قارجى مينيسترلىگىنىڭ مالىمەتىنە سۇيەنسەك, بيىلعى 11 ايدىڭ قورىتىندىسى بويىنشا اۋەجايدان جاڭا تەمىرجول ۆوكزالىنا دەيىنگى LRT ۋچاسكەسىنىڭ قۇرىلىسىنا رەسپۋبليكالىق بيۋدجەتتەن 329,6 ملرد تەڭگە بولىنگەن. بۇل وتكەن جىلمەن سالىستىرعاندا قارجىلاندىرۋدىڭ ايتارلىقتاي بەلسەندى ءجۇرىپ جاتقانىن كورسەتەدى: ماسەلەن, 2024 جىلى بۇل ماقساتقا نەبارى 28,4 ملرد تەڭگە, ال 2023 جىلى 52,4 ملرد تەڭگە جۇمسالعان بولاتىن. بارلىق جاعدايدا قاراجات ۇلتتىق قوردان ماقساتتى ترانسفەرتتەر تۇرىندە بەرىلدى.
استاناداعى LRT جوباسىنىڭ تاريحى 2017 جىلى قىتايدىڭ مەملەكەتتىك دامۋ بانكىنەن 1,5 ملرد دوللار نەسيە الۋدان باستالعان ەدى. الايدا 2018 جىلى «استانا بانكى» ليتسەنزياسىنان ايىرىلىپ, ونداعى 208 ملن دوللار كولەمىندەگى نەسيە قاراجاتى بۇعاتتالعان سوڭ, ينۆەستور قارجىلاندىرۋدى توقتاتتى. 2019 جىلى جەمقورلىق داۋىنا بايلانىستى قۇرىلىس مۇلدەم توقتاپ, سوت پروتسەستەرى باستالدى. كەيىننەن قازاقستان بيلىگى قىتايلىق نەسيەنى مەرزىمىنەن بۇرىن وتەپ تاستادى.
LRT قۇرىلىسى 2023 جىلى تولىقتاي بيۋدجەت ەسەبىنەن قايتا جانداندى. جوبانى ىسكە قوسۋ مەرزىمى بىرنەشە رەت كەيىنگە شەگەرىلگەنىمەن, 2025 جىلدىڭ قىركۇيەك ايىندا سىناق رەجىمىندە ىسكە قوسىلدى. ال جەلىنى تۇپكىلىكتى پايدالانۋعا بەرۋ 2026 جىلعا جوسپارلانىپ وتىر.
