قازاقستاننىڭ XII ازاماتتىق فورۋمى بولدى. وعان 1 000-نان استام ۇەۇ وكىلى قاتىستى. بۇل ءىس-شاراعا دەيىن 20 وڭىرلىك فورۋم جانە مينيسترلىكتەرمەن 14 سالالىق كەزدەسۋلەر ۇيىمداستىرىلعان-دى. ناتيجەسىندە 400 ۇسىنىس ازىرلەنىپ, ءىس-قيمىل جوسپارىنا ەندى.
سونىمەن قاتار مەملەكەتتىك جانە ۇكىمەتتىك ەمەس سەكتور اراسىنداعى سەرىكتەستىكتى دامىتۋ بويىنشا دا بىرقاتار جۇمىس جۇرگىزىلگەن. جىل ىشىندە رەسپۋبليكالىق قوعامدىق كەڭەستەر ءماجىلىسى, حالىقارالىق ۇەۇ كونفەرەنتسياسى جانە قايىرىمدىلىق فورۋمى وتكىزىلدى.
وسى جىلى 73 ۇكىمەتتىك ەمەس ۇيىم ۇەۇ سىيلىعىنىڭ لاۋرەاتى اتانسا, 12 ۇيىمعا «تاڭداۋ» سىيلىعى تابىستالدى. ال 33 قايىرىمدىلىق قورى مەن بىرلەستىگى قايىرىمدىلىق سالاسىنداعى ماراپاتقا يە بولدى. سونداي-اق 1 000-عا جۋىق ۇەۇ جوبالىق باسقارۋ فورماتىندا الەۋمەتتىك باستامالاردى ىسكە اسىردى.
جالپى رەسپۋبليكا كولەمىندە 2 292 جوبا جاسالدى. ونىڭ ىشىندە 2 185 جوبا مەملەكەتتىك الەۋمەتتىك تاپسىرىس اياسىندا, 102 جوبا گرانتتىق قارجىلاندىرۋ جانە 5 جوبا ستراتەگيالىق سەرىكتەستىك نەگىزىندە جۇزەگە استى. 40-تان استام رەسۋرس ورتالىقتارى قىزمەت ەتەدى. ولار وبلىستىق, قالالىق, اۋداندىق جانە اۋىلدىق دەڭگەيدە جۇمىس ىستەيدى.
ايتا كەتەرلىگى كەيىنگى بەس جىلدا الەۋمەتتىك تاپسىرىسقا بولىنەتىن قاراجات شامامەن ەكى ەسە ارتقان. بۇل – يگى باستامالاردىڭ جۇزەگە اسۋىنا, مۇقتاج جاندار مەن جاستاردى قولداۋعا باعىتتالىپ وتىر. 2025 جىل – ۇكىمەتتىك ەمەس ۇيىمداردىڭ ەل دامۋىنا قوسقان ۇلەسىنىڭ زور ەكەنىن تاعى ءبىر مارتە دالەلدەدى. الداعى كەزەڭدە ازاماتتىق قوعام ينستيتۋتتارى الەۋمەتتىك تۇراقتىلىقتى نىعايتىپ, حالىقتىڭ ءومىر ساپاسىن ارتتىراتىن باستامالاردى ودان ءارى جالعاستىراتىنىنا سەنىم مول.
