كوپشىلىك كوپتەن كۇتكەن وقۋشىلار سارايى جونىندە وبلىس اكىمى جۋىردا استانادا وتكەن بريفينگتە, ودان كەيىن وبلىستىق ءبىلىم باسقارماسىنىڭ باسشىسى, عالىم باۋىرجان ەردەمبەكوۆ تە ءسوز قوزعاپ, «بيىل پايدالانۋعا بەرىلەدى» دەگەن ەدى. «اپىراي, قالاي ۇلگەرەر ەكەن؟» دەگەن كۇمان بولعان. بىراق ايتىلعان ۋادە ورىندالدى. نىساننىڭ اشىلۋى سەمەي جۇرتشىلىعىن ەرەكشە قۋانىشقا بولەدى. «ادامنىڭ ءبىر قىزىعى بالا دەگەن» دەپ حاكىم اباي ايتقانداي, بالا قۋانسا – اتا-انانىڭ دا كوڭىلى تەبىرەنبەي تۇرمايدى.
وقۋشىلار سارايىنىڭ اشىلۋ سالتاناتى دا ايرىقشا ءوتتى. وعان وبلىس اكىمى بەرىك ءۋالي, وقۋ-اعارتۋ ءمينيسترىنىڭ ورىنباسارى شىنار اقپاروۆا, «BI Group» كومپانياسىنىڭ نەگىزىن قالاۋشى باۋىرجان يساباەۆ, ى.التىنسارين اتىنداعى ۇلتتىق ءبىلىم اكادەمياسىنىڭ پرەزيدەنتى عاليا داۋلەتوۆا جانە قالا جۇرتشىلىعى قاتىستى. اشىلۋ راسىمىندە ايماق باسشىسى بۇل نىسان ءوڭىردىڭ ءبىلىم بەرۋ ينفراقۇرىلىمىن جاڭا دەڭگەيگە كوتەرەتىن ماڭىزدى جوبا ەكەنىن ايتتى.
«مەملەكەت باسشىسى قاسىم-جومارت توقاەۆ ء«بىلىم كەلەشەگى: ادال ازامات, كاسىبي مامان» تاقىرىبىنداعى بيىلعى تامىز كونفەرەنتسياسىنىڭ پلەنارلىق وتىرىسىندا: «قازىر – ءبىلىم مەن عىلىمنىڭ زامانى. جاھاندانۋ داۋىرىندە وزىق ءبىلىمدى يگەرگەن, جاڭا تەحنولوگيانى مەڭگەرگەن ەلدىڭ ۇپايى تۇگەل بولادى. بۇگىن سانالى ۇرپاق تاربيەلەي الساق, ەرتەڭ زامان كوشىنىڭ باسىندا جۇرەمىز. سوندىقتان وسى سالانى قولداۋ مەملەكەتتىك ساياساتتىڭ نەگىزگى باسىمدىعى بولىپ قالا بەرەدى», دەپ ايرىقشا اتاپ وتكەن بولاتىن. بۇل نىسان سپورتتىق-ساۋىقتىرۋ, كوركەم-ەستەتيكالىق, عىلىمي-تەحنيكالىق, گۋمانيتارلىق باعىتتارى بويىنشا بالالار مەن جاسوسپىرىمدەرگە ۇلكەن مۇمكىندىكتەرى بار دامۋ باعدارىن بەرەتىن بىرەگەي ورتالىق بولارى ءسوزسىز. وقۋشىلار سارايى وڭىرىمىزدەگى قوسىمشا ءبىلىم بەرۋ ۇيىمدارى ءۇشىن ادىستەمەلىك ورتالىققا اينالىپ, پەداگوگتەر مەن وقۋشىلارعا ارنالعان ءتۇرلى ءىس-شارالار وتكىزىلەتىن بولادى. مەملەكەت باسشىسى ارنايى تاپسىرماسىمەن قۇرىلىسى باستالعان جاڭا وقۋشىلار سارايى اباي وبلىسى قۇرىلعاننان بەرگى سالىنىپ بىتكەن تۇڭعىش الەۋمەتتىك نىسان بولىپ وتىر. 2023 جىلى باستالعان بۇل جوبا پرەمەر-ءمينيستردىڭ 2024–2026 جىلدارعا ارنالعان جول كارتاسىنا ەنگىزىلگەن. الايدا قارجىلىق قيىندىقتارعا بايلانىستى قۇرىلىس توقتاپ قالعان بولاتىن. بيىل ۇكىمەتتىڭ قولداۋىمەن 7,6 ميلليارد تەڭگە قاراجاتتى ءبولدىرىپ, قۇرىلىسى قايتا جانداندى. بۇگىن مىنە ەلىمىزدەگى ونىنشى وقۋشىلار سارايىنىڭ اشىلۋىنا جينالىپ وتىرمىز. وقۋشىلار سارايىنىڭ ورنالاسقان جەرىنە بايلانىستى, بالالاردىڭ قاۋىپسىزدىگى مەن ىڭعايلى كىرىپ-شىعۋى ءۇشىن ارنايى جاياۋ جۇرگىنشىلەر كوپىرىن سالۋدى جوسپارلاپ وتىرمىز. قازىر اتالعان كوپىردىڭ جوبالىق-سمەتالىق قۇجاتتارى ازىرلەنۋ ۇستىندە. وسى يگى ىسكە ۇلەس قوسقان بارلىق ارىپتەسكە, سەرىكتەسكە العىس ايتامىن!», دەدى وبلىس اكىمى.
وسىلايشا, وبلىس اكىمى اسەم عيماراتتىڭ قالاي سالىنعانىن, ونىڭ قانداي ماڭىزى بارىن ايتىپ بەردى. سونىمەن بىرگە سالتاناتتى جيىندا وقۋ-اعارتۋ ءمينيسترىنىڭ ورىنباسارى شىنار اقپاروۆا جاڭا نىساننىڭ ءوڭىر وقۋشىلارىنا بەرەرى مول ەكەنىن جەتكىزدى.
ءبىلىم باسقارماسىنىڭ مالىمەتىنشە, عيماراتتىڭ قۇرىلىسى 2023 جىلى باستالعان. نىساننىڭ جالپى اۋدانى – 9 800 شارشى مەتر. ساراي 500 بالاعا ارنالعان, اۋىسىممەن 1 500 وقۋشىعا دەيىن قابىلداي الادى.
زاماناۋي ۇلگىدە سالىنعان عيماراتتىڭ سىرتقى كورىنىسى دە كوز تارتادى. ال ءىشىنىڭ سالتاناتىن ساناپ تاۋىسا المايسىز, بالاعا كەرەكتىنىڭ ءبارى وسى جەردەن تابىلادى. ماسەلەن, ەكى باسسەين, حورەوگرافيا, شىعىس جەكپە-جەگى, فيتنەس, ۇستەل تەننيسى زالدارى, ۇستەل ويىندارى, ۆوكال جانە اسپاپتىق مۋزىكا, دىبىس جازۋ, ءمۇسىن جانە ART ستۋديالارى, حورەوگرافيا, اكتەرلىك شەبەرلىك, ساۋلەت ونەرى, سونداي-اق VR تەحنولوگيالارىن قولداناتىن ويىن تۇرىندەگى يميتاتسيالىق وقىتۋ كابينەتتەرى جۇمىس ىستەپ تۇر. عىلىمي-تەحنيكالىق باعىت اياسىندا اۆيامودەلدەۋ, جاڭارتىلاتىن ەنەرگيا كوزدەرى, اكۆاپونيكا جانە گيدروپونيكا, نەيروزەرتحانا جانە نەيروروبوتتەحنيكا, 3D-باسىپ شىعارۋ جانە مودەلدەۋ (M-TECH), باعدارلامالاۋ, ۆيدەوگرافيا جانە كينو, جاراتىلىستانۋ عىلىمدارى بويىنشا زەرتحانالار, سونداي-اق استرونوميالىق وبسەرۆاتورياسى بار. بالالاردىڭ جان-جاقتى دامۋىنا جاعداي جاساۋ ماقساتىندا پسيحولوگيالىق قولداۋ باعىتىندا سەنسورلىق بولمە مەن سويلەۋ ءتىلىن دامىتۋ كابينەتى اشىلعان. سونىمەن قاتار تاريحي-ولكەتانۋ باعىتىندا كوۆوركينگ ايماعى بار ينتەراكتيۆتى كىتاپحانا مەن ولكەتانۋ كلۋبى قىزمەت كورسەتەدى.
اباي وبلىسى
