سۋرەت: kaz.inform.kz
وڭىرلىك جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ مالىمەتىنە سۇيەنسەك, جىل باسىنان وبلىس كولەمىندە 26,8 مىڭ ادام جۇمىسقا ورنالاستىرىلعان. ونىڭ ىشىندە تۇراقتى جۇمىس ورىندارىمەن – 19,4 مىڭ ادام, ينفراقۇرىلىمدىق جوبالار ارقىلى – 1,2 مىڭ, سۋبسيديالاناتىن جۇمىس ورىندارىمەن 6,2 مىڭ ادام قامتىلعان.
– بۇلاردىڭ باسىم بولىگى «جۇمىسشى ماماندىقتارى جىلى» اياسىندا جۇزەگە اسقان جوبالار ناتيجەسىندە مۇمكىن بولعانىن ايتا كەتكەن ءجون. ماسەلەن, الەۋمەتتىك جۇمىس ورىندارىنا – 1015, جاستار پراكتيكاسىنا – 1302, قوعامدىق جۇمىستارعا – 2714, ء«بىرىنشى جۇمىس ورنى» باعدارلاماسىنا – 314, «ۇرپاقتار كەلىسىمشارتىنا» 21 ادام تارتىلدى. نەگىزى مامان تاپشىلىعى بەلگىلى ءبىر وڭىردەگى ەڭبەك نارىعىنا بايلانىستى بولىپ كەلەدى. وسى ورايدا پاۆلودار – ءىرى كاسىپورىندار مەن ۇلكەن زاۋىتتار شوعىرلانعان وبلىس بولعاندىقتان, تەحنيكالىق ماماندىقتارعا قاجەتتىلىك ءاردايىم جوعارى. بيىل وسى باعىتتارعا باسىمدىق بەرىلدى, – دەيدى باسقارما باسشىسى سامال قادىروۆا.
وبلىستىق ءبىلىم باسقارماسىنىڭ مالىمەتىنشە, جالپى تەحنيكالىق, كاسىپتىك ءبىلىمى بار مامانداردى دايارلاۋعا ارنالعان مەملەكەتتىك ءبىلىم بەرۋ تاپسىرىسى بيىلعى وقۋ جىلىندا ايتارلىقتاي ۇلعايا تۇسكەن. 2025–2026 وقۋ جىلىنا ارنالعان مەملەكەتتىك تاپسىرىسقا 650 نىسانالى كادرلار دايارلاۋ ورنى كىرەدى. سونىڭ ىشىندە كەيىنگى ۋاقىتتا سۇرانىس وسكەن ينجەنەرلىك سالا, وڭدەۋ, قۇرىلىس, قىزمەت كورسەتۋ, بيزنەس, باسقارۋ, قۇقىق, اقپاراتتىق-كوممۋنيكاتسيالىق تەحنولوگيالار سالالارىنا قاجەتتىلىك ەسكەرىلگەن.
– اتاپ ايتقاندا, ينجەنەرلىك, وڭدەۋ, قۇرىلىس سالالارىنا – 3045, قىزمەت كورسەتۋگە – 700, بيزنەس, باسقارۋ جانە قۇقىققا – 615, اقپاراتتىق-كوممۋنيكاتسيالىق تەحنولوگيالارعا 515 ورىن مولشەرىندە مەملەكەتتىك ءبىلىم بەرۋ تاپسىرىسى بولىنگەن. وسى ورايدا كاسىپورىنداردىڭ وتىنىمدەرىمەن مىندەتتى جۇمىسپەن قامتىلاتىن كادرلاردى نىسانالى دايارلاۋ ەنگىزىلدى, – دەيدى وڭىرلىك ءبىلىم باسقارماسىنىڭ باسشىسى ايگەرىم ابەنوۆا.
وبلىستا «جۇمىسشى ماماندىقتارى جىلى» اياسىندا 50 مىڭنان استام ادامدى قامتىعان 60-تان استام ءىس-شارا وتكىزىلگەن. جاز مەزگىلىندە 25 كوللەدج بازاسىندا وبلىس مەكتەپتەرىنىڭ وقۋشىلارىنا ارنالعان كاسىپتىك باعدارلاۋ لاگەرلەرى جۇمىس ىستەسە, جەرگىلىكتى كاسىپورىندار مەن شارۋا قوجالىقتارىندا ەڭبەك ەتكەن جوعارى سىنىپ وقۋشىلارى مەن ستۋدەنتتەر سانى بيىل 12 مىڭعا جۋىقتاعان. ءوڭىر كاسىپورىندارىمەن بىرلەسىپ وتكىزىلگەن «MamandyqFest» فەستيۆالى 11 مىڭنان استام ادامدى جينادى. 22 كوللەدج الەۋمەتتىك سەرىكتەستەرمەن بىرلەسىپ, 48 جاڭا ماماندىققا قاتىستى ءبىلىم باعدارلامالارىن ازىرلەگەن. جۇمىسشى ماماندىقتارىنىڭ وڭ ءيميدجىن قالىپتاستىرۋ, جاستار اراسىندا بەدەلىن ارتتىرۋ ماقساتىندا «100 جاڭا تۇلعا» جوباسى ىسكە قوسىلدى.
ءوڭىر باسشىلىعى جاس كادرلاردى قولداۋ باعدارلامالارىنىڭ اۋقىمى ءارى قاراي كەڭەيتىلەتىنىن, ونەركاسىپتىك كاسىپورىندارمەن ىنتىماقتاستىق كۇشەيتىلەتىنىن, جاستار اراسىندا جۇمىسشى ماماندىقتاردىڭ بەدەلىن ارتتىرۋ جونىندەگى جۇمىستار جالعاسا بەرەتىنىن ايتادى.
پاۆلودار وبلىسى
