مينيستر جارىسقا 93 ەلدەن 3 مىڭعا جۋىق سپورتشىنىڭ قاتىسۋى جوسپارلانىپ وتىرعانىن اتاپ ءوتتى. بارلىعى 116 ماراپاتتار جيىنتىعى وينالادى. قازاقستاننىڭ ۇلتتىق كومانداسى 10 سپورت ءتۇرى بويىنشا 58 مەدالعا تالاسادى.
ولاردىڭ قاتارىندا بياتلون, كونكيمەن جۇگىرۋ, مانەرلەپ سىرعاناۋ, شورت-ترەك, تاۋ شاڭعى سپورتى, شاڭعى قوسسايىسى, شاڭعى جارىستارى, شاڭعىمەن ترامپليننەن سەكىرۋ, فريستايل-موگۋل جانە فريستايل-اكروباتيكا بار.
«سالتاناتتى اشىلۋ ءراسىمى 2026 جىلدىڭ 6 اقپانىندا ميلان قالاسىندا وتەدى, ال جابىلۋ سالتاناتى 22 اقپاندا ۆەرونا قالاسىندا ۇيىمداستىرىلۋى جوسپارلانعان. ويىندار باعدارلاماسى كونكيمەن جۇگىرۋ جانە شاڭعى جارىسى سپورتشىلارىنىڭ ونەر كورسەتۋىمەن باستالادى. سوڭعى كەزەڭدە تاۋ شاڭعىسى بويىنشا جارىستارى وتەدى», دەدى ەربول مىرزابوسىنوۆ.
مينيستردىڭ سوزىنشە, ۇلتتىق كوماندانىڭ قۇرامىندا 35-كە جۋىق سپورتشىنىڭ قاتىسۋى بولجانىپ وتىر. 2022 جىلى پەكيندە وتكەن قىسقى وليمپيادا ويىندارىندا ەلىمىزدىڭ نامىسىن 34 سپورتشى قورعاعان.
«قازىرگى ۋاقىتتا سوفيا سامودەلكينا مەن ميحايل شايدوروۆتىڭ مانەرلەپ سىرعاناۋدان 2 جەكە رەسمي وليمپيادا ليتسەنزيالارى بار. سونىمەن قاتار, سپورتشىلارىمىز شورت-ترەكتەن 9, كونكيمەن جۇگىرۋدەن 12 ليتسەنزيا جەڭىپ الدى, دەدى ەربول مىرزابوسىنوۆ.
مينيستر ەلىمىزدە قىسقى وليمپيادالىق سپورتتىڭ 13 ءتۇرى دامىپ كەلە جاتقانىن اتاپ ءوتتى. ولاردىڭ تۇراقتى دامۋىن قامتاماسىز ەتۋ جانە وليمپيادالىق رەزەرۆتى دايىنداۋ ماقساتىندا سپورتتىق ينفراقۇرىلىمدى كەڭەيتۋ جۇمىستارى جۇرگىزىلۋدە. بۇگىندە ەلىمىزدە قىسقى سپورت تۇرلەرىنە ارنالعان 1262 سپورت نىسانى بار.
قۇرىلعان ينفراقۇرىلىم قىسقى سپورت تۇرلەرىنىڭ قولجەتىمدىلىگىن قامتاماسىز ەتەدى جانە ولاردىڭ كەڭىنەن دامۋىنا ىقپال ەتەدى.
