مۇعالىمگە قوعام ءىلتيپاتى ماڭىزدى

ورتالىق كوممۋنيكاتسيالار ورتا­لىعىندا وتكەن ءباسپاسوز جيىنىندا ورتا ءبىلىم كوميتەتىنىڭ توراعاسى قانىبەك جۇماشەۆ اتالعان شارالاردى جىلىكتەپ بەردى. ونىڭ ايتۋىنشا, جۇيەلى جۇمىس شەڭبەرىندە ءتورت جىلدا جوعارى ءبىلىمدى پەداگوگ كادرلاردى دايارلاۋعا 65 مىڭعا جۋىق گرانت بولىنگەن. وسىعان قوسا پەداگوگيكالىق ماماندىقتاردا وقيتىن ستۋدەنتتەر­دىڭ شاكىرتاقىسى 58 مىڭنان 84 مىڭ تەڭگەگە دەيىن كوتەرىلدى. سونىڭ ناتيجەسىندە كەيىنگى جىلدارى پەداگوگيكا ماماندىعىنا «التىن بەلگى» يەگەرلەرىنىڭ كوپتەپ ءتۇسۋى بايقالىپ وتىر. جاس پەداگوگتەردى قولداۋ ماق­ساتىندا بيىلدان باستاپ جوو-نى جاقسى ناتيجەمەن اياقتاعان تۇلەكتەر مەكتەپتەرگە كونكۋرسسىز قابىلدانادى.

«پەداگوگ مارتەبەسى» تۋرالى زاڭعا سايكەس, پەداگوگتەردىڭ بىلىك­تىلىگىن ارتتىرۋ ءۇش جىلدا كەمىندە ءبىر رەت جۇرگىزىلەدى. دەمەك جىل سا­يىن قازاقستانداعى مۇعالىمدەردىڭ 33,3 پايىزى, ياعني 91 مىڭنان اسا پەداگوگ مەملەكەتتىك بيۋدجەت ەسەبىنەن بىلىكتىلىكتى ارتتىرۋ كۋرستارىنان وتەدى. ولار ءوز ماماندىعىنا قاتىس­تى, سونداي-اق ينكليۋزيۆتى ءبىلىم بەرۋ, كوشباسشىلىق, يننوۆاتسيا­لار مەن تسيفرلىق قۇزىرەتتىلىك باعىتتارى بويىنشا دا وقىتىلدى. ەلىمىزدەگى پەداگوگتەردىڭ جاساندى ينتەللەكتى بويىنشا بىلىكتىلىك ارتتىرۋعا دەگەن قىزىعۋشىلىعى وتە جوعارى. «ورلەۋ» بىلىكتىلىكتى ارتتىرۋ ۇلتتىق ورتالىعى يۋنەسكو-مەن بىرلەسە ازىرلەگەن اقىسىز ونلاين كۋرسقا 338 مىڭنان استام مۇعالىم قاتىسىپ, ونىڭ 267 مىڭعا جۋىعى, ياعني 79 پايىزى سەرتيفيكات الدى. بۇل – وتە جاقسى كورسەتكىش», دەدى ق.جۇماشەۆ.

سپيكەر بايانداعانداي, پەداگوگتەر 5 جىل سايىن اتتەستاتتاۋدان وتەدى. بيىل رەسپۋبليكا بويىنشا «ۇستاز» پەداگوگتىڭ ۇزدىكسىز كاسىبي دا­مۋىنىڭ ۇلتتىق پلاتفورماسى» ىسكە قوسىلدى. پلاتفورمادا مۇعا­لىمگە قاتىستى مالىمەتتەر بىرنە­شە مەملەكەتتىك دەرەكقوردان اۆتومات­تى تۇردە الىنادى. قىزمەت ورنى, ەڭبەك ءوتىلى, ءبىلىم دەڭگەيى مەن جە­تىستىكتەرى ءبىر جۇيەگە جيناقتالعان. تسيفرلىق فورمات قاعازباستىلىقتى جويىپ, اتتەستاتتاۋدىڭ ءادىل ءارى اشىق وتۋىنە مۇمكىندىك بەردى, ادام فاكتورىن جويدى. 2025 جىلى اۆتوماتتاندىرىلعان جۇيەدە «پەداگوگ-مودەراتور», «پەداگوگ-ساراپشى» بىلىكتىلىك ساناتتارى ءۇشىن عانا اتتەستاتتاۋ  جۇرگىزىلدى. ال «پە­دا­گوگ-زەرتتەۋشى», «پەداگوگ-شەبەر­لەر» ءداستۇرلى فورماتتا, ياعني ەلەكتروندى ۇكىمەت پورتالى ار­قىلى ءوتتى. بۇگىندە ورتا ءبىلىم جۇيە­سىندە 104 999 «پەداگوگ», 126 688 «پەداگوگ-مودەراتور», 95 438 «پەداگوگ-ساراپشى», 82 632 «پەداگوگ-زەرت­تەۋ­شى», 2 973 «پەداگوگ-شەبەر» جۇمىس ىس­تەيدى. وتكەن جىلمەن سالىستىرعاندا پەداگوگ-مودەراتورلاردىڭ ۇلەسى 7 پايىزعا, پەداگوگ-ساراپشىلار 2 پايىزعا, پەداگوگ-زەرتتەۋشى – 1 پايىزعا ءوستى.

ءباسپا­سوز جيىنىنا قاتىسقان ءبىلىم سالاسىندا ساپانى قامتا­ماسىز ەتۋ كوميتەتىنىڭ توراعاسى سەرىك ءاشىروۆ جەكەلەگەن وڭىرلەردە «پەداگوگ مارتەبەسى تۋرالى» زاڭ­نىڭ كەيبىر نورمالارىن بۇزۋ فاكتى­لەرى ءالى دە كەزدەسەتىنىن ايتتى. ونىڭ سوزىنە قاراعاندا, بۇزۋشى­لىقتاردىڭ كوبى زاڭ قابىلدانعان العاشقى جىلدارى تىركەلدى. مىسالى, 2020–2022 جىلدارى 111 بۇزۋشىلىق دەرەكتەرى رەسمي تۇردە تىركەلسە, كەيىنگى ءۇش جىلدا بۇل كورسەتكىش 38-گە دەيىن ازايعان.

«بۇزۋشىلىقتاردىڭ نەگىزگى بو­لىگى پەداگوگتەردىڭ كاسىبي قىزمەتىنە ءتان ەمەس جۇمىستارعا تارتىلۋىنا قاتىستى. بۇدان بولەك, پەداگوگتەر­دىڭ ار-نامىسىنا تيۋ, بالاعاتتاۋ فاكتىلەرى تىركەلگەن. سونداي-اق مۇعا­­لىمدەردى ماجبۇرلەپ كونتسەرت بيلەتتەرىن ساتىپ الۋعا, ءتۇرلى ءىس-شارالارعا كورەرمەن رەتىندە قاتىستىرۋ بويىنشا دەرەكتەر انىق­تالعان. پەداگوگكە قۇرمەتسىزدىك تانىتۋ, ونىڭ ىشىندە ماسس-مەديا مەن الەۋمەتتىك جەلىلەر ارقىلى ار-نامىسىنا تيۋ فاكتىلەرى بويىنشا اۋماقتىق ءبىلىم سالاسىندا ساپانى قامتاماسىز ەتۋ دەپارتامەنتتەرى تاراپىنان وقۋشىلاردىڭ اتا-انالارىنا 12 اكىمشىلىك ءىس قوزعالدى. بۇل شارالار پەداگوگتىڭ زاڭمەن قورعالاتىن مارتەبەسىنىڭ ناقتى ىسكە اسىرىلىپ جاتقانىن كورسەتەدى. اكىمشىلىك قۇقىق بۇزۋشىلىق تۋرالى» كودەكستىڭ 409-بابىنا ساي­كەس جاۋاپكەرشىلىك كوزدەلگەن. وسى نورما ەسكەرتۋ جاساۋدان باستاپ, قايتالانعان جاعدايدا ايىپپۇل سالۋ تۇرىندەگى اكىمشىلىك سانكتسيا­لاردى قامتيدى», دەدى س.ءاشىروۆ.